Abanyamerika baracyashakisha Perezida, Biden ari gukoza ikirenge kimwe muri White House (Amafoto)

Yanditswe na Philbert Girinema
Kuya 6 Ugushyingo 2020 saa 04:42
Yasuwe :
0 0

Iminsi itatu irashize Abanyamerika n’Isi yose bategereje kumenya uwegukana intsinzi mu matora y’Umukuru w’Igihugu hagati ya Joe Biden na Donald Trump.

Mu minsi ibiri ishize, abakandida bagumye ku majwi yabaruwe ku munsi w’itora aho Joe Biden ayoboye na 253 mu gihe Trump afite 213, mu gihe umukandida utorwa agomba kuba afite nibura amajwi 270.

Kugeza magingo aya ariko Joe Biden ni we uhabwa amahirwe yo gutorerwa kuyobora Leta Zunze Ubumwe za Amerika bishingiye ku majwi akiri kubarurwa muri Leta esheshatu aho ari hejuru ya Trump bahanganye.

Nubwo Joe Biden ariwe ufite amahirwe yo kwegukana intebe imwicaza muri White House, gusa na none Trump nawe ari hafi aho kuko imibare irerekana ko ashobora kuza gutungurana akisubiza uyu mwanya cyane ko nko muri Leta ya Georgia byemejwe ko amajwi yongera kubarurwa.

Hari ibintu bibiri ushobora kuza kubona mu itangazamakuru uyu munsi cyangwa ejo. Ni inkuru zifite umutwe ugira uti “Biden yegukanye umwanya w’Umukuru w’Igihugu yanikiye bidasubirwaho Trump” cyangwa se indi igira iti “Bitunguranye, Trump yisubije umwanya w’Umukuru w’Igihugu atsinze Biden”. Byombi ni ukubitega amaso.

UKO IBARURA RY’AMAJWI RYAGENZE KU MUNSI WA GATATU

22:00: Abanyamerika baracyategereje kumenya uzabayobora mu myaka ine iri imbere

Kuva ku wa 4 Ugushyingo 2020, umunsi wabayeho amatora kugeza kuri uyu wa Gatanu, amatsiko aracyari yose yo kumenya uwegukana intsinzi hagati ya Joe Biden na Donald Trump.

Buri umwe muri aba bombi akeneye amajwi 270 kugira ngo atsinde, mu gihe kuri ubu Biden afite 253 naho Trump akagira 213.

Leta esheshatu zitaratangaza amajwi yazo nizo zingiro ry’ugomba gutorerwa kwicara muri White House kugeza mu 2024.

21:30: Mitt Romney yanenze amagambo ya Trump wavuze ko ‘yibwe amajwi’

Senateri wo muri Leta ya Utah, Mitt Romney, yiyongereye ku mubare w’abayoboke b’Ishyaka ry’Aba-Républicains bamaganye amagambo ya Trump wavuze ko habayeho kwiba amajwi.

Romney wigeze kuba umukandida mu matora ya Perezida abinyujije kuri Twitter, yatangaje ko kuvuga ko amatora yabayemo ruswa n’amajwi akibwa bitari bikwiye kuko byangiza impamvu y’uburenganzira ‘bwa hano ndetse n’ahandi ku Isi.’’

21:00: Inzego z’umutekano mu gace ka Maricopa gatuwe cyane muri Leta ya Arizona zatangaje ko abantu basaga 500 bahuriye ahantu hamwe basaba ko amajwi yongera kubarurwa.

20:10: Joe Biden arageza ijambo ku benegihugu

Umwe mu bantu ba hafi y’itsinda rishinzwe Ibikorwa byo kwamamaza Joe Biden yatangaje ko uyu mukandida w’Umu-Démocrate ageza ijambo ku gihugu ari mu Mujyi wa Wilmington muri Leta ya Delaware.

BBC yanditse ko ijambo rya Biden rivugwa bigendanye n’ibiza kuba bimaze gutangazwa byerekana uko amajwi amaze kubarurwa angana n’icyerekezo cy’uhabwa amahirwe yo gutsinda.

19:50: Ku rwego rw’igihugu biragaragara ko Trump afite umusozi muremure wo kuzamuka kugira ngo atsinde muri Leta enye zamufasha kubona amajwi 270 akenewe. Kugeza ubu Biden aracyari imbere n’amajwi 253 kuri 213.

19:20: Leta ya Pennsylvania ishobora gushyira iherezo ku mpaka z’utsinda hagati ya Trump na Biden

Kuri ubu Donald Trump na Joe Biden bahanganiye kwegukana intsinzi muri Leta ya Pennsylvania ivuze byinshi k’ugomba gutsinda. Mu gihe Joe Biden yatsinda arahita agira amajwi amwinjiza muri White House.

Kuri ubu ikinyuranyo kiri hagati ya Biden uri imbere mu majwi na Trump kingana na 9 000 mu gihe hasigaye kubarurwa 124 169.

18:20: Kugeza ubu muri Leta eshanu zikomeye, Biden ayoboye mu majwi muri enye mu gihe Trump asigariye kuri North Carolina gusa.

17:45: Ikinyuranyo hagati ya Biden na Trump muri leta ya Arizona gitangiye kugabanuka

Kuva ku munsi w’ejo amajwi ya Biden muri Leta ya Biden atangiye kugabanuka. Ubu hasigayemo amajwi 43570 avuye ku 47000.

Agace ka Maricopa, ni ko kanini muri iyi leta kandi karacyari kubarura, bivugwa ko muri aka gace hatoreye abantu miliyoni ebyiri. Ubu haracyari amajwi ibihumbi 142 atarabarurwa.

17:30: Muri Leta ya Georgia byemejwe ko amajwi asubirwamo

Umunyamabanga wa Leta muri Leta ya Georgia, Brad Raffensberger, yatangaje ko amajwi yo muri iyi leta aza gusubirwamo hakabaho kongera kubara.

Yavuze ko kugeza ubu hakiri amajwi 4169 agomba kubarurwa hamwe n’andi 8000 y’abantu batoye badahari mu buryo bw’iposita agomba kubarurwa uyu munsi.

Yakomeje avuga ko kugeza ubu bigoye kwemeza uwatsinze muri Georgia, ndetse ko kuko ikinyuranyo ari gito, hagomba kubaho kongera kubarura amajwi.

Yavuze ko amajwi yo muri iyi leta afite igisobanuro gikomeye ku gihugu cyose muri rusange

Gabriel Sterling wungirije Raffensberger yavuze ko umwanzuro wo kongera kubarura amajwi watewe n’uburyo abakandida bombi bakurikiranye mu buryo bwa hafi mu majwi aho kuba uburiganya nk’uko byakunze kuvugwa n’uruhande rwa Trump.

17:15: Biden akomeje kujya imbere muri Leta ya Pennsylvania

Mu majwi mashya amaze gushyirwa hanze, Biden ari imbere mu majwi yo muri Leta ya Pennsylvania nyuma y’iminsi ibiri iyi leta iyobowe na Trump. Ubu ari imbere aho arusha Trump amajwi 6737.

Hari nk’aho Biden yabonye amajwi 2016 naho Trump abona 897, ni ukuvuga ko yabonye hejuru ya 68% bituma akomeza kuyobora iyi leta. Mu gihe cyose yakwegukana amajwi yayo, nta kabuza arahita agira amajwi 270 asabwa ngo atorerwe kuba Perezida.

16:30: Itsinda rya Trump ryashimangiye ko ryiteguye kwitabaza urukiko mu gihe byakwemezwa ko Biden yatowe

Itsinda ry’abashinzwe ibikorwa byo kwiyamamaza bya Donald Trump ryasohoye itangazo rishimangira ko rigomba kwitabaza urukiko mu gihe byaba byemejwe ko Joe Biden ariwe watorewe kuyobora Leta Zunze Ubumwe za Amerika.

Itangazo ryashyizwe hanze n’ukuriye ibikorwa byo kwiyamamaza bya Trump, Matt Morgan, rivuga ko kugeza ubu “amatora ntararangira” ndetse ko ibigereranyo byerekana ko Biden yatsinze bipfuye kandi bishingiye kuri leta enye zitari zagera ku musozo mu bijyanye n’amajwi.

Iri tangazo rikomeza rivuga ko muri Leta ya Georgia amajwi agomba kuzongera kubarurwa aho Matt yakomeje avuga ko bizeye kuzabonamo amajwi yabazwe mu buriganya ku buryo bizatuma Trump ajya hejuru mu majwi.

Yakomeje ati “Hari amajwi menshi adaciye mu mucyo muri Leta ya Pennsylvania, harimo kandi ko abayobozi b’amatora babujije abakorera bushake bacu kugera aho ibarura ry’amajwi ryari riri kubera”.

Muri Nevada, yavuze ko hari abantu ibihumbi bahatoreye mu buryo bunyuranyije n’amategeko ndetse ko Perezida Trump aza gutsinda muri Leta ya Arizona nubwo ibinyamakuru bitandukanye nka Fox News na Associated Press byatangaje ko iyi leta yegukanywe na Biden.

16:00: Mu Mujyi wa Philadelphia hasigaye kubarurwa amajwi ibihumbi 25

Muri Philadelphia amajwi atarabarurwa arenga ibihumbi 25. Abayobozi bo muri uyu mujyi batangaje ko biza gufata umwanya kugira ngo basoze iki gikorwa kuko hari kubarurwa amajwi yaje mu iposita.

Ikindi kandi ni amajwi bisaba kwitondera kuko hagenzurwa ibintu byinshi birimo imikono ya ba nyirayo hamwe n’amatariki batoreyeho.

Uyu mujyi niwo uhanzwe amaso ku buryo uza gutanga utsinda muri Leta ya Pennsylvania.

15:45: Imyiteguro y’ibanze yatangiye ku ruhande rwa Biden

Mu masaha ari imbere byitezwe ko Biden aza kugeza ijambo ku banyamerika mu gihe byaba bikomeje gutya agakomeza kwegukana amajwi muri leta enye ayoboye kugeza ubu.

Ubu Biden ayoboye muri izi leta:

-  Georgia
-  Nevada
-  Arizona
-  Pennsylvania

Mu gihe uyu munsi byaba byemejwe yatsinze, byitezwe ko we n’itsinda rye bahita batangira gutegura ibijyanye no guhererekanya ubutegetsi. Nta gahunda bafite zo gutegereza imanza zashinzwe na Trump ahubwo akazi ni ko bashyize imbere.

Biden arahita atangira kwitwa Perezida watowe wa Leta Zunze Ubumwe za Amerika.

15:45: Inkuru mbi kuri Trump n’abamushyigikiye: Biden ayoboye muri Pennsylvania

Nyuma y’iminsi ibiri Trump ari imbere muri Leta ya Pennsylvania amahirwe ye ya nyuma atangiye kuyoyoka nyuma y’aho Joe Biden amwigaranzuye akamujya imbere mu majwi muri Leta ya Pennsylvania.

Iyi leta ni yo yonyine ifite amajwi menshi mu zisigaye kuko abarirwa 20. Mu gihe Biden yayitsinda nta kabuza arahita yegukana umwanya w’Umukuru w’Igihugu.

Hamaze kubarurwa amajwi angana na 95% kandi Biden ari imbere aho arusha 5587.

15:30: Abashinzwe umutekano w’abayobozi bakuru muri Leta Zunze Ubumwe za Amerika, bazwi nka Secret Service, boherejwe ku bwinshi mu Mujyi wa Wilmington muri Leta ya Delaware aho Biden atuye mu gukaza umutekano we mu gihe yaba atorewe kuyobora Amerika.

Ku munsi w’ejo indege zari zakumiriwe mu kirere cyo hejuru y’aho Biden atuye nabyo muri gahunda yo gukaza umutekano we.

Ni ibintu bisanzwe buri gihe kuri perezida watowe ko umutekano ukazwa mu gace atuyemo, byanakozwe no kuri Trump.

15:10: Muri Leta ya Pennsylvania, abashyigikiye Trump bagiye mu mihanda, bigaragambya bafite ibyapa byanditseho ko amajwi ari kwibwa. Hari ubwoba ko hashobora kuba imvururu zikomeye mu gihe byaba byemejwe ko Trump yatsinzwe.

14:45: Samantha Power yagereranyije Perezida Trump na Robert Mugabe wayoboye Zimbabwe

Samantha Power wabaye Ambasaderi wa Leta Zunze Ubumwe za Amerika mu Muryango w’Abibumbye, yagereranyije Perezida Donald Trump na Robert Mugabe wigeze kuyobora Zimbabwe.

Ni imvugo yakoresheje nyuma y’uko Trump akomeje kuvuga ko yibwe amajwi nubwo nta bimenyetso yigeze abitangira, aho ari kuza inyuma ya Joe Biden bahanganye mu matora.

Samantha Power wabaye ambasaderi ku bwa Perezida Barack Obama, yanditse kuri Twitter ati “Ari gukora neza nka Robert Mugabe".

Robert Mugabe yaboboye Zimbabwe kuva mu 1980 kugeza ubwo yakurwagaho n’igisirikare mu 2017. Buri gihe itorwa rye ryavugwagamo ibikorwa byo kwiba amajwi mu buryo bukomeye.

14:30: Uko bihagaze muri leta zikomeye zitaratangaza amajwi

14:00: Ubu Biden afite amajwi 253. Mu gihe yatsinda muri Leta ya Pennsylvania, arahita agira amajwi 273. Icyo gihe yaba yatsinze, naho mu gihe yatsinda Georgia gusa yagira 269 agasigara abura ijwi rimwe naryo yashakira mu zindi leta ayoboye.

Ikindi umuntu akwiye gukomeza kuzirikana ni uko kugeza ubu hakiri izindi leta enye usibye izi ebyiri maze kuvuga haruguru. Izo ni Alaska, Arizona, Nevada na North Carolina. Zose ntabwo ibyazo birasobanuka gusa Trump ayoboye muri Alaska na North Carolina mu gihe Biden ari imbere muri Arizona na Nevada.

13:40: Nta yandi makiriro araba asigaye kuri Trump mu gihe yatsindwa muri Leta ya Georgia na Pennsylvania

Ahagana saa sita z’amanywa ku isaha z’i Kigali nibwo Biden yaciye kuri Trump muri Leta ya Georgia, aho hamaze kubarurwa amajwi angana na 99%. Ku rundi ruhande, Biden aracyari inyuma ya Trump muri leta ya Pennsylvania aho arushwa amajwi arenga gato ibihumbi 18, gusa nayo ni make ugereranyije n’arenga ibihumbi 500 yamurushaga mu minsi ibiri ya mbere.

Muri izi leta zombi ibarura riracyakomeje gusa mu gihe Trump yabura amajwi 36 azibonekamo, nta yandi mahitamo araba asigaranye.

13:20: Akandi gahigo aya matora yihariye... Ni yo ya mbere abaye mu gihe cy’icyorezo

Mu mateka ya Leta Zunze Ubumwe za Amerika nibwo bwa mbere amatora abaye mu gihe igihugu cyibasiwe bikomeye n’icyorezo. Mu 1918, Isi yari yugarijwe n’icyorezo cy’ibicurane bizwi nka Spanish flu ndetse ni nabwo intambara ya Mbere y’Isi yari irimbanyije. Icyo gihe Amerika yasubitse amatora ya ba Guverineri n’abayobozi bandi bo mu nzego z’ibanze.

Abantu basaga ibihumbi 8500 bishwe n'ibi bicurane

13:00: Ni ryari dushobora kumenya uwatsinze?

Nyuma y’iminsi itatu benshi barara badasinziye, birasa n’aho ibintu biri kugana ku musozo gusa haracyari intera ndende.

Mu mibare, mu gihe Biden uri imbere muri Leta ya Georgia yakwegukana amajwi yayo, akongeraho no mu zindi ayoboye nka Nevada na Arizona, araba abonye urufunguzo rumwinjiza muri White House. Mu gihe yatsinda Pennsylvania akabona amajwi 20 yo muri iyi leta, ibintu byaba birangiye, amajwi yaba agize yaba arenze akenewe.

Ku rundi ruhande, byasaba Trump gutsinda muri Leta ya Pennsylvania hanyuma akongeraho na leta eshatu hagati ya Georgia, North Carolina, Nevada na Arizona.

12:45: Leta ya Georgia imaze kwigarika Trump ni yo ivukamo abantu bakomeye nka Martin Luther King Jr. Aha hari tariki ya 03 Ugushyingo 1964 ubwo Dr Martin Luther King Jr yari kumwe n’umugore we Coretta Scott King bagiye gutora.

Jimmy Carter wabaye Perezida wa 39 wa Leta Zunze Ubumwe za Amerika nawe avuka muri Leta ya Georgia

Kanda hano umenye abantu benshi bakomeye bavuka muri Leta ya Georgia barimo Usher, Kanye West, Kelly Rowland n’abandi

12:30: Muri leta eshanu zikomeye zisigaye, Trump ayoboye muri leta ebyiri gusa izindi zose Biden niwe uri hejuru. Icyizere cya Trump gitangiye kuyoyoka kuva ubwo Georgia yamuvaga mu biganza.

11:30: Bye Bye Trump?

Amahirwe ya Trump yo kwegukana aya matora akomeje kuba make mu buryo bugaragara. Nyuma y’aho mu minsi ibiri ishize yari imbere muri Leta ya Georgia nk’imwe mu zisigaye zifite abatora benshi, ubu ibintu bimaze guhinduka.

Biden yamaze gukuramo ikinyuranyo cy’amajwi yose yari amutandukanyije na Trump muri iyi leta, ubu ni we uri imbere mu majwi. Mu gihe cyose Trump yabura amajwi 16 yo muri iyi leta, nta kabuza icyizere kiraba kiyoyotse.

Leta ebyiri umuntu wese ukunda Trump akwiriye gusenga ashikamye kugira ngo azegukane harimo Georgia na Pennsylvania, zombi zifite amajwi 36 uziteranyije.

11:00: Georgia ishobora kuza gutungurana

Kugeza ubu Biden aracyari imbere n’amajwi 253 kuri 213. Inkubiri yo guhatana mu majwi irakomeje muri leta zikomeye nka Georgia.

Muri iyi leta, abakandida bombi bararyana isata burenge, nta n’umwe uha agahenge mugenzi we.

Trump niwe wari imbere kuva amatora yatangira gusa intera yari yashyizemo yagabanutse cyane aho ubu igeze ku majwi 600. Abayobozi muri iyi leta batangaje ko barakomeza kubarura amajwi, byitezwe ko kuri uyu wa Gatanu aribwo uwegukanye intsinzi muri iyi leta aza kumenyekana.

Mu gihe Trump yaba abuze amajwi 16 yo muri iyi leta, aratangira kwimyiza imoso.

10:30: Abahungu ba Trump bibasiye abatereranye umubyeyi wabo

Abahungu babiri ba Donald Trump, Don Jr na Eric, banenze abantu bo mu ishyaka ry’aba- républicain umubyeyi wabo abarizwamo, bamutereranye muri uru rugamba rwo gushaka uko yisubiza intebe y’Umukuru w’Igihugu.

Imfura ya Trump, Don Jr, yashinje iri shyaka kurangwa n’intege nke. Umuvandimwe we Eric nawe yunze mu rya mukuru we avuga ko abatoye batazigera na rimwe bibagirwa uburyo hari abantu batereranye Trump.

Bamwe mu bantu bakomeye mu ishyaka rya Trump barimo nka Senateri wa Utah, Mitt Romney hamwe na Guverineri wa Maryland, Larry Hogan, banenze Trump bavuga ko ibyo ari gukora ari ugutesha agaciro inzira ya demokarasi yimakajwe muri Amerika.

Eric usanzwe ari mu bajyanama ba Trump, we yabwiye abashyigikiye umubyeyi we aho yari mu Mujyi wa Atlanta ati “Ndatekereza ko ikintu kimwe Donald Trump yakora muri aya matora ari ukurwana urugamba urwo arirwo rwose kugeza ku rupfu.”

Eric Trump, umuhungu wa Donald Trump yanenze abantu bose batereranye umubyeyi we

10:00: Ibintu bikomeje guhindura isura muri leta ya Georgia

Kugeza ubu, Georgia nayo ishobora kujya mu maboko ya Biden mu gihe ari imwe muri leta Trump yari yizeye ko ashobora gutsindamo akegukana amajwi yayo 16. Mu gihe yayitsindwa, nta kabuza aratangira kwihanagura, icyizere cye kiraba gitangiye kuyoyoboka.

- Ubu ni bumwe mu bwoko bw’ikaramu bukoreshwa na Perezida wa Leta Zunze Ubumwe za Amerika mu gusinya.

09:30: Aya ni yo matora ahenze mu mateka

Amatora y’uyu mwaka muri Amerika, ni yo ahenze kurusha andi yose yabayeho mu mateka kuko abarirwa ingengo y’imari ya miliyari 14 z’amadolari. Ikindi kandi ni uko Biden yakusanyije mu baterankunga arenga miliyari y’amadolari yamufashije mu kwiyamamaza, niwe mukandida wa mbere ubashije gukusanya amafaranga angana atyo.

09:00: Muri Leta zitandukanye, abemera Imana bakubise hasi amavi baratakamba cyane kugira ngo yigaragaze muri aya matora ku buryo utorwa koko aba ari umuntu yashyizeho ikiganza. Nta kabuza ko aba bari gusenga ari abashyigikiye Trump dore ko benshi mu bamuri inyuma ari abakirisitu.

Biden mu buto...

Biden (wa kabiri uturutse iburyo) yari imfura mu bana bane bavukana
Aha ni ho Biden yakuriye. Ni inzu iri muri leta ya Pennsylvania mu Mujyi wa Scranton

- Trump ubwo yasomaga umugore we n’umukobwa we nyuma y’uko yari amaze gutsinda mu 2016

08:30:Abanyamerika baba mu Rwanda nabo baratoye

Ambasade ya Leta Zunze Ubumwe za Amerika yatangaje ko abaturage b’iki gihugu barenga 100 basanzwe batuye cyangwa bakorera mu Rwanda babashije kwitorera umukuru w’igihugu cyabo.

Aba banyamerika baratoye hanyuma impapuro z’itora zabo bazishyikiriza Ambasade y’iki gihugu nayo izohereza muri Amerika ikoresheje iposita.

Inyubako ikoreramo Ambasade ya Leta Zunze Ubumwe za Amerika i Kigali ku Kacyiru

08:15: Ibyo wamenya ku bandi bananiwe gutsinda manda yabo ya kabiri

Mu gihe Trump yatsindwa aya matora, yaba abaye Perezida wa Kabiri unaniwe gutsindira manda ya kabiri mu myaka irenga 20 ishize kuko byaherukaga kuri George H. W. Bush watsinzwe na Bill Clinton mu 1993.

Abandi bananiwe gutsindira manda ya kabiri ni William Taft, Gerald Ford na Jimmy Carter.

George H. W. Bush ari kumwe na Donald J. Trump

08:00: Itsinda rishinzwe ibikorwa byo kwiyamamaza bya Biden rihanze amaso cyane leta ya Pennsylvania ku buryo mu gihe yakwegukana intsinzi yaho yahita abona amajwi 20.

Kugeza mu gitondo cyo kuri uyu wa Mbere, Biden aracyakeneye amajwi 270 ngo yinjire muri White House cyo kimwe na Trump ugomba kugira ayo majwi kugira ngo agume kuri uyu mwanya muri manda y’imyaka ine iri imbere.

Hasigaye amajwi yo muri leta esheshatu zigomba gutanga intsinzi, kugeza ubu Biden ari imbere n’amajwi 253 mu gihe Trump afite 213.

07:30: Muri Leta ya Arizona abashyigikiye Trump bigabije imihanda, bamagana ibiri kuva mu majwi, aho bagaragazaga ibyaga bishyigikiye Trump n’ibindi bituka Biden

07:00: Kuki Biden ari imbere mu majwi yo mu iposita?

Kuva icyorezo cya Coronavirus cyibasira Amerika, abashyigikiye umukandida w’aba-démocrate, Joe Biden bahisemo uburyo bwo gukoresha iposita mu gutora. Benshi mu bashyigikiye Trump bo bavuze ko bashaka kuzatora ku munsi w’itora nyir’izina. Za leta zabaze aya majwi mu buryo butandukanye.

Nko muri Pennsylvania, Trump yari ayoboye cyane ubwo ibarura ry’amajwi ryatangiraga, ariko atangira gusubira inyuma uko kubarura amajwi y’iposita byakorwaga.

Ibi ntabwo ari ikimenyetso cy’uko hari uburiganya bwabaye mu matora ahubwo bijyanye n’uko muri za leta amajwi abarwa. Zimwe zabaze amajwi yo mu iposita mbere izindi zibikora nyuma.

Ku rundi ruhande, muri leta nka North Carolina na Pennsylvania, n’ubu baracyakira impapuro z’itora ziturutse mu iposita igihe cyose zigaragaza ko zashyizwemo nibura tariki ya 3 Ugushyingo ku munsi w’amatora nyir’izina.

06:30: Umucamanza wo muri leta ya Pennsylvania yanze ubusabe bwa Trump bwo guhagarika kubarura amajwi. Muri iyi leta Trump niwe uyoboye ariko amajwi ye ari kugabanuka umunota ku wundi ku buryo bishobora kugenda nko muri Michigan maze Biden akamwigarika.

Umucamanza Paul Diamond yavuze ku byo Trump yatangaje ko indorerezi zo mu ishyaka rye zitahawe amahirwe angana n’ay’abandi. Yavuze ko amashyaka yombi, yaba aba- républicain n’aba- démocrate bemerewe kohereza indorerezi 60 kugira ngo zikurikirane uko ibarura ry’amajwi riri kugenda.

05:55: Biden yasabye abanyamerika kwamagana Trump ushaka ko kubara amajwi bihagarara

Mu butumwa butandukanye Joe Biden yanyujije ku rukuta rwe rwa Twitter, yasabye abanyamerika kwamagana Perezida Donald Trump uri gusaba ko ibikorwa byo kubarura amajwi bihagarara.

Ni nyuma y’uko Trump yinubiye uburyo ari gusubira inyuma cyane mu majwi, aho yanashinje ishyaka ry’uwo bahanganye kwiba amajwi.

-  Mu yandi makuru, Coronavirus ntiyoroheye Abanyamerika

Mu gihe abantu bahugijwe n’ibigomba kuva mu matora, Coronavirus yo ntihuze na gato kuko ubwandu buri kwiyongera umunota ku wundi.

Mu minsi ibiri ishize, ubwandu bushya muri iki gihugu bwariyongereye aho buri munsi bwagiye burenga ibihumbi 100.

Urugero:
-  Tariki ya 05 Ugushyingo handuye 121054
-  Tariki ya 04 Ugushyingo handuye 102831
-  Tariki ya 03 Ugushyingo handuye 91530
-  Tariki ya 31 Ukwakira handuye 89126
-  Tariki ya 30 Ukwakira Ukwakira 99321

05:45: Muri Leta ya Nevada, aba-républicain bamaze gutanga ikirego bavuga ko hari uburiganya bwabaye mu majwi 3062 basaba Intumwa Nkuru ya Leta, William Barr, ko yabikurirana.

Ubu buriganya bushingiye ku bantu bivugwa ko batoreye muri iyi leta mu gihe batakihabarizwa.

Kubarura amajwi biracyakomeje muri iyi leta aho Biden ari imbere gato ya Trump amurusha amajwi 11400 gusa.

Mu masaha yashize, Trump yabwiye abanyamakuru ko hari uburiganya bukomeye buri gukorwa, asaba ko kubarura amajwi byahagarara. Yashinje aba- démocrate “kwiba amajwi”.

-  Hari ubwo uwatsinze amatora yamenyekanye habura iminsi ibiri ngo umunsi w’irahira ugere

Mu 1876 nabwo habaye inkubiri ikomeye cyane mu matora yo muri Amerika hagati ya Rutherford B. Hayes w’aba- républicain na Samuel J. Tilden w’aba- démocrate.

Tilden yaburaga ijwi rimwe ngo atsinde, gusa hari ibibazo byari byagaragaye muri leta enye, ku buryo mu gihe Hayes yari kuzitsinda nawe yari kwegukana amatora.

Inteko Ishinga Amategeko ni yo yafashe iki kibazo mu nshingano maze komisiyo yayo yemeza utsinda.

Hayes yegukanye intsinzi ku kinyuranyo cy’ijwi rimwe hari nyuma y’uko agiranye ubwumvikane n’aba- démocrate akabemerera ko muri guverinoma ye azashyiramo abantu babo.

Nk’ingurane, aba-démocrate bagombaga kumuha amajwi. Ibi byose byakemutse habura iminsi ibiri gusa ngo umunsi wo kurahira ugere.

05:30: Inzira yaganisha buri mukandida muri White House

Uko bimeze kugeza ubu, Trump niwe uri mu nzira igoye kurusha Biden kuko arasabwa gutsinda muri Pennsylvania akongera nibura izindi eshatu hagati ya Arizona, North Carolina, Georgia na Nevada.

Ni mu gihe Biden asabwa gutsinda nibura Pennsylvania hamwe n’izindi ebyiri.

05:15: Joe Biden akomeje kuzamuka mu majwi cyane muri leta ya Georgia nyuma y’aho agace ka Clayton gashyiriye hanze amajwi mashya.

Mu majwi 1300 yashyizwe hanze, Biden yari afitemo 1154 mu gihe Trump ari 165.

Aka gace niko kabarizwamo umujyi wa Atlanta usanzwe ushyigikira aba- démocrate cyane. Mu gihe Biden yatsinda muri aka gace ka Clayton, bidasubirwaho inzira ya Trump imusubiza muri White House iraza kuzuramo amahwa.

05:00: Ibintu bishobora guhindura isura muri Arizona?

Iki ni ikibazo abantu benshi bari kwibaza, kuko kugeza ubu nubwo Biden ariwe uri imbere, Trump yatangiye kuzamuka mu majwi. Ubu mu majwi aherutse gutangazwa muri iyi leta, yari amaze kwiyongeraho 42276 mu gihe Biden we yiyongereyeho 31700.

Gusa Biden aracyari imbere kuko afite 50,1% mu majwi yose amaze kubarurwa muri iyi leta mu gihe Trump we afite 48,5%. Biden ubu ararusha Trump amajwi 46257, ibintu bishoboka cyane ko ashobora kuza kuyakuramo.

Uburyo Trump ari kuzamuka cyane muri iyi leta bitandukanye n’uko mu zindi bimeze kuko nko muri Georgia na Pennsylvania aho ari imbere kuva ku munsi wa mbere w’amatora, ho ari kugenda asubira inyuma gake gake.

Muri Arizona amaso ahanzwe agace ka Maricopa, mu gihe katora Trump nk’uko byagenze ubushize, dushobora kuza kugaruka tuvuga indi nkuru itandukanye.

Kugeza ubu, Biden aracyari imbere n’amajwi 253 kuri 213. Utorwa agomba kuba afite 270.

-  Niba utarakurikiranye uko byagenze mu minsi ibiri ya mbere, ushobora gusoma izi nkuru ukamenya uko byari bihagaze.

Perezida ntaramenyekana: Umunsi wa kabiri w’ibarura ry’amajwi wasize Biden akiri imbere ya Trump (Amafoto)

Rwabuze gica: Uko umunsi wa mbere w’ibarura ry’amajwi hagati ya Trump na Biden wagenze (Amafoto)

- Trump yavuze ko uburyo bwo gutora hakoreshejwe iposita bubogamye

Trump yavuze ko bitangaje kubona uburyo amajwi ari kuva mu batoye bakoresheje iposita ahengamiye ku ruhande rumwe. Ni mu gihe kuva ubu buryo bwatangira, yagaragaje ko buteye impungenge ku buryo bukomeye.

Gusa ku rundi ruhande, ibyo yavuze biteye kwibaza kuko kugeza ubu 75% by’amajwi amaze kubarurwa aturutse mu iposita, ni abatoye Biden.

-  Trump yizeye intsinzi muri Arizona

Trump yatangaje ko muri leta ya Arizona ibintu biri kugenda neza ku buryo ashobora kwegukana intsinzi. Yakomeje avuga ko intego ye ari ukurinda ubusugire bw’amatora, ati “ntidushobora kwemera ko ruswa yigarurira amatora nk’aya y’ingenzi”.

Nubwo muri leta ya Arizona Biden ariwe uri imbere, Trump yatangiye gukuramo ikinyuranyo mu buryo bugaragara, ku buryo aramutse ayegukanye, ibintu byafata indi sura.

- Trump ati abacamanza nibo bazafata umwanzuro

Mu rukerera rwo kuri uyu wa Gatanu ku isaha y’i Kigali, Trump yagiranye ikiganiro n’abanyamakuru, avuga ko yumva ko abacamanza aribo bazafata umwanzuro ku watsinze aya matora.

Uyu mugabo yamaze gutanga ibirego anenga uburyo muri leta zikomeye amajwi yabaruwe, aho yasabye ko ibikorwa by’ibarura bisubirwamo mu zindi akavuga ko hari abantu bahatoreye kandi batahatuye.

Ni mu gihe intera yari yashyize hagati ye na Biden muri leta zitandukanye yavuyemo mu buryo bwihuta ndetse n’ubu akaba adafite icyizere cyo gutsinda muri leta ya Georgia kuko asumbirijwe cyane na Biden.

Trump yasoje iki kiganiro atakiriye ikibazo na kimwe cy’abanyamakuru.

-  Ku rundi ruhande, I New York imyigaragambyo yakajije umurego. Muri iyi leta Biden niwe watsinze ku buryo bwo hejuru. Hari ubwoba ko mu gihe Trump yatsindwa ibintu bishobora kuba bibi kuko afite abantu bamushyigikiye bameze nk’aba-hooligan, bashobora kuza kwiroha mu mihanda, bakangiza n’ibikorwa remezo.

04:50: Leta esheshatu zisigaye gutangaza ibyavuye mu majwi ni:

• Alaska
• Arizona
• Georgia
• North Carolina
• Nevada
• Pennsylvania

Birashoboka ko Trump ashobora kweguka intsinzi muri Pennsylvania, North Carolina, Georgia na Alaska mu gihe Biden ari imbere muri Arizona na Nevada.

04:40: Kugeza ubu, Biden niwe uri imbere mu majwi, aho afite 253 mu gihe Trump afite 213, gusa mu masaha make ari imbere ibintu bishobora kuza guhinduka ubwo muri leta ya Georgia baza kuba bamaze gushyira hanze amajwi yose.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .