00:00:00 IGIHE NETWORK KN KINYARWANDA EN ENGLISH FR FRANCAIS

Amerika: Urubura rwahejeje benshi mu modoka, abapfa bakomeje kwiyongera

Yanditswe na IGIHE
Kuya 27 Ukuboza 2022 saa 08:25
Yasuwe :

Abantu nibura 28 ni bo bamaze gupfa muri Leta ya New York, umubare munini ukaba uwo mu gace ka Buffalo, bazira ubukonje budasanzwe bukomeje kwibasira Amerika y’Amajyaruguru.

Umwe mu bayobozi bo muri iyo Leta yatangaje ko kubera urubura, hari abantu benshi baheze mu modoka zabo zitabasha kuva aho ziri mu gihe cy’iminsi irenga ibiri, ku buryo ubu bukonje "bushobora kuba ari bwo bubi" bubayeho mu buzima bwabo.

Nta gahenge karaboneka kuko abashinzwe iby’iteganyagihe bateguje ko urubura ruhari uyu munsi, rushobora kwiyongeraho santimetero 23 mu bice byinshi by’iyi leta, kugeza ku wa Kabiri.

Ni mu gihe umuyaga urimo ubukonje bukabije urimo guturuka muri Canada ukagera ku mupaka wa Mexico, umaze guhitana abantu 56.

Perezida wa Leta zunze ubumwe za Amerika, Joe Biden, yemeje ko ari ibihe bidasazwe, ku buryo ubuyobozi bwa Amerika ku rwego rw’igihugu bugiye kunganira ubwa Leta ya New York.

Yanditse kuri Twitter ati "Nifatanyije n’ababuze ababo muri izi mpera z’icyumweru z’iminsi mikuru."

Umwe mu bayobozi b’Intara ya Erie ari na yo Buffalo iherereyemo, Mark Poloncarz, yavuze ko benshi mu bapfuye bazize ibibazo by’umutima mu gihe babaga bahanganye n’urubura. Bamwe bagiye basangwa mu modoka zabo bapfiriyemo.

Guverineri wa New York, Kathy Hochul, na we ukomoka muri Buffalo, yavuze ko bimeze nk’ibihe by’intambara, ku buryo ibiri kubera mu modoka biteye agahinda.

Byongeye, ngo n’imodoka z’ubutabazi ziri koherezwa mu duce twugarijwe cyane ntabwo zibasha kugerayo, cyangwa na zo zigahera mu rubura.

Umwe mu miryango yabashije gutabarwa, wavuze ko wamaze amasaha 11 mu modoka utegereje ubutabazi nk’uko CBS News yabitangaje.

Zila Santiago - umugabo w’uwo muryango - yagize ati "Byari ibihe bitarimo icyizere na gike."

Yavuze ko kugira ngo babashe gukomeza kubaho birinze kuzimya moteri y’imodoka, ubundi akomeza gukina n’abana kugira ngo barwanye ubukonje.

Ibi bihe kandi byatumye ahantu henshi habura amashanyarazi, ibintu byagize ingaruka ku ngo n’ibikorwa by’ubucuruzi bigera ku 250,000. Icyakora, amashanyarazi yaje gusubizwaho.

Impfu zishingiye ku bukonje bwinshi kandi zabaye muri Leta za Vermont, Ohio, Missouri, Wisconsin, Kansas, na Colorado.

Leta ya Montana ni yo yibasiwe cyane n’ubukonje, kuko bwageze muri -45C.

Inzu zarengewe n'urubura rukomeje kwiyongera
Imodoka zimwe zaheze ku mihanda, hari iziri gupfiramo abantu
Ubutabazi bw'ibanze bukomeje mu bice byinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .