00:00:00 IGIHE NETWORK KN KINYARWANDA EN ENGLISH FR FRANCAIS

Banki Nkuru ya Amerika yahanitse inyungu fatizo bwa mbere mu myaka hafi 30

Yanditswe na Bukuru JC
Kuya 16 June 2022 saa 09:13
Yasuwe :

Banki Nkuru ya Leta Zunze Ubumwe za Amerika yazamuye inyungu fatizo ku nguzanyo iyigeza kuri 1.75% iyivanye kuri 1.5%, ari nabwo bwa mbere bibayeho mu myaka 30 ishize.

Ni ubwa gatatu iyi Banki izamuye inyungu fatizo kuva muri Werurwe uyu mwaka, aho byitezwe ko iri zamuka rizagira agaciro mu bihembwe bitatu bikurikira, ni ukuvuga kugera mu ntangiriro za 2023, mbere y’uko hasuzumwa imiterere y’isoko, hagafatwa undi mwanzuro.

Ni bwo iyi nyungu fatizo izamutseho 0.75 ku ijana, bwa mbere kuva mu 1994.

Iki cyemezo gifashwe nyuma y’izamuka ry’ibiciro bikabije muri Amerika ritigeze ribaho mu myaka irenga 40, aho ryageze kuri 8.6% mu mpera za Gicurasi.

Hagati ya 1981 na 2019, iri zamuka ryari ku mpuzandengo ya 2.3% buri kwezi. Igihe ryigeze kurenga 5% byabayeho inshuro enye gusa muri iyo myaka yose, byumvikanisha uburyo iri zamuka rikabije.

Kubera iri zamuka, imibereho y’Abanyamerika yagize ihungabana kuko ibiciro ku masoko byazamutse, bituma ibyo bagura bigabanuka muri rusange, bityo ibikorwa by’ubucuruzi bitangira gusubira inyuma, ari nako bigira ingaruka ku bukungu.

Kuzamura inyungu fatizo bizakomeza gutuma Abanyamerika bagabanya ibyo bagura, bityo ibihugu byafataga Amerika nk’isoko rigari ryabo, cyane cyane mu bijyanye n’ubucuruzi bw’imodoka n’ibindi nk’ibyo, bibihomberemo.

Iyo Amerika izamuye inyungu fatizo kandi bigira ingaruka mu bihugu biri mu nzira y’amajyambere, kuko ibigo by’ubucuruzi byihutira kubitsa muri Amerika bityo idolari rikabura ahandi ku Isi.

Byitezwe ko n’ibindi bihugu bizarushaho kuzamura inyungu fatizo zabyo, mu rwego rwo guhangana n’izamuka ry’ibiciro rikabije riri hirya no hino ku Isi.

Ikigega mpuzamahanga cy’Imari, IMF, giherutse gutangaza ko 60% by’ibihugu biri mu nzira y’amajyambere bibangamiwe n’imyenda bifite, aho itakazagaciro k’ifaranga ryabyo ryagize uruhare mu kongera inyungu izishyurwa ku nguzanyo.

Ibi bikazarushaho gusubizwa irudubi n’icyemezo cya Amerika cyo kongera inyungu fatizo.

Iri zamuka ry’ibiciro ku rwego rw’Isi ryagizwemo uruhare n’izamuka ry’ibiciro by’ibikomoka kuri peteroli na gaz, ryatewe n’intambara iri kubera muri Ukraine ndetse n’ingaruka za Covid-19 zikirimo guca ibintu hirya no hino ku Isi, aho ubukungu bw’ibihugu byinshi butari bwasubira ku murongo.

Banki Nkuru ya Amerika yazamuye inyungu fatizo ku nguzanyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .