Carlos wahoze ari Umwami wa Espagne byatangajwe ko yahungiye muri Leta Zunze Ubumwe z’Abarabu

Yanditswe na IGIHE
Kuya 18 Kanama 2020 saa 09:05
Yasuwe :
0 0

Ingoro y’ubwami muri Espagne yatangaje ko Juan Carlos I wahoze ari umwami w’icyo gihugu yagiye muri Leta Zunze Ubumwe z’Abarabu, nyuma y’iminsi ari gukorwaho iperereza ku byaha bifite aho bihuriye na ruswa n’amafaranga yagiye abona mu buryo bunyuranyije n’amategeko.

Hari hashize ibyumweru bibiri hibazwa aho Juan Carlos aherereye nyuma y’uko atangaje ko avuye muri Espagne ariko ntatangaze aho yerekeje.

Umuvugizi w’ingoro y’ubwami muri Espagne yatangaje ko Carlos yerekeje muri Leta Zunze Ubumwe z’Abarabu tariki 3 Kanama kandi ko ariho agiherereye.

Hatangijwe iperereza muri Espagne no mu Busuwisi ku byaha Juan Carlos akekwaho.

Ubushinjacyaha bwo mu Busuwisi buri mu iperereza kuri Juan Carlos bashaka kumenya impamvu hari amafaranga yigeze kuva kuri konti ya Carlos akajya kuri konti y’umugore w’umucuruzi wo mu Busuwisi witwa Corinna zu Sayn-Wittgenstein-Sayn. Bivugwa ko uwo mugore yahoze akundana n’umwami Carlos.

Ayo mafaranga agera kuri miliyoni ijana z’amadolari yabanje koherezwa n’umwami wa Arabie Saoudite ayashyira kuri konti ya Carlos, nyuma amwe akava kuri iyo konti yohererezwa Corinna zu Sayn-Wittgenstein-Sayn.

Uwo mugore yabwiye ubushinjacyaha ko ayo mafaranga yari impano.

Ubushinjacyaha bwo muri Espagne kandi bukurikiranyeho Carlos kuba haba haratanzwe ruswa mu iyubakwa ry’umuhanda wa gari ya moshi mu mwaka wa 2011 uhuza umujyi wa Mecque na Medina muri Arabie Saoudite. Uwo muhanda watashywe mu 2018, wubatswe na sosiyete zo muri Espagne.

Juan Carlos w’imyaka 82, yimye ingoma nyuma y’urupfu rwa Francisco Franco wafatwaga nk’umunyagitugu. Carlos ashimirwa kuba yarafashije icyo gihugu kugaruka mu nzira ya demokarasi.

Juan Carlos w’imyaka 82 byatangajwe ko aherereye muri Leta Zunze Ubumwe z’Abarabu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .