Canada nticyakiriye imikino ya Francophonie yo mu 2021

Yanditswe na Ishimwe Israel
Kuya 1 Gashyantare 2019 saa 11:27
Yasuwe :
0 0

Intara ya New Brunswick yo muri Canada yatangaje ko itacyakiriye imikino ihuza ibihugu byo mu Muryango w’Ibivuga Ururimi rw’Igifaransa, Francophonie, yagombaga kuhabera mu 2021.

Umuyobozi wa New Brunswick, Blaine Higgs, yavuze ko iki cyemezo gishingiye ku kiguzi gihanitse cyo kwakira iyi mikino.

Itangazo ryasohowe ku wa 30 Mutarama 2019, rivuga ko “Blaine Higgs, yatangaje ko imikino ya Francophonie ya 2021 ntizabera muri New Brunswick, kubera ikibazo cy’amikoro no kubura kw’inkunga ya Guverinoma.’’

RFI yatangaje ko Komite yateguye imikino yagerageje kugabanya ingengo y’imari yagombaga gukoreshwa kuva kuri miliyoni 130 zigera kuri miliyoni 62 z’amadolari akoreshwa muri Canada, ntibyagira icyo bitanga.

Blaine Higgs w’imyaka 64 wahawe inshingano mu Ugushyingo 2018 yasobanuye ko ‘gufata iki cyemezo ntibyari byoroshye.’

New Brunswick yahawe kwakira imikino muri Mata 2016, Higgs avuga ko ingengo y’imari yari yateganyijwe yavuye kuri miliyoni 17 igera kuri miliyoni 130 z’amadolari akoreshwa muri Canada.

OIF igizwe n’ibihugu 88 birimo n’u Rwanda yasohoye itangazo rivuga ko ‘‘Nubwo OIF ibabajwe n’iki cyemezo, yizeye ko iyi mikino ihuza urubyiruko rwo mu bihugu bivuga Igifaransa izaba mu 2021.’’

Minisitiri w’Intebe wa Canada, Justin Trudeau, yavuze ko icyemezo cyafashwe giteye ‘‘isoni ku muryango wa Francophonie, abakinnyi, ibihugu by’Isi byari bitegereje kugana i New Brunswick na Canada kwishimira Francophonie.’’

Trudeau yavuze ko Guverinoma ye yari yateguye kugira uruhare rusesuye mu gushyigikira iyi mikino.

Intara ya Québec muri Canada (mu Mujyi wa Sherbrooke) n’agace ka Guadeloupe twari abakandida mu kwakira imikino ya Francophonie mu 2021.

Imitegurire y’iyi mikino iteganya ko igomba kubera mu Majyaruguru n’Amajyepfo mu buryo bwo gusimburana. Iyi mikino igaragaza umuco w’ibihugu byo muri OIF iba rimwe mu myaka ine, iheruka mu 2017 yabereye i Abidjan muri Côte d’Ivoire.

Komite Mpuzamahanga y’Imikino ya Francophonie izashaka igihugu kizakira iyi mikino ku nshuro ya Cyenda mu nama izabera mu Mujyi wa Paris mu Bufaransa ku wa 14 na 15 Gashyantare 2019.

Imikino ya Francophonie ya 2021 yagombaga kubera muri Moncton na Dieppe, yari itegerejwemo abakinnyi n’abahanzi bagera ku 4,000.

Iki cyemezo cyafashwe nyuma yuko umukandida Michaëlle Jean watanzwe na Canada yatsinzwe amatora yo gukomeza kuyobora Umuryango w’Ibihugu bikoresha Igifaransa (OIF) yayoboye imyaka ine, ahigitswe na Mushikiwabo Louise.

Stade ya Moncton iri mu Ntara ya New Brunswick muri Canada yagombaga kuzaberaho imikino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza