00:00:00 IGIHE NETWORK KN KINYARWANDA EN ENGLISH FR FRANCAIS

Akumiro mu Nteko ya Amerika: Aba-Républicains bananiwe gutora Perezida w’Umutwe w’Abadepite

Yanditswe na IGIHE
Kuya 4 Mutarama 2023 saa 12:43
Yasuwe :

Mu bintu byaherukaga mu nteko ishinga amategeko ya Leta zunze ubumwe za Amerika hafi mu kinyejana gishize, aba-Républicains bafite ubwiganze mu mutwe w’abadepite bananiwe kumvikana ngo batore umuyobozi wawo, bisiga urujijo ku mukandida wabo Kevin McCarthy.

Kuri uyu wa Kabiri, imirimo y’inteko yasojwe batabashije gutora umuyobozi wayo, mu gihe ari yo ngingo ya mbere yari ku murongo w’ibyigwa.

Mu nshuro eshatu amatora yageragejwe, habuze umukandida n’umwe ugira ubwiganze mu majwi, biba ubwa mbere kuva mu 1923 bananiwe gutora umuyobozi mu nshuro zose bagerageje, maze imirimo y’inteko yimurirwa kuri uyu wa Gatatu.

Gutangira imirimo y’inteko byari byitezweho kuba umunsi w’umutsindo ku ba-Républicains, batsinze amatora mu Ugushyingo bakagira ubwigaze muri uyu mutwe ugizwe n’abadepite 435.

Bijyanye n’umubare w’abadepite, uwatowe yagombaga kugira amajwi 218 kuko ari yo arenze kimwe cya kabiri.

Ubusanzwe, uyu wakabaye umwitozo woroshye kuko aba-Républicains bafitemo imyanya 222, aba-Démocrates bakagira 212.

Inshuro ya gatatu ari na yo yasorejweho umunsi, McCarthy nk’umukandida w’ishyaka rifite ubwiganze mu nteko yabonye amajwi 203.

Byaje kugaragara ko hari aba-Républicains 19 bahejeje inguni, batamwumva. Bavuga ko batamwemera haba mu bijyanye n’umurongo w’ibitekerezo afite ndetse na kamere ye nk’umuntu.

Mu itora ryo ku nshuro ya mbere, bariya ba-Républicains bigumuye batoye Andy Biggs wo muri Arizona na Jim Jordan wo muri Ohio.

Ku nshuro ya kabiri hageragejwe itora, ba badepite 19 bose noneho bahurije amajwi kuri Jordan.

Ku nshuro ya gatatu ibintu byakomeje kugorana, kuko aba badepite nanone batanze Jim Jordan nk’umukandida, mu gihe ubwe yari amaze gusaba bagenzi be kujya inyuma ya McCarthy nk’umukandida ku mwanya wa perezida w’umutwe w’abadepite.

N’ubundi byarangiye batoye Jordan, ahubwo noneho abona amajwi 20, McCarthy abura ubwiganze atyo.

Ku ruhande rw’aba-Démocrates, bo bagumye hamwe inyuma y’umukandida wabo Hakeem Jeffries wo muri New York ari na we ubayoboye mu nteko, ariko akomeza gutsindwa amatora kubera ko badafite ubwiganze mu nteko.

Ku nshuro eshatu amatora yabaye, Hakeem Jeffries yagiraga amajwi 212, akanarusha McCarthy, ariko ntiyahabwaga amahirwe kubera ko abadepite babo ari bake mu nteko.

McCarthy yakomeje kutavugwaho rumwe na bamwe mu badepite bo mu ishyaka rye, akora amateka mabi atyo.

Byitezwe ko abadepite bagomba gukomeza gutora kugeza habonetse umukandida ubonye ubwiganze bukenewe.

Nubwo aba-Républicains ari bo benshi mu badepite, ikinyuranyo ku ba-Démocrates kiri hasi ku buryo byasabaga gukora ubukangurambaga n’icengezamatwara mu ishyaka, kugira ngo McCarthy atorwe. Icyakora ibyishimo byabo byabaye nko kubyina mbere y’umuziki.

Byatumye atangira kumvikana n’aba-Républicains batamwumva, ahubwo bamufata nk’umuntu ufite inyota yo gutegeka.

Amakuru avuga ko yageze n’aho abizeza ko nibamutora azahindura amategeko inteko igenderaho, akoroshya uburyo bwo gukuraho perezida wayo mu gihe yaba akora nabi.

Icyakora, umwe mu basesenguzi yagize ati "Kuba byonyine yari atangiye kumvikana n’aba-Républicains ubwabyo, byamugize umunyantege nke cyane ku buryo yihebye."

Abasesenguzi mu bya politiki batangiye gutekereza uko iyi rwaserera ishobora kurangira.

Kimwe mu bishoboka ni uko McCarthy ashobora gutorwa, ariko bikaza kumusiga afite intege nke cyane kubera gutereranwa na bagenzi be mu ishyaka. Ku rundi ruhande, mu gihe ubumwe bwabura, birashobora ko hanatorwa umu-Démocrate Jeffries, akaba ari we ugenzura inteko.

Biteganyijwe ko abadepite baza guhura bagatora ku nshuro ya kane kuri uyu wa Gatatu, nubwo kugeza ubu bitaramenyekana niba uru rukuta babasha kururenga.

Aba-republicains bananiwe gutora perezida w'umutwe w'abadepite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .