00:00:00 IGIHE NETWORK KN KINYARWANDA EN ENGLISH FR FRANCAIS

Amerika igiye guha Ukraine ubwirinzi bukomeye bwo mu kirere bwa Patriot

Yanditswe na IGIHE
Kuya 21 Ukuboza 2022 saa 09:17
Yasuwe :

Guverinoma ya Leta zunze ubumwe za Amerika yatangaje ko igihe guha Ukraine intwaro ikumira ibitero byo mu kirere izwi nka Patriot, inkunga yatangajwe mu gihe perezida wa Ukraine yiteguraga kugera i Washington.

Ni inkunga muri rusange ingana na miliyari $1.85, igamije gufasha Ukraine mu ntambara n’u Burusiya, yatangiye muri Gashyantare.

Iyo nkunga irimo miliyari $1 mu ntwaro n’ibindi bikoresho byavanywe mu bubiko bwa minisiteri y’ingabo ya Amerika birimo na Patriot, na miliyoni $850 azanyuzwa muri gahunda igamije kunganira Ukraine mu bijyanye n’umutekano, Ukraine Security Assistance Initiative.

Minisitiri w’Ububanyi n’amahanga wa Amerika, Antony Blinken, kuri uyu wa Gatatu tariki 21 Ukuboza, yatangaje ati "inkunga y’uyu munsi ikubiyemo ku nshuro ya mbere ubwirinzi bwo mu kirere bwa Patriot, bushobora guhanura missile zirasa ibintu biri ku butaka cyangwa mu nyanja, missiles ziraswa mu ntera iringaniye n’indege zigendera ku butumburuke bwisumbuye ugereranyije n’izashoboraga kugerwaho n’ubwirinzi twari tumaze gutanga."

Biteganywa ko igice cy’ayo mafaranga kizakoreshwa mu gutera inkuga itumanaho ry’icyogajuru, harimo n’iritangwa na SpaceX Starlink y’umuherwe Elon Musk.

Mu itangazo yasohoye, Blinken yakomeje ati "Mu minsi magana atatu ishize, Kremlin yagerageje ariko inanirwa guhanagura Ukraine ku ikarita. Muri iki gihe u Burusiya burimo gushaka gukoresha ibihe by’ubukonje nk’intwaro yo guhindura ubutita no kwicisha inzara imiryango w’abasivili b’abanya Ukraine no kubahatira kuva mu ngo zabo."

Yakomeje ati "Bityo, Perezida Biden uyu munsi aratangaza ko Leta zunze ubumwe za Amerika zigiye guha Ukraine ubushobozi bushya bw’inyongera bwo kuyifasha kwirwanaho ku bugome n’ubushotoranyi bw’u Burusiya."

Ubwirinzi bwa Patriot bukoreshwa n’ingabo za Amerika ndetse n’ibihugu bike bafatanya.

Mbere bwakozwe nk’intwaro ihanura indege z’intambara, ariko buza kongererwa ingufu ku buryo bufasha mu gusenya za missile zizwi nka ballistic missiles.

Ni intwaro iba ifite ibice bitatu birimo radar ihambaye ifasha mu kureba ibiri kure, igice cyakira amakuru kikamenya igisasu kije n’umuvuduko wacyo ndetse kikagenzurirwamo ibikorwa byose, n’igice cyohereza ibisasu bisenyera mu kirere ibyari byoherejwe.

Patriot ifite ubushobozi bwo kurasa muri kilometero 32 na 130, buryo ishobora gufasha mu kurinda umujyi nka Kyiv.

Biteganywa ko abasirikare ba Ukraine bazabanza kwiga uko bayikoresha.

Ubwo itambara yatangiraga Amerika yabanje gushidikanya kohereza ubu buryo muri Ukraine.

Icyakora yahaye Ukraine intwaro nyishi zirimo imbunda zisaga 1,600 zirasa missiles zihanura indege, intwaro umunani zifasha mu gukumira ibitero bya missiles zituruka mu kirere zo mu bwoko bwa NASAMS n’intwaro zirasa missile nyinshi zuigikanya, za HIMARS.

Ni ikunga yiyongeraga ku modoka za gisirikare, n’imbunda nini za Javelin zirasa ibifaru, za kajugujugu, intwaro za howitzers na drones, zakomeje kugaragaza ko zidahagije, bijyanye n’ubushobozi bw’u Burusiya mu bijyanye n’itwaro.

Patriot ifasha cyane mu gukumira ibitero bya missile

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .