Batanu bahamijwe kwica umunyamakuru Khashoggi bakatirwa urwo gupfa

Yanditswe na Habimana James
Kuya 23 Ukuboza 2019 saa 05:29
Yasuwe :
0 0

Urukiko muri Arabie Saoudite rwakatiye urwo gupfa abantu batanu bahamijwe kwica umunyamakuru, Jamal Khashoggi, babiri bo mu buyobozi bukuru muri iki gihugu bari bakurikiranweho iki cyaha bo ntibahamwe na cyo.

Jamal Khashoggi wandikiraga ikinyamakuru The Washington Post, yishwe mu Ukwakira 2018 muri Turukiya.

Yaburiwe irengero tariki ya 2 Ukwakira nyuma yo kwinjira mu nyubako ikoreramo uhagarariye Arabie Saoudite, ahagana saa saba n’iminota 15, agiye gusaba ibyangombwa bimwemerera gushyingiranwa n’umunya-Turikiya, Hatice Cengiz.

Ibiro by’Ubutasi bya Leta Zunze Ubumwe za Amerika, CIA, byemeje ko Igikomangoma Mohammed bin Salman wa Arabie Saoudite, ari we wategetse ko umunyamakuru Jamal Khashoggi w’imyaka 59 yicwa.

Umushinjacyaha wungirije muri Arabie Saoudite, Shalaan al-Shalaan, yagize ati “Twasanze urupfu rwa Khashoggi rutari rwarateguwe.”

Urukiko kandi rwanzuye ko abandi bantu batatu bafungwa imyaka 24 kubera guhisha ibimenyetso.

Muri rusange abantu 11 nibo bari bitabye ubutabera bakekwaho kwica uyu munyamakuru, gusa leta ntiyigeze ishyira ahagaragara amazina yabo.

Ikinyamakuru Deutsche Welle cyatangaje ko umwe mu bari abajyanama mu bwami bwa Arabie Saoudite, al-Qahtani, wakekwaho ubu bwicanyi, yaje kurekurwa ataburanishijwe.

Uyu mugabo yafatiwe ibihano na Leta Zunze Ubumwe za Amerika.

Undi muyobozi ni uwitwa Mohammed al-Otaibi nawe utarahamwe n’icyaha.

Uru rubanza rwagiye ruburanishirizwa mu muhezo, abari bemerewe kurujyamo gusa ni abayobozi bakomeye muri Turukiya ndetse n’abo mu muryango wa Khashoggi.

Amerika yafatiye ibihano abantu 17 bakekwaho kugira uruhare mu rupfu rwa Khashoggi wahoze ari umuntu w’imbere mu bwami bwa Arabie Saoudite, ariko nyuma agatangira kubunenga.

Umunyamakuru Khashoggi yiciwe muri Ambasade ya Riyadh iri muri Turikiya. Urupfu rwe ruri mu byadobeje umubano wa Bezos na Arabie Saoudite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .