Australie: Ikinyoma cy’umugabo ukora Pizza cyatumye miliyoni ebyiri zishyirwa muri "Guma mu Rugo" shishi itabona

Yanditswe na Uwimana Abraham
Kuya 24 Ugushyingo 2020 saa 01:19
Yasuwe :
0 0

Ikinyoma cy’umukozi ukora mu iduka ricuruza Pizza muri Australie, cyabaye inkomoko y’ishyirwaho rya Guma mu Rugo, nyuma yo kubeshya ibigendanye n’akazi akora ubwo yasangwagamo COVID-19.

Uyu mugabo ubwo byagaragaraga ko yanduye yavuze ko ashobora kuba yaranduriye kuri Woodville Pizza Bar, yavugaga ko yagiyeyo akanya gato akagura pizza ubundi agahita ahava, ibi byatumye ubuyobozi bugaragaza iri duka nk’indiri ya Covid-19.

Nyuma mu iperereza ryakozwe na polisi, byagaragaye ko uyu mugabo atagiye kuri iryo guriro akanya gato kugura Pizza, ahubwo ko yari umukozi waho usanzwe.

Umuyobozi wa Leta ya Australie y’Epfo, Steven Marshall, mu kiganiro n’itangazamakuru yavuze ko iyi leta ituwe n’abagera kuri miliyoni ebyiri itari gushyirwa muri Guma mu Rugo y’iminsi itandatu iyo uyu mugabo aza kuba atarabeshye abarebaga abahuye n’abanduye.

Steven Marshall yatangaje ko Guma mu Rugo ishobora kuzavanwaho ku wa gatandatu aho kuba ku wa mbere nk’uko byari biteganyijwe.

Yagize ati “Kuvuga ko nababajwe n’ibikorwa by’uyu mugabo, byaba bidahagije, ibikorwa byo kwikunda by’uyu muntu umwe byashyize leta yacu yose mu bihe bikomeye.”

Umuyobozi wa Polisi ya Australie y’Epfo, Grant Stevens, yavuze ko ubuyobozi bwatahuye ko umuntu wavuze ko yagiye kuri Woodville Pizza Bar mu Mujyi wa Adelaide akanya gato kugura pizza atahana, basanze yari umukozi waho usanzwe ahubwo.

Marshall yavuze ko uyu mugabo yayobeje ikipe yabo yakoraga iperereza ku bushake, ati “Ubucuruzi, abantu ku giti cyabo, imiryango, byose byagizweho ingaruka n’iki gikorwa, ni ibintu bitari bikwiye rwose.”

Ubuyobozi bwashinjwe gukabiriza iki kibazo, abantu bakavuga ko butari bukwiye guhita bushyiraho gahunda ya Guma mu Rugo kuko yagize ingaruka ku bukungu, gusa ubuyobozi buvuga ko n’ubwo yagiyeho mu buryo butari bwo yagize uruhare mu guhashya icyorezo.

Ku wa gatatu nibwo bategetse amashuri yose, amaguriro, inganda zimwe na zimwe ndetse na restaurant gufunga imiryango ndetse n’abaturage bagera kuri miliyoni ebyiri bagasabwa kuguma mu rugo.

Kuva ubwo ibipimo ibihumbi n’ibihumbi byafashwe nta bwandu bushya na bumwe bwagaragayemo, nibwo amajwi menshi yahise azamuka ashinja ubuyobozi gukabiriza iki kibazo, gusa bwatangaje ko igihe cya Guma mu Rugo kizarangira ku wa Gatandatu aho kuba ku wa Mbere nk’uko byari biteganyijwe nyuma yo gusanga bwarabeshywe.

Aka gace kashyizwe muri gahunda ya Guma mu Rugo kubera ikinyoma cyakwijwe n'umukozi wa restaurant

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .