Amerika yemeje igihe izahera igihano cy’urupfu umugore wishe undi akaniba umwana yari atwite

Yanditswe na Uwimana Abraham
Kuya 17 Ukuboza 2020 saa 02:00
Yasuwe :
0 0

Leta Zunze Ubumwe za Amerika zatangaje igihe umugore witwa Lisa Montgomery azahererwa igihano cy’urupfu, nyuma y’uko mu 2004 yishe umugore wari utwite inda y’imvutsi, ubundi akamubaga akamuteruramo umwana yari atwite akamujyana akamwiyitirira.

Muri uwo mwaka Montgomery yari afite imyaka 36 afite n’abana bane, yari yarahuye n’ibibazo bituma atarashobora gutwita, icyo gihe rero ngo yari yarabeshye umugabo we ko atwite.

Umushinjacyaha yavuze ko Montgomery yari yarakurikiranye cyane uyu mugore wacuruzaga ibibwana by’imbwa, Bobbie Jo Stinnett, ubundi akagenda yiyoberanyije nk’ugiye gucirira ikibwana, aribwo yakebye ijosi Stinnett ubundi akanamukuramo umwana, akamusiga aho kugeza ashizemo umwuka.

Icyo gihe ngo yajyanye uwo mwana abeshya umugabo we ko ari uwe, kuko umugabo we yari asanzwe aziko atwite ntiyabashije kumukeka.

Mu 2007 nibwo yahamijwe icyaha cy’ishimuta ryateye n’urupfu, akatirwa igihano cy’urupfu.

Ubutabera bwa Leta Zunze Ubumwe za Amerika bwavuze ko iki cyaha ari ndengakamera, ubwo bwatangazaga ko uyu mugore azahanishwa iki gihano ku wa 12 Mutarama 2021.

Umwavoka we ntacyo yarengejeho gusa yasabye ko igihano cyahindurwa agahanishwa igifungo cya burundu kuko yagiye ahura n’ihohotera ritandukanye, harimo ko yafashwe ku ngufu ubwo yari akiri muto.

Igihe Montgomery azaba atewe urushinge rw’ingusho ku wa 12 Mutarama 2021, azaba abaye umugore wa mbere uhanishijwe igihano cy’urupfu mu gihe cy’imyaka 70 ishize.

Impuguke ziracyakora ubushakashatsi kuri iki kibazo cy’uyu mugore kugira ngo bamenye icyagiteye ndetse n’uburyo cyakwirindwa mu bihe biri imbere.

Umwarimu mrui Kaminuza ya Boston umaze imyaka myinshi akora ubushakashatsi kuri iki gikorwa cyo gushimuta umwana ukiri mu nda, Dr Ann Burgess, yavuze ko iki gikorwa gisaba gutegurwa cyane.

Impuguke mu byo gukumira ishimutwa ry’impinja muri NCMEC (National Centre for Missing and Exploited Children), Dr John Rabun, yavuze ko iki cyaha cyagiye kigaragara cyane kuva mu myaka 15 kuri 20 ishize.

NCMEC yagaragaje ko kuva mu 2004 habayeho ishimutwa ry’abana bataravuka inshuro zigera kuri 28.

Mu 2004 yivuganye undi mugore yiba umwana yari atwite, none agiye guhabwa igihano cy'urupfu yakatiwe mu 2007

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .