Amerika yatanze gasopo kuri Iran iri kwitegura kuyigabaho ibitero

Yanditswe na Theogene Uwiragiye
Kuya 31 Ukuboza 2020 saa 07:10
Yasuwe :
0 0

Igisirikare cya Amerika cyohereje indege ebyiri zo mu bwoko bwa B-52 mu kirere cyo mu Burasirazuba bwo Hagati kugira ngo cyereke Iran ko mu gihe cyose yacyanduranyaho cyangwa inshuti zayo muri ako karere, gifite ubushobozi bwose bwo kwihorera.

Ni ubwa kabiri muri uku kwezi Amerika yohereje indege kabuhariwe za B-52 mu Burasirazuba bwo Hagati, aho amakuru avuga ko iki gihugu kimaze iminsi kibona amakuru y’ubutasi ahamya ko Iran iri gutegura ibikorwa byo kwihorera kuri Amerika.

Ibi byatangajwe mu gihe habura iminsi mike Iran ikibuka Gen. Qassem Soleimani wishwe ku wa 3 Mutarama uyu mwaka mu gitero cy’indege itagira umupilote yagabweho na Amerika.

Nyuma y’urupfu rwe, Iran yihoreye irasa ibisasu ku birindiro by’ingabo za Amerika ziri muri Iraq, aho cyakomerekeje bidakabije abasirikare ba Amerika hafi 100. Nyuma y’icyo gitero, abayobozi ba Iran bavuze ko bitarangiriye aho, kuko bazakomeza ibikorwa byo kwihorera.

Amerika iri gutinya ko Iran ishobora kugaba ibitero bikomeye ku birindiro n’ibikorwa bya Amerika biri mu Burasirazuba bwo Hagati cyangwa iby’ibihugu by’inshuti n’icyo gihugu, birimo Arabie Saoudite na Israel.

Iran si ubwa mbere yaba ikoze ibi bikorwa kuko mu minsi ishize yigeze no kurasa ku mavomero ya peteroli ya Arabia Soudite n’ubwo inshuro nyinshi yabihakanye.

Indi mpamvu ituma habaho iki kikango ni amakuru aherutse kumenyekana ahamya ko hari bamwe mu barwanyi ba Iran berekeje intwaro ziremereye muri Iraq, bigakekwa ko ari zo zishobora kwifashishwa mu guhungabanya umutekano wa Amerika mu Burasirazuba bwo Hagati.

Iran kandi ngo yarakajwe cyane n’iyicwa ry’umwe mu bahanga bayo mu byo gukora ibitwaro kirimbuzi, Mohsen Fakhrizade wishwe mu minsi ishize, bikavugwa ko yahitanywe na Israel. Iki gihugu rero ngo gishobora gukoresha ibi bihe mu rwego rwo kwihorera.

Umwuka mubi hagati ya Iran na Amerika ukomeje kongera umurego mu gihe Amerika yitegura kugabanya ingabo zayo muri Iraq, zikava ku 3 000 zihari uyu munsi zikagera ku 2 500 bitarenze ku wa 15 Mutarama 2021, iminsi ine mbere y’uko Perezida Donald Trump asohoka muri White House.

Indege kabuhariwe z'abanyamerika zatambagiye ikirere cy'Uburasirazuba bwo Hagati mu rwego rwo kwereka Iran ko ifite ubushobozi bwo kwirwanaho mu gihe yaterwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .