00:00:00 IGIHE NETWORK KN KINYARWANDA EN ENGLISH FR FRANCAIS

Beijing: Parikingi n’inzu ndangamurage zafunzwe kubera ubwiyongere bwa Covid-19

Yanditswe na Igizeneza Jean Désiré
Kuya 22 Ugushyingo 2022 saa 10:45
Yasuwe :

Ubuyobozi bw’Umujyi wa Beijing bwategetse ko za parikingi, inzu z’ubucuruzi ndetse n’inzu ndangamurage bifungwa guhera kuri uyu wa Kabiri tariki 22 Ugushyingo 2022 kubera ubwiyongere bwa Covid-19.

Ku rundi ruhande, imijyi myinshi y’u Bushinwa yo yategetswe kongera gupima abantu bose mu kwirinda ko Covid-19 yakwira igihugu bigahungabanya ubukungu.

U Bushinwa bugaragaza ko abagera ku 28.127 basanzwemo iyi virus, abajya kungana n’abayanduraga buri munsi muri Mata 2022, mu gihe mu Murwa Mukuru, Beijing imibare ikomeza kuzamuka aho hitezwe ko hashobora kugaruka Guma mu Rugo.

Kuri uyu wa Mbere kandi iki gihugu cyagaragaje ko abantu babiri bamaze kwicwa n’iki cyorezo baje biyongera kuri batatu cyahitanye mu mpera z’iki Cyumweru, ibituma uba umubare munini w’abahitanywe n’iyi ndwara kuva muri Gicurasi uyu mwaka.

Reuters yanditse ko abashoramari batangiye gutekereza ko izi ngamba ziri kongera gufatwa zishobora guhungabanya ubukungu cyane ko abaturage bashobora kongera kumara igihe badakora.

Mu kwirinda ko Covid-19 yakwirakwira henshi, kugeza ubu kwinjira mu Mujyi wa Beijing uvuye mu bindi bice bisaba kubanza gupimwa ndetse ukamara iminsi itatu mu kato, ukabona guhabwa uruhushya bwo kuwinjiramo.

Umujyi wa Wuhan iki cyorezo cyaturutsemo mu 2019, kugeza ubu na wo washyizeho itegeko rivuga ko abantu bagomba kuva mu ngo zabo bajya mu kazi gusa, izindi ngendo zitari ngombwa bakazireka.

Kugeza ubu Umujyi wa Beijing ubarura abagera ku 1.438 bamaze kwandura Covid-19, imibare iri kwiyongera cyane kuko ku Cyumweru bari 962.

Ibikorwa byinshi byafunzwe mu Mujyi wa Beijing mu kwirinda ko Covid-19 yasakara henshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .