Canada: Minisitiri w’Intebe yatsinze amatora ariko atakaza ubwiganze mu nteko

Yanditswe na IGIHE
Kuya 22 Ukwakira 2019 saa 07:11
Yasuwe :
0 0

Ishyaka rya Minisitiri w’Intebe, Justin Trudeau, riharanira ukwishyira ukizana ‘Liberal Party’, ryatsinze amatora bituma azagumana ubutegetsi ariko atakaza ubwiganze muri guverinoma.

Ibyavuye mu matora birerekana ko ishyaka rya Trudeau rizatsindira imyanya 157 mu nteko ishinga amategeko ariko hakaba hagabanyutseho 13. Ibi bikazamubera imbogamizi muri iyi manda ya kabiri ku bijyanye no gutambutsa amategeko.

BBC yanditse ko ishyaka rihanganye cyane na Trudeau rya Conservative rizaba rifite imyanya 122, ryiyongereyeho imyanya rivuye kuri 95 ryari risanganywe.

Mu ijambo yagejeje ku batoye ishyaka rya Liberal Party, Trudeau yabashimiye icyizere bagiriye ishyaka rye kugira ngo bafatanye kujyana igihugu mu cyerekezo nyacyo. Ku batamushyigikiye, yavuze ko ishyaka rye rizategekera bose.

Trudeau yagiye ku butegetsi mu 2015 yizeza impinduka nyazo no kuvugurura ibintu. Nyuma y’imyaka ine, aranengwa ko atakoze bimwe mu byo yemeye.

Nko mu kurengera ibidukikije, abantu banenze umugambi we wo gushyigikira umushinga w’umuyoboro muremure w’ibikomoka kuri peteroli uca mu misozi.

Akijyaho, yari yijeje ko vuba vuba azahita ahindura inzego z’ubutegetsi ariko aza kuvuga ko atakibikoze, byatumye hari benshi bamunenga cyane.

Gusa, ubushakashatsi bwakozwe n’abahanga bo muri za kaminuza zimwe muri Canada buvuga ko Trudeau yakoze ibyo yasezeranyije ku kigero cya 92%, hejuru y’izindi guverinoma za Canada mu myaka 35 ishize.

Trudeau wari uzwi nk’umunyampuhwe kandi utavangura aheruka guhindanywa n’amafoto yabonetse yifotoje akiri umusore yisize ibintu by’umukara mu maso bimugira nk’umwirabura, iki gikorwa n’ubu gifatwa nk’irondaruhu.

Trudeau azakomeza kuba Minisitiri w'Intebe wa Canada ariko yatakaje ubwiganze mu nteko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza