Amerika mu manga: Wa mudugudu wahoze urabagirana ku mpinga y’umusozi, ntukimurika!

Yanditswe na Ndahayo Emmanuel
Kuya 12 Mutarama 2021 saa 10:07
Yasuwe :
0 0

Mu mwaka wa 1630, itsinda ry’abagabo b’Abongereza bagizwe ahanini n’abari bamaze kuyoboka imyizerere ya Gikirisitu, beguye amato yabo baboneza inyanja, berekeza ku butaka bwa Amerika aho bizeraga kubaho mu bwigenge busesuye kure y’idini Gatolika, dore ko abayoboke baryo batari bishimiye umwanduko w’idini ry’Abakirisitu bari bamaze kubiyomoraho, ndetse hari n’ubwo banyuzagamo bakabakorera ibikorwa bibahohotera.

Mu myiteguro ya nyuma rero, habura gato ngo urugendo rutangire, John Winthrop wari uyoboye iryo tsinda, yafashe umwanya arisobanurira imiterere y’urugendo ndetse n’icyo rugamije, ababwira ko nibagera iyo bagiye bagomba kuzashyira hamwe, bakabanira neza abaturanyi babo kandi bakababera intangarugero, kugira ngo ibikorwa byabo byiza nk’Abakirisitu bizamurikire ishyanga rishya bagiyemo, bityo rinabonereho ryakire Agakiza k’Imana.

Yifashishije amagambo yo mu Gitabo cya Matayo Igice cya Gatanu imirongo ya 15 na 16, yavuze ko imigirire yabo izatuma bamenyekana mu buryo runaka, bityo abasaba kubera abandi urumuri, ati “Tugomba kuba umudugudu wubatswe ku mpinga y’umusozi. Amaso y’abantu bose azakomeza kutureba”.

Aba bagabo bumviye umuyobozi wabo, kuko bageze muri Amerika, muri Leta yaje kwitwa Massachusetts, bahubatse umujyi w’agatangaza wa Boston, kugeza n’ubu uracyari mu mijyi ikomeye kurusha iyindi hariya muri Amerika.

Nyuma y’igihe kirekire ariko, uko aba bagabo bagendaga bapfa urusorongo, iby’amagambo ya Winthrop byaje kwibagirana, ndetse hashira imyaka irenga 200 nta muntu n’umwe uyakoresha mu ruhame, kugeza ubwo ahagana mu myaka ya za 1930, Perry Miller, wigishaga muri Kaminuza ya Harvard, yatangiye kugarura imvugo ya Winthrop, ndetse agashimangira ko ari yo musingi ukwiye kubakirwaho urufatiro rwa Leta Zunze Ubumwe za Amerika.

Nk’umuntu wari umuhanga kandi wumvikana cyane muri rubanda, ibitekerezo bya Miller bishingiye ku magambo ya Winthrop byatangiye gukwirakwira hose, bitera Abanyamerika ishema ndetse batangira gukwirakwiza ibyapa byanditsweho ayo magambo, bamwe bati “Amerika ni umudugudu wubatswe ku mpinga y’umusozi, umurikira amahanga”.

Uko iminsi yagendaga yicuma, n’ino mvugo ikwirakwira hose, yatangiye gukoreshwa mu buryo bwa politiki, ndetse bifata indi ntera ubwo Perezida John F. Kennedy yabaga uwa mbere wayikoresheje mu ruhame mu myaka ya za 1960. Ibintu byahinduye isura ku ngoma ya Perezida wa 40 wa Amerika, Ronald Reagan, wakoresheje iyi mvugo inshuro nyinshi ndetse akayihindura ikirango cy’ubuyobozi bwe mu myaka ya za 1980, dore ko byari bimaze kugaragara ko iyi mvugo ishobora gukoreshwa mu zindi nyungu za politiki, bitewe n’uburyo ibintu byari bihagaze muri icyo gihe.

Ku ngoma ya Reagan, Amerika yari ku musozo w’intambara y’Ubutita kandi iri kurushaho gutsinda Leta Zunze Ubumwe z’Abasoviyete [Yaje gucikamo ibice birimo n’u Burusiya] bari bahanganye. Bivugwa ko uyu muyobozi yakoreshaga iyi mvugo mu rwego rwo kumvikanisha ubuhangange bwa Amerika mu mahanga, ku buryo ihinduka igihugu gifite igitinyiro kandi cyubahwa na bose, na cyane ko Intambara y’Ubutita yari ishingiye ahanini ku rugamba rwo gukwirakwiza icengezamatwara rya politiki ya buri gihugu mu byari bihanganye.

Usibye gukoresha iyi mvugo, Perezida Reagan yageze ubwo anayivugurura, avuga ko Amerika atari gusa ‘Umudugudu wubatse ku mpinga y’umusozi umurikira amahanga’, ahubwo ko ari “Umudugudu ’urabagirana’, wubatse ku mpinga y’umusozi ukamurikira amahanga”.

Nk’aho ibyo bidahagije, ubwo Perezida Reagan yasezeraga ku gihugu nyuma yo kuyobora manda ze ebyiri, yasoje mu 1989, yongeye gukoresha iyi mvugo ndetse anayubakiraho Ijambo rya nyuma yagejeje ku Banyamerika nka Perezida, ariko noneho ajya kure, asobanura imiterere y’uko yumva uwo mudugudu ugomba kuba wubatse.

Icyo gihe yagize ati “Mu ntekerezo zanjye, ni umudugudu munini kandi uteye ishema, wubatswe n’ibitare bikomeye kurusha inyanja n’imihengeri, wasizwe n’Imana kandi wuzuyemo abantu b’amoko yose, babanye mu mahoro n’ubwubahane. Ni umudugudu wuzuye ibyambu bikorerwaho ubucuruzi ndetse n’udushya duhangwa buri munsi. Uyu mudugudu kandi ufite inkuta ziwukikije, inkuta zifite imiryango migari ihora ifunguriwe buri wese ufite ubushake n’umutima bwo kuwinjiramo.”

Kuva icyo gihe, kubera uburyo abayobozi bakuru b’igihugu bakoreshaga cyane imvugo ya Winthrop, byatumye yamamara cyane iba ikimenyabose, igakoreshwa mu gusobanura ubuhangange bwa Amerika na cyane ko ari cyo gihugu cyari kiyoboye ibindi mu ngeri nyinshi zirimo ubukungu, igisirikare, ikoranabuhanga n’ibindi byinshi biranga igihugu gikomeye.

Iyi mvugo yakomeje kubahwa n’Abanyamerika n’abayobozi babo kugeza ejo bundi mu mwaka wa 2014 ubwo hadukaga serwakira muri iyi nkuru tuza kwita “Donald Trump”. Uyu mugabo w’umunyemari yari asanzwe azwi cyane muri Amerika, ariko ahagana mu mwaka wa 2014, ubwo yinjiraga byeruye muri politiki ndetse agashimangira ko agiye kwiyamamariza kuyobora Amerika, Trump yatunguranye avuga ko burya iby’imvugo ya Winthrop na Reagan igaruka ku buhangange bwa Amerika idashimisha bose, ati “Ntekereza ko ari imvugo mbi mu buryo bumwe, kuko nigeze kumva Perezida Putin agira ati ‘batekereza ko ari ibiki, bituma bavuga ko bihariye?’”

Abumvise amagambo ya Trump babanje kumukwena, byakubitiraho indi myitwarire yari asanzwe azwiho kuva mu mabyiruka ye, bigatuma abenshi batekereza ko ibyo uyu mugabo yavugaga byo kuyobora Amerika ntaho bitaniye na bimwe byo kwikirigita ugaseka, na cyane ko Trump nawe atari yarigeze ahisha ko adashishikajwe no kubaha zimwe mu ndangagaciro ziranga abayobozi ba Amerika.

Umwaka warashyize uragera, maze mu buryo bwatunguye benshi, barimo na ba bandi b’abahanga mu gukekeranya ibishobora kuzabaho mu matora, Perezida Trump yatorewe kuyobora Amerika, ahigira kongera kuyisubiza ubuhangange yahoranye, nk’aho koko yari yarabutakaje, ndetse avuga ko azakoresha intego yo kugira Amerika nyambere mu byemezo byose azafata nka Perezida, muri gahunda yamenyekanye cyane nka ’America First’.

Ashagawe n'umuryango we, Trump yarahiriye kuyobora Amerika ku wa 20 Mutarama 2017. Politiki ze, zirimo 'America First', zahinduye uko Isi yafataga Amerika

Intangiriro y’irindimuka

Gutorwa kwa Perezida Trump kwabaye ikimenyetso cya mbere cyakanze amahanga, kuko nk’uko yanabigenje, uyu mugabo yiyamamaza yaciye amarenga ko Amerika izahindura imikoranire yayo n’Isi, igashyira imbaraga mu kurengera inyungu zayo bwite, kabone n’ubwo byabangamira inyungu z’ibindi bihugu, birimo n’iby’inshuti magara n’icyo gihugu.

Uku gutorwa kwa Trump kandi kwatanze ubundi butumwa, bwerekana ko Abanyamerika bashobora kuba bararambiwe uburyo bw’imiyoborere bari bamaze imyaka amagana babayemo, bushobora kuba butari bugihaza ibyifuzo byabo, na cyane ko amwe mu masezerano Trump yatanze yatumye atsinda amatora, arimo kongera imirimo, kugabanya impunzi zemererwa kwinjira mu gihugu, kubaka urukuta hagati y’Amerika na Mexique ndetse no kugabanya ibyo Amerika itakaza ku ruhando mpuzamahanga, birimo amafaranga ikoresha mu kurinda umutekano w’ibindi bihugu cyangwa ayo ikoresha mu gushyigikira ibigo mpuzamahanga bigirira akamaro Isi muri rusange.

Hatitawe ku birego byaregwaga Trump mbere yo kuba Perezida ndetse n’intego azashingiraho politiki ye zidasanzwe, Abanyamerika baramuyobotse baramutora, biba ikimenyetso simuziga cy’uko ubuzima Abanyamerika bifuza ntaho bugihuriye n’ibyahozeho, birimo n’uburyo igihugu cyabo cyari nyambere mu gushyigikira no gushyiraho imibanire mpuzamahanga.

Akigera ku butegetsi, Trump ntiyatengushye abamutoye kuko intego yari yarihaye yagiye azishyira mu bikorwa imwe kuri imwe. Yatangiye avana Amerika mu masezerano mpuzamahanga atandukanye, arimo ayo kurwanya ihindagurika ry’ikirere Amerika yari yarasinye muri 2015. Uyu mugabo kandi yavanye Amerika mu masezerano y’ubucuruzi atandukanye ndetse anakangisha Abanyaburayi ko ashobora kuzahavana ibirindiro by’ingabo ze ziri kuri uwo Mugabane.

Bwa nyuma yenda kurangiza manda ye, Trump yatunguye Isi yose avuga ko avanye Amerika mu bihugu bigize Ishami ry’Umuryango w’Abibumbye ryita ku Buzima (OMS), aho yarishinjaga gukorera mu kwaha k’u Bushinwa.

Ni ibikorwa byatunguye Isi cyane kuko Amerika yavuye muri OMS rwagati mu cyorezo cya Coronavirus cyari kimaze kugera hafi ya hose ku Isi, kandi cyarasegeshe ubukungu n’imibereho y’Isi muri rusange. Mu bihe nk’ibi bikomeye, ibihugu byinshi ku Isi byari bitegeye amaboko Amerika n’ibindi bihugu bikize, kugira ngo bishake igisubizo kirambye kuri iki cyorezo, binyuze mu ikorwa ry’imiti n’inkingo zakirandura. Impamvu ni uko ibyo bihugu bikize ari na byo nyine bifite ubuhanga n’ubukungu bwatuma bikora iyo miti n’inkingo, bityo muri ibi bihe, amaso yacu twese abasigaye ni bo yari arangamiyeho ngo badutabare kandi vuba na bwangu.

Hari abavuga ko iki cyorezo cyari andi mahirwe igihugu nka Amerika kibonye yo kongera kwisubiza mu mwanya mwiza wo kwereka Isi ko ari igihugu cyakwizerwa, na cyane ko isura yacyo mu ruhando mpuzamahanga yari imaze iminsi igeramiwe. Ibi ariko ntaho bihuriye na politiki ya ’America First’, ya Trump, bityo ntibyari ngombwa cyane kuri we.

Iyi myitwarire y’ingoma ya Trump ariko nayo ntiyari kubura ingaruka, kuko yatangiye gutuma ibindi bihugu bitera Amerika icyizere ku rwego rwo hejuru. Nka raporo ngarukamwaka yitwa “Best Countries” yo mu 2020 igaragaza uko ibihugu bigirirwa icyizere ku Isi yerekanye ko icyizere Amerika igirirwa ku ruhando mpuzamahanga cyagabanutseho 50% kuva Trump yagera ku butegetsi.

Ibikorwa bya Trump byatumye ibihugu byahoze ari inshuti na Amerika biyitera icyizere, bitangira kwiga imikorere idashingiye kuri Amerika

Amatora y’igisebo

Ha mbere aha mu bihe bya Perezida Reagan n’abamukurikiye, ubwo Amerika yari igihugu gihatse ibindi mu ngeri nyinshi, mbega koko ari nka wa Mudugudu urabagirana ku mpinga y’umusozi, buri gihe yaharaniraga gutegeka abandi kubaho bakurikije amahame ya demokarasi.

Iyi demokarasi ubusanzwe yatangijwe n’Abagiriki, ariko yabaye ishema ry’Abanyamerika ku rwego rukomeye ku buryo iki gihugu cyatangije intambara nyinshi hirya no hino ku Isi kandi byose bigakorwa mu rwego rwo kurengera amahame ya demokarasi, cyangwa gufasha abenegihugu kuyashyira mu bikorwa.

Mu gisobanuro cyayo kizwi henshi, demokarasi isobanurwa nk’ubutegetsi bw’abaturage, bushyirwaho n’abaturage kandi bugakorera abaturage. Ibi kugira ngo bigerweho, demokarasi iteganya ko bica mu nzira y’amatora.

Amerika ntiyigeze iterwa ipfunwe no kwigisha abandi ubu buryo bw’imibereho, kuko yo ubwayo ari igihugu kimaze imyaka myinshi kibayeho muri ubu buryo. Ejo bundi ku wa 30 Mata uyu mwaka, iki gihugu kizizihiza imyaka 232 Perezida George Washington wayoboye Amerika bwa mbere amaze arahiriye izo nshingano, igikorwa yakoze mu 1789.

Nyuma ye, abandi bayobozi 44 barimo na Donald Trump bateye ikirenge mu cye barahirira kuyobora Amerika, ndetse buri wese akayobora manda zitarenze ebyiri kandi zimara imyaka ine gusa. Perezida Franklin Delano Roosevelt ni we wenyine wayoboye manda zirenze ebyiri, kandi nabwo bikorwa mu bihe bidasanzwe by’intambara.

Nyuma y’iyi myaka yose rero, nta wigize atekereza ko Amerika yabaye urugero rwiza rwa demokarasi ya nyayo Isi ikwiye kubakiraho, yahinduka isibaniro ryo guhonyoro amahame ayigenga, kandi bigakorwa neza neza nk’uko bijya bigenda mu bindi bihugu Amerika ikunze gufatira ibihano ibiziza kutubahiriza amahame ya demokarasi.

Bijya gutangira, Perezida Donald Trump yatsinzwe na Joe Biden mu matora ya Perezida wa Repubulika, gusa uyu mugabo wari wiyizeye cyane yatunguwe no gutsindwa, ndetse anerura ko atemera ibyavuye mu matora yatsinzwemo, akavuga ko habayeho kwibwa kw’amajwi.

Muri kwa kubahiriza amahame ya demokarasi, Trump n’abambari be bagannye inkiko, maze batanga ibirego 60 byose mu Nkiko Nkuru za Leta zitandukanye aho muri Amerika, bizera ko hari icyakorwa n’abacamanza kugira ngo Trump abone itsinzi avuga ko yahugujwe.

Izi nkiko zose zamubereye ibamba, buri kirego cyose mu byatanzwe n’abanyamategeko b’inararibonye ba Trump giterwa utwatsi, kuko inkiko zavugaga ko n’ubwo Trump avuga ko yatsinzwe amatora, atigeze agaragaza ibimenyetso simusiga bigaragaza ko yibwe amajwi koko.

Muri ya mahame ya demokarasi Amerika yahoze yigisha abandi, ubundi Trump yakabaye yaremeye imyanzuro y’inkiko, maze akareka Joe Biden watsinze amatora akayobora, kuko nyine ari ko bigenwa n’amahame ya demokarasi.

Ibi ariko si ko byagenze, kuko Trump yakoresheje ubushobozi bwe nk’Umukuru w’Igihugu asaba abaturage kwiroha mu mihanda bakamagana amatora, ndetse na bo ubwabo bakanga kwemera ibyayavuyemo.

Ibi ntibyari bihagije kuri Trump kuko yigiriye inama yo gusaba Umunyamabanga wa Leta ya Georgia, Brad Ruffensperger, kumurebera uko yabigenza akamushakira amajwi 11 780 Trump yaburaga kugira ngo atsindire iyo leta.

Ruffensperger yahakaniye Trump, amubwira ko “bizeye ukuri kw’amajwi babaruye”, dore ko bitewe n’uburyo Trump n’itsinda rye bakomeje kuvuga ko hari uburiganya bw’amajwi bwabayeho muri Leta ya Georgia, byatumye amajwi yo muri iyo leta abarwa inshuro eshatu zose, kandi buri nshuro hakemezwa ko Biden ari we watsinze amatora.

Nk’aho ibyo bidahagije, Trump yigiriye inama ya nyuma yo guhagarika umugambi w’Inteko Ishinga Amategeko y’Amerika yagombaga kwemeza Joe Biden nka Perezida w’icyo gihugu mu buryo bwemewe n’amategeko.

Trump yabanje kwiyambaza Mike Pence, Visi Perezida wa Amerika ndetse akaba ari nawe wagombaga kwemeza Biden, kugira ngo aburizemo ibyo bikorwa. Pence yaramuhakaniye, amubwira ko adafite ubushobozi bwo kwanga kwemeza ibyavuye mu matora y’abaturage ba Amerika.

Bwa nyuma noneho, habura igihe gito ngo Inteko Ishinga Amategeko iterane kugira ngo yemeze Biden, Trump yahamagariye abamushyigikiye kujya ku Ngoro y’iyo Nteko bakigaragambya, kugira ngo barebe ko baburizamo ibyo bikorwa.

Aba baturage koko barahasesekaye, ndetse baza ku bwinshi bafite amahane akomeye, binjira mu Ngoro y’Inteko Ishinga Amategeko ya Amerika ku mbaraga ndetse bateza akaduruvayo gakomeye kaje kugwamo abantu batanu, barimo umugore warashwe na polisi muri ibyo bikorwa byo kwigaragambya.

Ni ubwa mbere byari bibayeho ko abaturage ba Amerika ubwabo batera Ingoro yabo Ishinga Amategeko bamagana ibyavuye mu matora, kandi bakabyamagana byaremejwe n’inkiko nyuma yo kuregerwa inshuro 60 zose. Hari hashize imyaka igera kuri 208 Ingoro Ishinga Amategeko ya Amerika itavogerwa, kuko byaherukaga mu mwaka wa 1812, kandi nabwo bikaba byarakozwe n’Abongereza bari bamaze igihe gito batakaje Amerika nyuma y’ubwigenge bwayo.

Igitangaje kurusha ibindi, ni uko ibi bikorwa byo kwanga ibyavuye mu matora n’imyigaragambyo y’akaduruvayo yabikurikiye, byashyigikiwe na Perezida wa Amerika ubwe, neza neza nk’uko bijya bigenda mu bindi bihugu Amerika ishozamo intambara igiye kwigisha amahame ya demokarasi.

Imyigaragambyo ikomeye iherutse kubera ku Ngoro Ishinga Amategeko y'Amerika yaguyemo abantu batanu kandi yahamagajwe na Perezida Trump ubwe
Imbere mu Ngoro y'Inteko Ishinga Amategeko ya Amerika, abashinzwe umutekano bakuyemo intwaro zabo bahanganye n'abigaragambya

Byari kugenda gute iyo biba ahandi hatari muri Amerika?

Tekereza icyo Amerika yari gukora iyo haza kugira igihugu kinyura mu bihe iri kunyaramo magingo aya. Ibaze nk’iyo mu gihugu runaka gikennye, Perezida aza kwanga ibyavuye mu matora, agashishikariza abaturage kuyamagana, abasenateri n’abadepite bamwe bakamushyigikira, ndetse akagera ubwo asaba gushakirwa amajwi yatumye atsindwa kugira ngo atsinde muri leta runaka, kandi byose bigakorwa rwagati mu cyorezo gihitana abarenga 3 000 ku munsi.

Ku bwa Stephen Collinson, umunyamakuru wa CNN mu Biro bya Perezida wa Amerika, yavuze ko iyo ibintu nk’ibi biza kubaho mu bindi bihugu, “inzego za Amerika zari busohore amatangazo yamagana ibi bikorwa, bagasaba ko amahame ya demokarasi n’imiyoborere myiza yubahirizwa. Perezida nawe yari kwamagana ibyo bikorwa nko mu biganiro n’abanyamakuru, ndetse abadepite bagatangira gushaka inzira ziganisha ku gufatira ibihano icyo gihugu”.

Uyu munyamakuru yongeyeho ko abo badepite “badashobora gufata ibyo bihano, kuko ikibazo kiri iwabo, aho cyazambije demokarasi ikuze kuruta izindi, ndetse kigahindanya imvugo ya Amerika yo kuba intangarugero mu iyubahirizwa ry’amahame ya demokarasi no kuvugira ukwishyira ukizana ku Isi hose”.

Nyuma yo kubona uburyo Amerika nayo ishobora kwica amahame ya demokarasi yirirwa yigisha, ibihugu byafatiwe ibihano bizira kutubahiza ayo mahame byafashe iya mbere mu gusaba icyo gihugu kubikuriraho ibihano, kuko bimaze kugaragara ko iki gihugu kitakira wa Mudugudu urabagirana, ugomba kumurikira abatuye Isi ukabereka uko demokarasi ya nyayo ikorwa.

Icyabanjirije ibindi ni Zimbabwe. Iki gihugu ni kimwe mu byafatiwe ibihano na Amerika kandi “kizira kutubahiriza amahame ya demokarasi”. Perezida wa Zimbabwe, Emmerson Mnangagwa, yasabye ko ibihano igihugu cye cyafatiwe bigomba gukurwaho, kuko na Amerika ibifatira abandi itubahiriza amahame ya demokarasi, kandi ari cyo ibashinja.

Yagize ati “Umwaka ushize Trump yongereye ibihano by’ubukungu byafatiwe Zimbabwe, avuga ko bijyanye n’ibibazo bya demokarasi ya Zimbabwe. Ibyabaye ejo hashize (ku munsi w’imyigaragambyo yo ku wa 6 Mutarama) byerekanye ko Amerika idafite uburenganzira bwo guhana ikindi gihugu yitwaje kwimakaza demokarasi. Ibi bihano bigomba kurangira.”

Perezida wa Zimbabwe, Emmerson Mnangagwa, yasabye Amerika gukuraho ibihano yafatiye Zimbabwe iyishinja kwica amahame ya demokarasi

Umuhezo; indunduro y’ubuhangange bwa Amerika?

Ibikorwa bya Trump byo gushyira imbere inyungu za Amerika rimwe na rimwe hakirengagizwa iz’ibindi bihugu by’inshuti zayo, ndetse hakiyongeraho no gutakarizwa icyizere ku rwego mpuzamahanga, byatumye ibihugu n’imiryango itandukanye batangira gushaka uburyo babaho badashingiye kuri Amerika.

Ibi biri kugaragarira cyane mu bucuruzi, aho ibihugu biri gukorana amasezerano manini y’ubucuruzi bititaye ku buryo Amerika yifuza ko ibintu bikorwamo.

Amwe muri ayo masezerano akomeye aherutse gusinywa harimo ayasinwe hagati y’u Bushinwa n’Umuryango w’Ubumwe bw’u Burayi (EU).

Aya masezerano azaha inganda z’u Burayi amahirwe yo kwinjira ku isoko ry’u Bushinwa, bityo zirusheho kuhakura agatubutse dore ko u Bushinwa ari isoko rigari kandi rifite ubukungu bwihagazeho.

Icyatangaje abantu muri iri sinywa ry’amasezerano, ni uko Jake Sullivan uzaba ari Umujyanama wa Perezida Biden yari yabanje kuburira u Burayi, akabubwira ko bwagategereje ingoma ya Biden izatangira ku wa 20 Mutarama, kugira ngo babanze bemeranye neza iby’ayo masezerano.

U Burayi bwari busanzwe ari umufatanyabikorwa w’imena w’Amerika bwateye utwatsi icyo cyifuzo, bukomeza gahunda yabwo yo gusinya amasezerano y’ubucuruzi n’u Bushinwa bwari bumaze no guca kuri Amerika nk’igihugu cya mbere mu gukorana ubucuruzi bwinshi n’u Burayi.

Nyuma yo kubona ko u Burayi bwanze kumvira umuburo we, Sullivan yavuze ko “ibi ari ingaruko z’imyaka ine [y’ubuyobozi bwa Trump] yo kwirengagiza ibihugu by’inshuti zacu”.

Usibye Amasezerano y’u Bushinwa n’u Burayi, iki gihugu giherutse no kugirana amasezerano y’ubucuruzi n’ibindi bihugu 15 byo ku Mugabane wa Asia na Pacifique azwi nka RCEP. Ni amasezerano arimo ibihugu nk’u Buyapani, Australie ndetse na Koreya y’Epfo, azatuma ibi bihugu birushaho gukorana ubucuruzi mu buryo bworoshye.

Kuba u Bushinwa bwarabashije gusinyana amasezerano y’ubucuruzi n’ibi bihugu bisanzwe ari inshuti z’akadasohoka za Amerika, bisobanuye ko mu gihe Amerika izarushaho kongera umurego wo guhangana n’u Bushinwa, nk’uko n’ubundi yabitangiye, izagorwa no kubona ubufasha busesuye buturutse muri ibi bihugu byahoze ari inshuti, kuko byamaze kwinjira mu masezerano y’ubucuruzi n’u Bushinwa kandi bifitanye inyungu bihuriyeho, ku buryo bitazapfa kuzisenya uko byiboneye kubera igitutu cya Amerika.

Aha rero ni ho bamwe bahera bavuga ko ubutegetsi bwa Biden buzagorwa cyane no kumvisha ibihugu byahoze ari inshuti na Amerika gufatanyiriza hamwe nayo mu guhangana n’u Bushinwa, dore ko byamaze kwemezwa ko nta gihindutse, ubukungu bw’iki gihugu buzaba bwaciye ku bw’Amerika mu mwaka wa 2028.

Amerika iramutse ikomeje kuguma muri uyu muhezo, ntibone ubufasha bw’ibihugu byahoze ari inshuti ariko byamaze kwinjira mu mikoranire n’u Bushinwa, byayigora cyane, hafi yo kudashoboka, guhagarika umuvuduko uri hejuru w’ubukungu bw’u Bushinwa.

Muri rusange rero, kuba Amerika ikomeje gutererwa icyizere n’amahanga, ikambara icyasha cyo kunyuranya n’amahame ya demokarasi yahoze yigisha, ndetse ikaba ikomeje guhezwa mu bikorwa birimo ubucuruzi kandi ari igice kinini kigize ubuhangange bwayo, nta kabuza ko bituma itakigaragara nka wa ‘Mudugudu urabagirana’ Perezida Reagan yavuze, kuko bisa nk’aho umwihariko wayo watokombeye, ikaba isigaye imeze nk’abandi twese.

Ku rundi ruhande, irindimuka ry’Amerika riri kubusanya n’izamuka ry’u Bushinwa, riri kugaragarira cyane muri dipolomasi y’icyo gihugu imaze kugera henshi ku Isi. Mu gihe rero ibihugu bitari iby’Afurika gusa bitangiye kurushaho kurangamira ku Bushinwa, binyuze mu bucuruzi n’izindi nzego, bituma benshi bavuga ko iki gihugu kiri kwishyira mu mwanya mwiza wo kuzahigika Amerika nk’igihugu cya mbere mu bukungu, ibi bikazajyana no kugira ijambo rikomeye kurusha abandi ku Isi. Ibi ni byo Kishore Mahbubani, umwanditsi w’Umunya-Singapore aherutse kugarukaho mu gitabo cyaciye ibintu ku Isi yise “Has China Won?”

Perezida w'u Bushinwa, Xi Jinping, aherutse guhurira mu nama n'abayobozi b'Umugabane w'u Burayi mu kwemeza amasezerano y'ubucuruzi hagati y'impande zombi, nyuma y'uko u Burayi buteye utwatsi icyifuzo cya Amerika cyo kuba itegereje gato mbere yo gusinya ayo masezerano
U Bushinwa buherutse gusinya amasezerano y'ubucuruzi n'ibihugu 15 byo muri Asia na Pacifique, birimo ibihugu nk'u Buyapani bisanzwe ari inshuti za Amerika
U Bushinwa kandi busanzwe bufite ijambo rikomeye muri Afurika, aho ari bwo mufatanyabikorwa wa mbere w'uyu mugabane mu bijyanye n'ubucuruzi
U Bushinwa busanganye imikoranire ya dipolomasi yihariye n'ibindi bihugu birimo Brazil, Afurika y'Epfo, u Burusiya n'u Buhinde

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .