Alibaba yashyizeho agahigo icuruza miliyari $1.4 mu masegonda 96

Yanditswe na Twarabanye Venuste
Kuya 11 Ugushyingo 2019 saa 08:20
Yasuwe :
0 0

Ikigo cy’Abashinwa gikomeye mu bucuruzi bwo kuri internet, Alibaba, cyashyizeho agahigo ko gucuruza miliyari 10 z’ama-Yuan, ni agera kuri miliyari $ 1.43 mu munota umwe n’amasegonda 36 gusa.

Ni igikorwa cyo ku munsi umaze kumenyerwa mu Bushinwa nk’uw’abadafite abakunzi cyangwa Singles Day, wizihizwa buri mwaka tariki 11 Ugushyingo. Ufatwa nk’uwo ingaragu zigura ibintu binyuranye mu kwishimira ubuzima zibayeho.

Kuva saa sita z’ijoro ku isaha yo mu Bushinwa ibiciro byari byagabanyijwe ku bicuruzwa bimwe na bimwe nk’inkweto n’ibikoresho binyuranye by’ikoranabuhanga.

Imibare igaragaza ko uyu munsi wasojwe Alibaba icuruje miliyari 268.4 z’ama Yuan zingana na miliyari $38.3 z’ibicuruzwa, bihwanye n’izamuka rya 26% ugereranyije na miliyari zisaga $30.8 z’ibyacurujwe mu mwaka ushize.

Ibiro ntaramakuru Xinhua byatangaje ko mu isaha imwe n’iminota 26 n’amasegonda arindwi nyuma ya saa sita z’ijoro, ubucuruzi kuri TMall bwari ku ma-Yuan miliyari 120.7 igiciro gitandukanye cyane n’umunsi w’abadafite abakunzi wo mu 2016.

Nibura ubusabe bw’abakeneye ibicuruzwa bugera ku 544,000 bwatangwaga mu isegonda, bituma ruba urubuga rwa mbere ruhuriraho abantu benshi bahaha ku Isi nk’uko Alibaba yabitangaje.

Ayo mateka mashya yashimangiye gukomera k’ubukungu bw’u Bushinwa ndetse n’inyungu z’ikoranabuhanga mu bucuruzi mpuzamahanga, nk’uko byatangajwe na Zhou Mi, umushakashatsi mu kigo cy’Abashinwa cy’ubucuruzi mpuzamahanga n’ubufatanye mu by’ubukungu gishamikiye kuri Minisiteri y’ubucurzi y’u Bushinwa.

Ikompanyi ikomeye icuruza ibikoresho by’ikoranabuhanga ya Huawei yacuruje miliyoni imwe y’ama-Yuan mu isaha imwe n’iminota 19 kuri urwo rubuga rwa TMall, mu gihe iyitwa Perfect Diary icuruza amavuta yo kwisiga n’ibyo kurimba yacuruje miliyoni 100 z’ama-Yuan mu minota 13 gusa.

Ni umunsi utari uw’ikiruhuko mu Bushinwa ariko witabirwa cyane n’abantu batari mu rukundo. Watangiye kwizihizwa mu 1993 n’abanyeshuri bo muri kaminuza ya Nanjing, ubu ufatwa nk’igihe cyihariye cyo guhaha haba ku maguriro asanzwe n’akorera kuri Internet.

Alibaba iherutse kugirana amasezerano y’ubucuruzi n’u Rwanda ku rubuga eWTP (electronic World Trade Platform), byari agahebuzo kuko hinjijwe amafaranga menshi ugereranyije n’umwaka ushize.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza