Banki y’Isi na IMF byasabye ibihugu bya G20 kuba bisoneye imyenda ibihugu bikennye

Yanditswe na Habimana James
Kuya 26 Werurwe 2020 saa 03:52
Yasuwe :
0 0

Banki y’Isi ifatanyije n’Ikigega mpuzamahanga cy’imari (IMF), byasohoye itangazo rihamagarira ibihugu bikize ku Isi bihuriye mu muryango wa G20, kuba bihagaritse kwishyuza ibihugu bikennye bifite imyenda, mu rwego rwo kubifasha guhangana n’ingaruka zirimo guterwa n’icyorezo cya Coronavirus cyibasiye Isi.

Ibi bigo bibiri byavuze ko “Iki cyorezo gifite ingaruka zikomeye byaba mu by’ubukungu n’imibereho, ku bihugu bikennye bisanzwe bihabwa inguzanyo n’Ikigo Mpuzamahanga gitanga imyenda-IDA.

Rivuga ko “Guhera ubu, bigendeye ku mategeko y’ibihugu bigurizwa, Banki y’Isi na IMF bihamagarira ibigo bitanga inguzanyo kuba bihagaritse kwishyuza ibihugu bikennye bisaba kwihanganirwa.”

Ibi bigo bivuga ko “Ibi bizafasha ibihugu guhangana n’icyorezo cya Coronavirus, no gushobora gusesengura ingaruka mu by’ubukungu.”

G20 ni umuryango w’Ibihugu bikize ku Isi, ukaba ugizwe n’ibihugu 19 n’Umuryango w’Ubumwe bw’Ibihugu by’u Burayi.

Ibihugu biwugize harimo Argentina, Australia, Brazil, u Bwongereza, Canada, u Bushinwa, u Bufaransa, u Budage, u Buhinde, Indonesia, u Butaliyani, u Buyapani, Mexico, u Burusiya, Arabie Soudite, Afurika y’Epfo, Korea y’Epfo, Turukiya, na Leta Zunze Ubumwe za Amerika.

Banki y’Isi na IMF kandi byatumiye abayobozi bagize G20 guha inshingano ibi bigo byombi gukora amagenzura, harimo no kumenya ibihugu bifite ibi bibazo by’inguzanyo, no gutegura umushinga uboneye ugaragaza ubufasha bwatangwa no kuvanaho izi nguzayo kuri ibi bihugu.

Biteganyijwe ko abagize komite ya Banki y’Isi na IMF bazahurira mu nama, hagati ya tariki 16-17 Mata uyu mwaka.

IMF na banki y’Isi bivuga ko “Byaba ari byiza muri iki gihe havanwaho iyi myenda ku bihugu bikennye bikaba kandi ari n’ikimenyetso cyiza, umuryango mpuzamahanga nawo washimira G20 ku bw’ubu bufasha.”

Kuri uyu wa Mbere, Perezida wa Banki y’Isi, David Malpass, yavuganye n’abaminisitiri b’imari muri ibi bihugu n’abahagariye banki zabyo, abamenyesha ko COVID-19 irimo kugira ingaruka ku bihugu bikennye, abisaba gufata ingamba zikomeye.

Umuyobozi Mukuru wa IMF, Kristalina Georgieva, yavuze ko batewe impungenge n’inguzanyo ifitwe n’ibihugu bikennye, avuga ko iki ari ikibazo barimo gufatanyamo na Banki y’Isi.

Ibihugu byo muri G20 byasabwe na Banki y'Isi kuba bisoneye imyenda ibihugu bikennye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .