00:00:00 IGIHE NETWORK KN KINYARWANDA EN ENGLISH FR FRANCAIS

Uyu mwaka ukomeje guca agahigo mu bimukira bakomeje kwisuka mu Bwongereza

Yanditswe na Umwali Zhuri
Kuya 11 July 2022 saa 10:24
Yasuwe :

Guverinoma y’u Bwongereza yatangaje ko kuri uyu wa Gatandatu hari ubwato buto butwaye abimukira 146, bwagaragaye mu nzira y’amazi iri hagati y’u Bufaransa n’u Bwongereza izwi nka English Channel.

The Evening Standard yatangaje ko abenshi mu bimukira bambuka mu buryo bunyuranyije n’amategeko bagaragaye muri ubwo bwato, ari abana n’abagore.

Imibare y’abinjiye kuri uyu wa Gatandatu yatumye uyu mwaka uca agahigo ku Bwongereza mu kwinjirwamo n’abimukira benshi mu mezi arindwi ya mbere, ugereranyije n’indi myaka itatu ishize.

Minisiteri y’Ingabo y’u Bwongereza yatangaje ko kuva umwaka wa 2022 watangira, muri icyo gihugu hamaze kwinjira abimukira 13,270, nyamara mu gihe nk’icyo umwaka ushize hari hamaze kwinjira abimukira 6,659 na 2,459 mu 2020.

U Bwongereza ni kimwe mu bihugu by’i Burayi byugarijwe n’ubwinshi bw’abimukira binjira mu buryo bunyuranyije n’amategeko.

Kenshi bigirwamo uruhare n’abantu babigize ubucuruzi, aho abimukira babanza kubishyura amafaranga menshi ngo babageze mu bihugu by’i Burayi, bamwe bagacuruzwa.

Nibyo byatumye muri Mata uyu mwaka, Leta y’icyo gihugu igirana ubufatanye na Leta y’u Rwanda mu kwakira abimukira binjiye muri icyo gihugu binyuranye n’amategeko, mu rwego rwo kugenzura abajuje ibisabwa ku buryo bakwakirwa mu Bwongereza, abandi bagafashwa gutangira ubuzima mu Rwanda cyangwa se gusubira mu bihugu baturutsemo ku babishaka.

Guverinoma y’u Bwongereza, ku wa Gatanu ushize yijeje ko nubwo Minisitiri w’Intebe Boris Johnson agiye kwegura, bitazasubika iyo gahunda yo kohereza abimukira mu Rwanda, dore ko igitegerejwe ari umwanzuro w’urukiko nyuma y’uko bamwe mu bajuririye icyo cyemezo.

Abimukira 146 bagaragaye binjira mu Bwongereza mu buryo bunyuranyije n'amategeko mu mpera z'icyumweru gishize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .