00:00:00 IGIHE NETWORK KN KINYARWANDA EN ENGLISH FR FRANCAIS

Amerika yateguje ko intambara ya Ukraine ishobora guteza ikibazo gikomeye ku Isi

Yanditswe na IGIHE
Kuya 6 April 2022 saa 02:49
Yasuwe :

Umugaba w’Ingabo za Leta Zunze Ubumwe za Amerika, Gen. Mark Milley, yateguje ko ingaruka z’intambara y’u Burusiya na Ukraine zishobora kurenga izamuka ry’ibiciro, kuko ibyago by’amakimbirane mpuzamahanga bikomeje kwiyongera.

Gen. Mark Milley hamwe na Minisitiri w’Ingabo wa Amerika Gen Lloyd Austin, kuri uyu wa Kabiri bari imbere ya komisiyo y’inteko ishinga amategeko ishinzwe igisirikare, ari na bwo bwa mbere kuva u Burusiya bwatera Ukraine muri Gashyantare.

Bashimangiye ko kuva iyi ntambara yatangira, Amerika n’ibihugu bimwe by’u Burayi byisanze bisa n’ibihanganye n’u Burusiya bwateye Ukraine hamwe n’u Bushinwa bwicecekeye ntibwamagane iyo ntambara.

Mu gufasha Ukraine, Amerika yakomeje kuboherereza intwaro nyinshi zaba izo ku butaka no mu kirere.

Gusa Gen Milley yavuze ko intambara ya Ukraine ari cyo kibazo gikomeye mu mahoro n’umutekano u Burayi bugize "niba atari isi yose", mu myaka 42 amaze mu gisirikare nk’uko CNN yabitangaje.

Ku rundi ruhande, ngo bashimishijwe n’uburyo ibihugu byinshi bikomeje kujya inyuma ya Ukraine.

Yagize ati "Intambara y’u Burusiya kuri Ukraine ibangamiye amahoro n’umutekano bitari iby’u Burayi gusa, ahubwo ni amahoro n’umutekano by’isi yose, ababyeyi banjye n’urungano rw’Abanyamerika baharaniye kurinda."

Yakomeje ati "Ubu duhanganye n’ibihugu bibiri bikomeye ku isi: u Bushinwa n’u Burusiya, buri gihugu gifite ubushobozi bwa gisirikare kandi byombi bishaka guhindura amategeko isi ya none igenderaho."

Uyu muyobozi kandi yakomeye ati "Turimo kwinjira mu isi irimo kugenda itera inkeke, ndetse ibyago by’uko hashobora kubaho amakimbirane mpuzamahanga birimo kwiyongera, ntabwo biri kugabanuka."

Abadepite bo mu mashyaka akomeye muri Amerika (aba-republicains n’aba-democrates) bari bashishikajwe no kumenya intwaro zirimo guhabwa Ukraine, babaza niba hari izakwiyongeraho nk’uko icyo gihugu cyakomeje kubisaba.

Umuyobozi wa komisiyo ishinzwe igisirikare mu mutwe w’abadepite, Adam Smith, yavuze ko muri icyo kiganiro bashakaga kumenya uburyo bakora ibishoboka byose mu kubafasha.

Ni mu gihe Mike Rogers uhagarariye Alabama mu nteko ishinga amategeko, yavuze ko Amerika yashyira ibigo bya gisirikare mu bihugu byo mu Burasirazuba bw’agace ka NATO - ni ukuvuga hafi y’u Burusiya – mu bihugu nka Pologne no mu bihugu bigize agace ka Baltics.

Milley yavuze ko ashyigikiye ko hashyirwaho ibigo bya gisirikare ariko abasirikare bakajya basimburana kugira ngo hirindwe ingorane zo kwimura imiryango, gushaka amashuri n’ibindi bisaba ku miryango iri mu butumwa mu mahanga.

Yanakomoje ku bihano byafatiwe u Burusiya, avuga ko bitashoboraga guhagarika intambara ariko byazamuye ikiguzi cyayo ku Burusiya.

Gen Austin we yavuze ko Amerika idateze kohereza abasirikare muri Ukraine kurwana n’u Burusiya ariko ko iyo babikora ibintu byari guhinduka.

Gusa ngo impamvu bashingiyeho zirafatika kandi arazishyigikiye kuko bashakaga kwirinda ingaruka zirimo n’intambara yeruye, yahuza ibihugu byinshi.

Gen. Mark Milley yavuze ko intambara ya Ukraine ishobora guteza amakimbirane mpuzamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .