Amerika yongereye Huawei iminsi 45 mbere yo gushyira mu bikorwa ibihano yafatiwe

Yanditswe na IGIHE
Kuya 14 Gashyantare 2020 saa 01:25
Yasuwe :
0 0

Minisiteri y’Ubucuruzi ya Leta Zunze Ubumwe za Amerika, kuri uyu wa Kane yatangaje ko yemereye ikigo gikora ibijyanye n’itumanaho cyo mu Bushinwa, Huawei, iminsi 45 ku gihe cyagenwe ngo ibihano cyafatiwe bitangire gushyirwa mu bikorwa.

Mu mwaka ushize nibwo Amerika yatangaje ko igiye guhagarika imikoranire ya Huawei n’ibigo byo muri Amerika, nyuma yo kuyishyira ku rutonde rw’ibigo bidashobora gukorana ubucuruzi n’abanyamerika leta itabanje kubyemeza.

Ibyo bivuze ko telefone za Huawei zakoreshaga porogaramu za Google zirimo Android zizagirwaho ingaruka iminsi yatanzwe nirangira.

Nk’uko minisiteri y’ubucuruzi yabitangaje, uku kongera igihe "kuzafasha ibigo bitanga serivisi z’itumanaho by’umwihariko ibifasha abaturage muri Leta Zunze Ubumwe za Amerika, kubasha gukoresha no kubungabunga imiyoboro isanzwe."

Iyi ni inshuro ya kane ubutegetsi bwa Donald Trump bwongereye igihe mbere yo gutangira kubahiriza ibihano, guhera muri Gicurasi 2019. Inshuro iheruka ni ku wa 19 Ugushyingo mu mwaka ushize, ubwo Huawei yahabwaga iminsi 90.

Iminsi yatanzwe icyo gihe yagombaga kurangira ku wa 16 Gashyantare.

Amerika yatangaje ibi bihano ishinja Huawei kuba icyambu mu butasi bw’u Bushinwa ku bihugu bikomeye, ndetse yongeyeho ibirego by’uko Huawei yibye amabanga y’ubucuruzi y’ibigo bitandatu bikomeye by’Abanyamerika no gufasha Iran gukurikirana abigaragambya.

Mu itangazo Huawei yasohoye, yavuze ko Minisiteri y’Ubutabera ya Amerika irimo gukora ibishoboka ngo yangize izina rya Huawei n’ubucuruzi bwayo "ku mpamvu zishingiye ku guhatana ku isoko aho kuba kubahiriza amategeko."


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza