00:00:00 IGIHE NETWORK KN KINYARWANDA EN ENGLISH FR FRANCAIS

Amerika yashyizeho amabwiriza yo gupima Covid-19 abavuye mu Bushinwa

Yanditswe na Igizeneza Jean Désiré
Kuya 29 Ukuboza 2022 saa 10:49
Yasuwe :

Leta zunze Ubumwe za Amerika zatangaje ko abagenzi bose bagana muri iki gihugu baturutse mu Bushinwa bagomba kubanza gupimwa hakarebwa ko bataba bafite ubwandu bwa Covid-19.

Ni amabwirizwa yashyizweho kuri uyu wa Gatatu tariki ya 28 Ukuboza 2022, mu gihe u Bushinwa bwo buri koroshya ingamba bwari bwarashyizeho mu kurwanya Covid-19 nubwo imibare y’abandura mu gihugu ikomeje kwiyongera.

Ni amabwiriza azatangira gukurikizwa ku itariki ya 05 Mutarama 2023 mbere ho iminsi mike ngo ay’u Bushinwa yo kwemerera abinjira n’abasohoka mu gihugu badabimwe na yo atangire gukurikizwa.

Amerika yiyongereye ku bihugu nk’u Butaliyani, u Buyapani, Malaysia, u Buhinde n’ibindi aho bigaragaza ko abagenzi bava mu Bushinwa babyinjiramo bagomba kubanza gupimwa Covid-19 kubera ubwiyongere bw’abandura bivugwa ko bari kugaragara mu Bushinwa.

Mu gupima abajya muri Amerika hazajya hakoreshwa uburyo bwa PCR n’ubundi buryo ariko ibipimo bigenzurwe hakoreshejwe ikoranabuhanga aho umuntu ashobora kugenzura ibipimo atari aho byafatiwe ibizwi nka ‘telehealth’.

Abasabwa kwipimisha ni abajya muri Amerika ku buryo bw’ako kanya barimo abava mu bice bya Hong Kong na Macau n’ababanza kunyura mu bindi bice nk’i Seoul muri Koreya y’Epfo cyangwa Toronto na Vancouver muri Canada.

Abazajya basangwa nta bwandu bafite ariko baherutse kubugira kuva mu minsi icumi ibanza gusubiza hejuru, mbere yo gukora urugendo bazajya babanza gukorerwa inyandiko igaragaza ko bakize Covid-19 vuba.

Inzego z’ubuzima muri Amerika zavuze ko “Abazajya baturuka mu Bushinwa cyane mu bice bya Hong Kong na Macau, baba abana b’imyaka ibiri cyangwa irenze bazajya babanza gupimwa nibura mbere ho iminsi ibiri kugira ngo bahaguruke.”

Nubwo amakuru avuga ko imibare y’abandura yiyongera umunsi ku wundi, u Bushinwa bushinjwa guhisha imibare ya nyayo y’abahitanwa cyangwa abandura iyi ndwara ku buryo bigoye ibindi bihugu kuba byakwirinda iyi ndwara.

Inzego z’ubuzima muri Amerika zikomeza zivuga ko uku kwiyongera kw’abandura Covid-19 mu Bushinwa gushobora kuba kuri kugirwamo uruhare n’ihererekanywa rya Covid-19 yihinduranyije.

Ziti “Bijyanye n’uko nta makuru ahari agaragaza uko icyorezo gihererekanywa, biratugoye kuba twagenzura ubwoko bushya bwa Covid-19 yihinduranyije bushobora kwinjizwa muri Amerika.”

Ibindi bihugu byafatiye ingamba abaturuka mu Bushinwa, bishingira kuri iyo mibare itagaragazwa ndetse n’uko iyo bapimye abinjira muri ibyo bihugu bavuye mu Bushinwa basanganwa ubu bwandu.

Nk’u Butaliyani kuri uyu wa Kabiri bwatangaje ko abagenzi baturutse mu Bushinwa bajya mu gice cya Lombard, mu ngendo ebyiri zituruka mu Bushinwa, 46% by’abakoze izo ngendo basanzwemo Covid-19.

Nubwo u Bushinwa buri gufatirwa ingamba zikakaye n’ibindi bihugu, ku itariki ya 08 Mutarama 2023, hateganyijwe ko ibikorwa byose bizafungura ndetse n’abasaba pasiporo zo kujya muri iki gihugu nibwo bazatangira guhabwa uburenganzira bwo kubikora.

Abaturuka mu Bushinwa bagiye muri Amerika bazajya babanza gupimwa Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .