Umwuka ukomeje kuba mubi muri icyo gice cy’Isi nyuma y’iyicwa ry’Umuyobozi wa Hamas, Ismail Haniyeh n’Umuyobozi ukomeye mu mutwe wa Hezbollah, Fuad Shukr.

Umuyobozi w’Ikirenga wa Iran, Ayatollah Khamenei, yavuze ko bagomba guhana bikomeye Israel kubera urupfu rwa Haniyeh.

Haniyeh yiciwe mu Mujyi wa Tehran ku wa Gatatu, gusa urupfu rwe rwashinjwe Israel nubwo yo ntacyo yigeze ibivugaho.

Urupfu rwa Haniyeh wari ufite imyaka 62 rwatangajwe nyuma y’amasaha make Israel itangaje ko yishe umwe mu bayobozi bakuru mu mutwe wa Hezbollah, Fuad Shukr.

Amerika yatangaje ko kuri ubu hagiye koherezwa ibikoresho bishya mu Burasirazuba bwo Hagati bigamije kongera ubwirinzi no kongera ubufasha ku bw’umutekano wa Israel.

Biteganyijwe ko mu byoherezwayo harimo ibisasu ndetse n’ibindi bishobora kwifashishwa mu gushwanyaguza ibindi bisasu byakoherezwa n’umwanzi.

Minisitiri w’Intebe wa Israel, Benjamini Netanyahu, yatangaje ko itsinda ry’Abanya-Israel bazajya mu Misiri mu minsi iri imbere mu biganiro bigamije guhagarika imirwano.

Amerika igiye kuhereza amato y'intambara mu Burasirazuba bwo Hagati