00:00:00 IGIHE NETWORK KN KINYARWANDA EN ENGLISH FR FRANCAIS

Amatora mu Bufaransa: Imigabo n’imigambi ya Macron na Le Pen ku ngingo zimwe na zimwe

Yanditswe na Kanamugire Emmanuel
Kuya 23 April 2022 saa 01:03
Yasuwe :

Hasigaye amasaha abarirwa ku ntoki ngo amatora ya Perezida w’u Bufaransa agere kuko ateganyijwe kuri uyu wa 24 Mata 2022; hagati ya Emmanuel Macron na Marine Le Pen umwe muri bo agomba kwegukana intsinzi.

Macron yagize amajwi 27,8% mu cyiciro cya mbere mu gihe Le Pen yagize 23,1%.

Ubushakashatsi bwakozwe n’ikigo Ipsos ku wa 18-20 Mata bwagaragaje ko Macron afite amahirwe menshi yo gutsinda ku majwi 56,5% mu gihe Le Pen ashobora kugira 43,5%.

Aba bakandida bombi bagaragaje ibyo bifuza kuzakora ku ruhande rwa buri wese mu gihe yaba atsinze amatora.

Emmanuel Macron

Nk’uko ikinyamakuru cyo mu Burusiya, TASS cyabigarutseho, mu byo Macron ateganya gukora harimo impinduka amagana aho gahunda y’ibikorwa bye izatwara agera kuri miliyari 50 z’amayero.

Yijeje ibirimo kuzamura pansiyo, guhanga akazi mu buryo bwuzuye [kuri ubu igipimo cy’ubushomeri kiri kuri 7,4%] no kunoza urwego rw’ubuvuzi.

Hari kurwanya icuruzwa ry’ibyobyabwenge no kutemeza ikoreshwa rya marijuana mu buryo bwemewe n’amategeko

Macron yiyemeje ko mu gihe yaba atowe, agera kuri miliyari 25 z’amayero azakoreshwa mu bushakashatsi mu by’uburezi na siyansi mu myaka 10 izakurikira itorwa rye kimwe no gutangiza ibigo by’ubushakashatsi mu nzego z’ingenzi.

Manda z’abadepite ntizizarenga eshatu ndetse yijeje ko azagabanya umubare w’abadepite n’abasenateri ho kimwe cya gatatu aho kuri ubu bose hamwe bagera kuri 925.

Mu kiganiro n’itangazamakuru, Macron yavuze ko manda y’imyaka itanu ya manda ya perezida ari ngufi ku gihugu nk’u Bufaransa dore ko nka mbere ya 2002 Perezida yatorerwaga manda y’imyaka irindwi.

Macron ateganya kongera ingengo y’imari igenewe igisirikare ikagera kuri miliyari 50 z’amayero bitarenze mu 2025; kuri uyu igizwe na 2% by’umutungo mbumbe w’igihugu, ni ukuvuga hafi miliyari 40,9 z’amayero buri mwaka.

Ku bijyanye na politiki y’igihugu ku mpunzi n’abimukira, Macron yavuze ko azarushaho kubikaza hashyirwaho amategeko agena iyirukanwa bwangu mu Bufaransa no ku banyamahanga bahamwe n’ibyaha byo kwica amategeko y’ituze rya rubanda.

Amategeko agenga ibyo kuba mu Bufaransa na yo agomba kuvugururwa kandi ababisaba bakaba bafite ubumenyi mu rurimi rw’Igifaransa.

Ku bijyanye n’ibyo azakora mu rwego rw’ingufu, Macron yakomoje ku mishinga y’ingufu zisubira, aho biteganyijwe ko hazubakwa inganda zitanga amashanyarazi akomoka ku mirasire y’izuba n’atangwa n’umuyaga zigera kuri 50 zitanga 40GW bitarenze mu 2050.

Azihatira ibyo guteza imbere ishoramari rizatuma u Bufaransa bwihaza ntibukomeze gutega amaso ibituruka mu mahanga hibandwa kuri porogaramu z’uburezi n’iz’imari ku bahinzi bakiri bato.

Macron anenga u Burusiya ku ntambara bwashoje kuri Ukraine muri Gashyantare 2022 ndetse yavuze ko afite ubushake bwo gutanga umusanzu ushoboka kugira ngo habeho ibiganiro hagati y’ibihugu byombi biri mu ntambara hirindwa ko yagera no mu bindi bice by’isi.

U Burayi ngo bukwiye kwirinda kwivanga mu ntambara kugira ngo bitaba intandaro ko kuba iyo ku rwego rw’isi ariko igitutu mu bya dipolomasi cyo ngo kigomba gukomeza gushyirwa ku Burusiya n’ibihano bwafatiwe bikagumaho.

Yemera ko intambara yo muri Ukraine yagize ingaruka kuri NATO.

Marine Le Pen

Ku ruhande rwa Marine Le Pen, intego ni ukunga Abafaransa kandi agakora iyo bwabaga iki gihugu kikisubiza ubuhangange cyahoranye.

Yavuze ko ibibazo by’imibereho myiza biri mu bimuraje ishinga aho azashora agera kuri miliyari 20 z’amayero mu bikorwa bishyigikira urwego rw’ubuzima, kurwanya indwara ahereye mu bana bato no kuzamura imishahara ku bakora mu rwego rw’ubuvuzi.

Yijeje ko azongera ingengo y’imari y’igisirikare ho 3% by’umutungo mbumbe, bihwanye na miliyari 55 z’amayero no gusaba ko hashyirwaho itegeko ryongera ingengo y’imari ho miliyari 1,5 y’amayero buri mwaka.

Yagarutse na none ku bijyanye no kugarura ubwigenge bw’igihugu, kurwanya ubuhezanguni bw’idini ya Islam no kugarura umutekano kuri bose.

Le Pen ashyigikiye ingufu za nucléaire nk’izihanzwe amaso mu Burayi. Yavuze ko bikwiye guhagarika ibyo gutunganya ingufu zituruka ku muyaga ndetse ko ibikorwaremezo bitanga izi ngufu bikwiye gusenywa buhoro buhoro hagashorwa imari mu za nucléaire, izikomoka ku mazi na hydrogen.

Mu gihe yaba atowe, Le Pen yavuze ko azakoresha kamarampaka ’referendum’ ivugurura itegeko nshinga kandi amategeko agenga igihugu akagira uburemere kurenza agenga umuryango w’Ubumwe bw’u Burayi (EU).

Mu bindi azashyiramo ingufu harimo kugabanya umusanzu u Bufaransa butanga muri EU ukava kuri miliyari 8-9 z’amayero ukagera kuri miliyari eshanu.

Ashaka kandi gukura u Bufaransa muri NATO hirindwa ko igihugu cyakururirwa mu makimbirane mpuzamahanga.

Yemera ko Crimea ari intara y’u Burusiya kubera ko icyemezo cyafashwe binyuze muri referendum.

Yavuze ko ibihano EU yafatiye u Burusiya mu 2014 bitagize icyo bihungabanya kuri iki gihugu ahubwo byagize ingaruka ku bahinzi b’Abafaransa.

Agaruka ku mugambi wa EU wo gukumira ibikomoka kuri peteroli byo mu Burusiya, Le Pen yavuze ko ari igitekerezo kibi kigamije kwangiza u Burusiya.

Yavuze ko nta wahakana ko Ukraine iri mu duce tugira ingaruka ku iterambere ry’u Burusiya nk’uko Canada imeze kuri Amerika.

Yavuze ko azakomeza kugirana umubano n’u Burusiya mu bya dipolomasi, umuco n’ubukungu kubera ko kuri we u Burusiya ari igihugu cy’igihangange.

Le Pen ngo atekereza ko u Bufaransa bukwiye kwitandukanya na Amerika n’u Burusiya, ibizafasha mu kutabogama no kwitwara nk’umuhuza.

Yasabye ko Ukraine yakomeza guhabwa intwaro zo kwirwanaho ariko yamagana ko yahabwa intwaro zikaze.

Mu gihe intambara muri Ukraine izaba irangiye, Le Pen yavuze ko bikwiye ko NATO n’u Burusiya byazavugurura umubano kuko kuri we byafasha impande zombi n’u Bufaransa bukabyungukiramo.

Abakandida bombi baherutse guhurira mu kiganirompaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .