Angela Merkel yasabye u Burusiya kwisobanura ku bijyanye no kurogwa kwa Navalny

Yanditswe na Iradukunda Serge
Kuya 3 Nzeri 2020 saa 12:20
Yasuwe :
0 0

Chancelière w’u Budage, Angela Merkel yavuze ko mu buryo budashidikanywaho, utavuga rumwe n’ubutegetsi bw’u Burusiya,Alexei Navalny yarozwe ko ndetse iki gihugu gikwiye gutanga ibisobanuro kuri iki gikorwa.

Ku wa 20 Kanama nibwo hatangiye gucicikana amakuru ko Navalny utavuga rumwe n’ubutegetsi bwa Perezida Putin yarogewe mu cyayi.

Uyu mugabo ngo yatangiye kwiyumva nabi ubwo yari mu ndege iva Tomsk ijya Moscow, ibintu byatumye ahita ajyanwa kwa muganga igitaraganya.

Mu rwego rwo gukomeza kurengera ubuzima bwe Navalny yaje kujyanwa mu Budage ngo abaganga baho abe aribo bakomeza kumukurikirana.

Nyuma y’iminsi mike ageze mu Budage, Chancelière w’iki gihugu yemeje koko ko uyu mugabo yarozwe hagamijwe kumwica ndetse asaba n’ubuyobozi bw’u Burusiya gutanga ibisobanuro kuri iki kibazo.

Yagize ati “Hari amakuru yerekana ko mu buryo burenze ubwo gushidikanwaho,ko kurogwa kwa Navalny byari ukugerageza kumwica hakoreshejwe imiti yangiza imikorere y’ubwonko. Ibyabaye bizamura ibibazo byinshi bikomeye bishobora gusubizwa gusa na guverinoma y’u Burusiya kandi igomba kubisubiza, Isi yose izategereza igisubizo.”

Ibi Merkel abivuze mu gihe hashize iminsi mike umuvugizi wa Guverinoma y’u Budage nawe atangaje ko abaganga bo muri iki gihugu basanze koko Navalny yararozwe hakoreshejwe uburozi buzwi nka ‘Novichok’.

Nubwo u Budage bukomeje gusaba u Burusiya ibisobanuro, Ibiro Ntaramakuru by’Abongereza, Reuters bivuga ko u Burusiya butemera ibyavuzwe n’iki gihugu, ndetse ngo nta n’uruhare bufite mu kurogwa kwa Navalny.

Minisiteri y’ububanyi n’amahanga y’u Burusiya yavuze ko ibivugwa n’abayobozi b’u Budage nta shingiro bifite cyane ko nta n’ibimenyetso bifatika bibiherekeza.

Alexei Navalny w’imyaka 44 y’amavuko, ahagarariye abatavuga rumwe n’ishyaka United Russia rya Perezida Vladimir Putin.

Ni umugabo ukunze kumvikana yita inzego nkuru za leta zirimo n’ishyaka rya Perezida avuga ko ari “Ishyaka ry’ibisambo n’inkundamugayo”; ibintu byanatumye ajyanwa muri gereza kenshi.

Ahagana muri 2011, Navalny yafunzwe iminsi 15 nyuma azira imyigaragambyo yakurikiye amatora y’abagize inteko ishinga amategeka;aho imyanya myinshi yegukanywe n’ishyaka rya Putin.

Muri Nyanga 2013 nabwo yarafunzwe, ashinjwa uburiganya ariko igihano nticyatangazwa ku mpamvu za politiki; biza kumubuza n’amahirwe yo kwiyamamariza kuyobora iki gihugu mu 2018.

Muri Nyakanga umwaka ushize na bwo uyu mugabo yafunzwe iminsi 30 nyuma yo gutegura imyigaragambyo mu buryo butemewe.

Iyi si inshuro ya mbere inzego z’ubuzima zemeza ko Alexei Navalny yahawe uburozi; kuko muri 2017 na 2019 nabwo yagiye arwara yagezwa ku bitaro ibizamini bikemeza ko yahawe uburozi.

Chancelière w’u Budage, Angela Merkel yemeje ko Navalny yarozwe asaba u Burusiya kwisobanura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .