00:00:00 IGIHE NETWORK KN KINYARWANDA EN ENGLISH FR FRANCAIS

Abasirikare benshi ba Ukraine muri Mariupol bamanitse amaboko: Intambara irakomeje

Yanditswe na Rabbi Malo Umucunguzi
Kuya 19 May 2022 saa 06:45
Yasuwe :

Minisiteri y’Ingabo y’u Burusiya yatangaje ko abarwanyi basaga 770 bari bihishe mu ruganda rw’ibyuma rwa Azovstal mu mujyi wa Mariupol, bamanitse amabiko mu masaha 24 ashize.

Muri rusange abasirikare 1,730 bamaze gushyira intwaro hasi, nk’uko umuvugizi wa Minisiteri y’Ingabo y’u Burusiya, Major-General Igor Konashenkov yabitangaje kuri uyu wa Kane.

Yagize ati "Mu masaha 24 ashize, abarwanyi 771 babarizwaga mu mutwe wa Azov bari bihishe munsi y’uruganda rwa Azovstal bamanitse amaboko. Abarenga 1,730 barimo abasirikare 80 bakomeretse bamaze gushyira intwaro hasi guhera ku wa 16 Gicurasi."

Abasirikare ba Ukraine bakeneye kuvurwa bajyanwa mu mujyi wa Novoazovsk ugenzurwa n’ingabo z’u Burusiya, mu gace ka Donetsk.

Uru rugamba rumaze hafi amezi abiri rubera muri Mariupol rutsinzwe n’Ingabo z’u Burusiya, n’abarwanyi bigumuye bo mu gace ka Donetsk.

Abasirikare benshi ba Ukraine bari basigaye muri Mariupol bamanitse amaboko

Umujyi wa Mariupol muri rusange wafashwe ku wa 21 Mata, ariko hari abasirikare benshi bari bacyihishe mu ruganda rw’ibyuma rufite ubuvumo munsi, lu buryo kubakuramo byafashe igihe kinini.

Ibihugu by’u Burayi byananiwe kumvikana kuri peteroli iva mu Burusiya

Komiseri w’Ubumwe bw’u Burayi ushinzwe ubukungu, Paolo Gentiloni, yatangaje ko ibihugu bigize uyu muryango bimaze kumvikana ku byiciro bitanu by’ibihano bimaze gufatirwa u Burusiya, ariko icya gatandatu gikomeje kugorana.

Kuri uyu wa Gatatu yatangarije Rai News 24 TV ko nubwo bakomeje kunanirwa kumvikana ku bijyanye no gukumira gutumiza peteroli mu Burusiya, amaherezo bazagira aho bahuriza.

Yavuze ko nka Hongrie yabimburiye abandi kutemera uwo mwanzuro atari uko itawushaka, ahubwo ishingira ku miterere yayo n’izindi ngaruka yagira zo gukwirakwiza ibijyanye n’ingufu.

Kugeza ubu intumwa z’ibihugu muri EU ntizirabasha kumvika kuri icyo cyemezo, aho komisiyo ya EU yari yasabye ko ibihugu byahagarika gutumiza mu Burusiya peteroli idatunganyije nyuma y’amezi atandatu icyemezo gitangajwe, n’ibikomoka kuri peteroli byose guhera mu 2023.

Iyi komisiyo yavugaga ko nka Hongrie na Slovakia byo byakomeza kugura peteroli mu Burusiya kugera mu 2024.

U Burusiya bugiye gutangiza iperereza kuri Amerika

Minisiteri y’Ingabo ya Leta zunze ubumwe za Amerika yatangaje ko ingabo ziri mu bikorwa bya gisirikare muri Ukraine, zabonye ibimenyetso by’intwaro zakorwaga mu binyabuzima (military biological program).

Ni gahunda ngo yaterwaga inkunga na Leta zunze ubumwe za Amerika.

Ubuyobozi bwa Kyiv ngo byahise butangira gukora ibishoboka byose busibanganya ibimenyetso.

Leta ya Moscow yatangaje ko igiye gukoresha ingingo ya gatanu y’amasezerano abuza ikorwa ry’intwaro z’ibinyabuzima (Convention on the Prohibition of the Development, Production and Stockpiling of Bacteriological (Biological) and Toxin Weapons and on their Destruction), mu gukora iperereza kuri Leta ya Washington.

Umuvugizi wa Minisiteri y’Ububanyi n’amahanga, Maria Zakharova, yabwiye itangazamakuru kuri uyu wa Gatatu ati "Turimo kwitegura gukoresha uburyo buteganywa mu ngingo za 5 na 6 z’aya masezerano, aho abayashyizeho umukono bafite inshingano yo kuganira hagati yabo ku byemezo bijyaye n’intego z’aya masezerano cyangwa ku ishyirwa mu bikorwa ry’ibyo ateganya, no gukora amaperereza ku bikorwa byose byo kurenga kuri ayo masezerano."

Ni ibinyabuzima byatunganywaga byifashishwa mu buryo bwa gisirikare, bishobora gutera uburwayi butandukanye bukomeye burimo nka cholera, umusonga, ubushye n’ibindi.

Ngo byahise bisenywa bwangu guhera ku wa 24 Gashyantare.

Hari amakuru ko ibyo bikorwa remezo byasenywe hagamijwe kwirinda ko ibyo bikorwa by’ibanga byagera mu maboko y’u Burusiya.

Umuvugizi wa Minisiteri y’Ububanyi n’amahanga y'u Burusiya, Maria Zakharova

Turikiya yarahiye ko Finlande na Suède bidapfa kujya muri NATO

Perezida wa Turikiya Recep Tayyip Erdoğan yavuze ko ashikamye ku cyemezo cya "Oya" ku bihugu bya Suède na Finlande bishaka kujya muri NATO, abishinja gushyigikira iterabwoba ku gihugu cye.

Kuri uyu wa Kane yabwiye abaturage ari "Twavuye oya, kandi tuzakomeza muri iyo nzira."

Erdoğan kandi yavuze ko yizeye ko ihuriro rya gisirikare rihuza ibihugu by’i Burayi na Leta zunze Ubumwe za Amerika (NATO), rizabasha kumva impungenge bafite mu kutemera ko biriya bihugu byakirwa.

Yavuze ko ari ibyemezo birimo gufatwa uyu muryango waguka ugana mu Burasirazuba, mu gihe biri mu byateje intambara y’u Burusiya na Ukraine.

Ni mu gihe Turikiya ishinja biriya bihugu gushyigikira imitwe y’iterabwoba y’aba-Kourdes, inahungira muri ibyo bihugu yisanga.

Yakomeje ati "Duteganya ko abafatanyabikorwa bacu bumva impungenge dufite, kutwubaha ndetse byashoboka bakaba banadushyigikira."

Erdogan yanashinje NATO ku mu bihe bitandukanye, yanze kubafasha guhangana n’imitwe y’aba-Kourdes ku mipaka ya Turikiya.

Perezida Erdoğan yavuze ko hakenewe ko NATO yumva impungenge zayo ku kibazo ifitanye na Suede na Finlande

Turikiya yinjiye muri NATO mu 1952, ndetse ni kimwe mu bihugu bifite igisirikare kinini muri iryo huriro.

U Burusiya bwirukanye abadipolomate ba Portugal

U Burusiya bwirukanye abakozi batanu ba ambasade ya Portugal i Moscow. Ni nyuma y’uko abadipolomate 10 b’u Burusiya muri Portugal bari bamaze gutangarizwa ko batacyemerewe kuguma ku butaka bw’icyo gihugu (persona non grata).

Minisiteri y’Ububanyi n’amahaga y’u Burusiya yatangaje ko "Iyo ntambwe ibangamiye ubucuti izagira ingaruka ku mibanire ya Portugal n’u Burusiya."

Kuva intambara yo muri Ukraine yatangira, abadipolomate basaga 300 b’u Burusiya bamaze kwirukanwa muri Ambasade zitandukanye zo mu Burayi.

Kuri uyu wa Kane u Burusiya bwatangaje ko nabwo bugiye kwirukana abadipolomate 85 bo mu bhugu by’u Bufaransa, Espagne n’u Butaliyani.

U Burayi bushaka gushyiraho ikigega cyo gusana Ukraine

Chancelier w’u Budage Olaf Scholtz yasabye Ubumwe bw’u Burayi (EU) gushyiraho ikigega cyihariye cy’ubufatanye, cyafasha mu gusana Ukraine nyuma y’intambara ihanganyemo n’u Burusiya.

Yagize ati "Gusana ibikorwa remezo bya Ukraine no kuzahura ubukungu bwa Ukraine bizatwara miliyari nyinshi." Yagezaga ijambo ku badepite, mbere y’inama n’abayobozi ba EU.

Yakomeje ati "Twe nka EU tugomba gutangira gutegura ikigega cy’ubufatanye cyagirwa n’imisanzu y’ibihugu bigize EU n’abafatanyabikorwa bayo."

Scholtz yanavuze ko bushake bwa Ukraine bwo kwinjira muri EU bwangu, ko nta buryo buhari bwatuma hakoreshwa inzira z’ibusamo.

Bibaye ngo byaba bitaboneye kuko hari n’ibindi bihugu byifuza kwinjira muri uyu muryango.
Scholz yavuze ko Montenegro, Serbia, Albania, Macedonia ya Ruguru, Bosnia and Herzegovina na Kosovo, bimaze igihe mu rugendo rwabyinjiza muri EU.

Ati "Urugendo rwo kwinjira mu muryango ntabwo ari ikintu cyakorwa mu mezi make cyangwa imyaka."

Chancelier w’u Budage Olaf Scholtz yasabye EU gushyiraho ikigega cyihariye kizafasha Ukraine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .