Bane bapfiriye mu myigaragambyo karundura yabereye ku Ngoro Ishinga amategeko ya Amerika

Yanditswe na Ndahayo Emmanuel
Kuya 7 Mutarama 2021 saa 09:24
Yasuwe :
0 0

Mu buryo buteye isoni butari bwarigeze bubaho mu mateka ya Amerika, abaturage b’icyo gihugu bashyigikiye Perezida Donald Trump ubura iminsi ibarirwa ku ntoki ngo asohoke muri White House, bateye Ingoro Ishinga Amategeko ya Amerika, ikoreramo Abadepite n’Abasenateri b’icyo gihugu.

Ni ubwa mbere bibayeho mu myaka irenga 200 ishize ko Ingoro Ishinga Amategeko ya Amerika iterwa n’abigaragambya, kuko byaherukaga mu 1812, kandi nabwo icyo gihe byakozwe n’abanyamahanga b’Abongereza, bari bamaze igihe gito batakaje icyo gihugu cyari kimaze kubona ubwingenge.

Abigaragambya barimo gushyira mu bikorwa umuhamagaro wa Trump wari wabasabye kwamagana ibikorwa by’Inteko Ishinga Amategeko ya Amerika ndetse na Sena, bagombaga guhura kuri uyu wa Gatatu bakemeza Joe Biden nka Perezida watowe n’abaturage mu buryo bwemewe n’amategeko, maze akazarahirira kuyobora Amerika mu minsi 13 iri imbere, ku wa 20 Mutarama.

N’ubwo Trump yaregeye ubujura bw’amatora inshuro 60 zose agatsindwa, uyu mugabo yanze kuva kwizina ngo yemere ko imyanzuro y’inkiko, ndetse nyuma yo gusaba Mike Pence Umwungirije, wanagombaga kuyobora umuhango wo kwemeza Biden bwa nyuma, kutazemeza Biden undi akamunangira, Trump yongeye kuhamagarira abambari be, ababwira ko bakwiye kwamagana ibyo bikorwa.

Ahagana saa saba zo ku wa Gatatu aba mbere bari bageze ku Ngoro Ishinga Amategeko ya Amerika, ariko bigaragara ko imyigaragambyo yabo ari isanzwe ndetse itaza guteza ikibazo.

Ubukana n’umubare w’abigaragambya bwakomeje kwiyongera kugera ubwo ku masaha ya saa munani n’igice, aba mbere bari bamaze kwinjira mu nyubako ikoreramo Abadepite n’Abasenateri ba Amerika.

Polisi yari ishinzwe kurinda umutekano muri iyo Ngoro yaganjwe n’umubare mwinshi w’abigaragambya, bayirushije imbaraga maze binjira mu nyubako imbere ku buryo bashoboraga no kugera ku badepite n’abasenateri mu buryo bworoshye.

Aha ni ho Polisi yatangiye kuvana abo badepite n’abasenateri mu Ngoro, bamwe bajyanwa hafi y’Ikigo cya Gisirikari kiri muri ako gace, abandi, barimo Mike Pence, banga gusohoka mu Ngoro ariko bakomeza gucungirwa umutekano mu buryo bukomeye.

Ibintu byarushijeho gufata indi ntera kugera ubwo Polisi yo mu Leta ya Washington yoherezaga abandi bapolisi gufasha abari bageramiwe, ndetse aba barinda umutekano bakuramo intwaro zabo bazitunga abigaragambyaga basatiraga iyi Ngoro mu buryo buteye inkeke.

Ku rundi ruhande, Trump yifashishije urubuga rwa Twitter yakomeje gutangaza amakuru anyuranye y’ibiri kuba, ariko bigaragara ko harimo ibinyoma ku buryo bumwe mu butumwa bwe bwavanwaga kuri Twitter, ndetse uyu mugabo yaje no gukumirwa gukoresha urwo rubuga mu gihe cy’amasaha 12, mu gihe ubutumwa yanyuzaga ku rubuga rwa Facebook nabwo bwahagaritswe. YouTube nayo yakuyeho imwe muri video zifitanye isano n’ibi bikorwa.

Byaje kurangira akaduruvayo kabaye kenshi, ndetse Polisi iza kurasa umwe mu bagore waje no kuhasiga ubuzima. Abandi bantu batatu na bo baje kwitaba Imana bazize ibikomere ubwo bari bamaze kugera kwa muganga.

Polisi yakomeje akazi ko kongera gusubiza umutekano mu Ngoro ya Amerika, maze ahagana saa kumi n’ebyiri abadepite n’abasenateri bongera kugaruka mu kazi kabo.

Trump na we yasabye abamushyigikiye gutaha, ati “ibi ni byo bibaho iyo intsinzi igaragara yibwe abakunzi b’igihugu bakomeje kurenganywa mu gihe kirekire. Mutahe mu mahoro n’urukundo. Muzibuke uyu munsi mu mateka”.

Yongeyeho ati “nzi agahinda kanyu, ndabizi ko mubabaye. Twagize amatora batwibye. Twari twatsinze ku bwiganze kandi buri wese arabizi, cyane cyane abo twari duhanganye. Ariko ubu mugomba gutaha, dukeneye kugira amahoro”.

Usibye abaturage bane bapfuye, hari abapolisI bakomerekeye muri ibi bikorwa, ndetse umwe muri bo yajyanwe kwa muganga. Bivugwa kandi ko hagiye hagaragara ibiturika mu bice bitandukanye by’umujyi wa Washington, ku buryo Polisi yatangiye akazi ko kubikuraho.

Nancy Perosi uherutse gutorerwa kongera kuyobora Umutwe w’Abadepite mu Ngoro Ishinga amategeko, yasobanuye muri make icyo ibikorwa nk’ibi ari cyo mu mateka ya Amerika, maze yandikana umubabaro ati “uyu munsi, ibikorwa biteye isoni by’urugoma byakorewe demokarasi yacu. Byahawe umugisha ku rwego rwo hejuru rwa guverinoma yacu. Ariko nanone, ntibigomba kutubuza kuzuza inshingano zacu zo kwemeza itorwa rya Joe Biden”.

Abantu bagera kuri 52 bamaze gufungwa muri ibi bikorwa, barimo umugabo ukekwaho gukwirakwiza ibiturika mu mujyi wa Washington.

Ingoro Ishinga Amategeko ya Amerika yatewe n'imyigaragambyo y'abashyigikiye Trump yaguyemo bane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .