00:00:00 IGIHE NETWORK KN KINYARWANDA EN ENGLISH FR FRANCAIS

Abatalibani barubiye kubera Igikomangoma Harry wigambye ko yishe abantu 25 muri Afghanistan

Yanditswe na IGIHE
Kuya 7 Mutarama 2023 saa 09:29
Yasuwe :

Guverinoma y’Abatalibani muri Afganistan yagaragaje ko yababajwe n’amagambo aherutse gutangazwa n’Igikomangoma cya Sussex mu Bwami bw’u Bwongereza, Harry, yemeza ko ubwo yari mu bikorwa bya gisirikare muri iki gihugu yishe abantu 25.

Binyuze mu gitabo Igikomangoma Harry ateganya gushyira hanze mu cyumweru gitaha, yahishuye ko ubwo yari muri ubu butumwa bwa gisirikare muri Afghanistan yishe abantu 25.

Muri iki gitabo yise ‘Spare’, Harry avuga ko ubwo yari umupilote muri Afghanistan yoherejwe mu butumwa bwa gisirikare butandatu ari naho yiciye abantu 25, gusa akemeza ko atari ibintu bimuteye ishema.

Yakomeje avuga ko impamvu aticuza iki gikorwa ari ibitero by’iterabwoba byibasiye Leta Zunze Ubumwe za Amerika ku wa 11 Nzeri mu 2001, bikagwamo inzirakarengane zitandukanye.

Aya magambo ya Harry yarakaje Abatalibani bayoboye Afghanistan, bavuga ko uyu mugabo akwiriye gukurikiranwaho ibyaha by’intambara kuko yishe abasivile.

Mu kiganiro Umuyobozi w’Abatalibani, Anas Haqqani yagiranye na Al Jazeera ku wa Gatanu yavuze ko isesengura bakoze basanze umunsi Harry avuga ko yagabyeho igitero nta murwanyi bapfushije, ibintu aheraho yemeza ko abishwe uwo munsi bari abasivile.

Ati “Twaragenzuye dusanga iminsi Igikomangoma Harry avuga ko yisheho abarwanyi 25, nta muntu n’umwe twigeze dupfusha. Biragaragara ko abishwe ari abasivile. Iyi nkuru ni imwe mu zigaragaza ibyaha by’intambara byakozwe n’igisirikare cy’Abanyaburiya na Amerika mu myaka 20 ishize.”

Yakomeje asaba ko Igikomangoma Harry akurikiranwaho ibyaha by’intambara cyane ko aniyemerera ko yishe abantu muri Afghanistan.

Kuva mu 2007 kugeza mu 2008, Igikomangoma Harry yoherejwe muri Afhganistan, aho yari afite inshingano zo kuyobora indege za gisirikare.

Kuva mu 2012 kugeza mu 2013 yaje kongera gusubizwa muri iki gihugu ariko noneho ahabwa inshingano zo gutwara kajugujugu ya gisirikare yo mu bwoko bwa ‘Apache’.

Muri icyo gihe cyose yari mu bikorwa bya gisirikare bibanza kunyuzwamo abantu bo mu muryango w’i Bwami mu Bwongereza bategurirwa inshingano zikomeye bashobora kuzahabwa zo kuyobora igihugu.

Umuyobozi w’Abatalibani, Anas Haqqani yasabye ko Igikomangoma Harry, akurikiranwaho ibyaha by’intambara yakoreye muri Afghanistan

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .