Amerika yatabaje inzobere z’abaganga b’abanyamahanga mu kuvura COVID-19

Yanditswe na Habimana James
Kuya 27 Werurwe 2020 saa 06:47
Yasuwe :
0 0

Minisiteri y’Ububanyi n’Amahanga muri Leta Zunze Ubumwe za Amerika, yasohoye itangazo rihamagarira abaganga b’inzobere bari mu bihugu by’amahanga, kwerekezayo bagafasha igihugu guhangana n’icyorezo cya Coronavirus.

Leta Zunze Ubumwe za Amerika ni cyo gihugu kiyoboye ibindi mu kugira abaturage benshi banduye, mu gihe iki cyorezo cyahavuzwe bwa mbere tariki ya 22 Mutarama 2020.

Ubu Leta Zunze Ubumwe za Amerika zifite abanduye 85620, abamaze gupfa ni 1303 mu gihe 1868 bamaze gukira.

Itangazo ryashyize ahagaragara na Minisiteri y’Ububanyi n’Amahanga rigira riti “Turashishikariza abaganga b’abahanga bashaka gukorera muri Leta Zunze Ubumwe za Amerika nk’akazi cyangwa gutanga amasomo, cyane cyane kuri abo bashaka gukora mu kuvura cyangwa guhangana n’icyorezo cya COVID-19, kwegera za ambasade ziri mu bihugu byabo bagasaba kuba bahabwa visa.”

Iki gihugu kandi cyavuze ko ku baganga b’inzobere ariko b’abanyamahanga bari imbere muri iki gihugu, kongeresha igihe bagombaga kumara muri icyo gihugu kugira ngo bafashe guhangana na Coronavirus.

Perezida wa Leta Zunze Ubumwe za Amerika, Donald Trump, aherutse kandi guhamagara mugenzi we wa Koreya y’Epfo, Moon Jae-in, asaba ubufasha bw’ibikoresho byo gupima iki cyorezo.

Ibiro by’umukuru w’igihugu muri Korea y’Epfo, The Blue House, byatangaje ko Perezida Moon yavuze ko yiteguye gufasha Amerika mu buryo bushoboka, ariko bigakorwa mu buryo bitabangamira igihugu cye gishimwa uko kirimo kurwanya Coronavirus.

Ku Isi hose abantu basaga ibihumbi 530 bamaze kwandura, muri bo abasaga ibihumbi 24 barapfuye naho abasaga ibihumbi 122 barakize.

Amerika ikeneye abaganga benshi bo kuyifasha guhashya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .