00:00:00 IGIHE NETWORK KN KINYARWANDA EN ENGLISH FR FRANCAIS

Israel igiye gutanga urukingo rwa gatatu rwa Covid-19, Amerika yahungishije abakoranye nayo muri Afghanistan, Ibiganiro by’u Bushinwa n’Aba-Taliban - Agezweho mu mahanga

Yanditswe na IGIHE
Kuya 30 Nyakanga 2021 saa 01:46
Yasuwe :
0 0

Perezida Joe Biden wa Leta Zunze Ubumwe za Amerika, yasabye Leta zigize icyo gihugu gushyiraho uburyo bwo gutanga amadolari 100 ku Banyamerika batarikingiza kugira ngo bemere guterwa urukingo rwa Covid-19.

Biden yavuze ko iki cyemezo kizafasha mu gutuma Abanyamerika barenga 50% bataraterwa inkingo mu buryo bwuzuye baziterwa, kandi ko ibi bikazatuma igihugu cyose kirandura Covid-19 ikomeje kwiyongera ubutitsa aho ku mpuzandengo, abantu ibihumbi 61 bari kwandura iyi ndwara ku munsi.

Perezida kandi yavuze ko abakozi ba Leta bose bakwiye kwikingiza, utabikoze akazajya asabwa kwipimisha Covid-19 rimwe cyangwa kabiri mu cyumweru, akambara agapfukamunwa igihe cyose kandi aho bishoboka agakorera mu rugo, iki cyemezo byitezwe ko kizatuma abakozi ba Leta barenga miliyoni ebyiri bikingiza.

Uyu muyobozi kandi yavuze ko abakora mu nzego z’abikorera, bemerewe gutegeka abakozi babo kwikingiza, utabikoze akaba yakwirukanwa burundu.

Biden yavuze ko Abanyamerika ari abanyamahirwe kuko igihugu cyabo gifite inkingo zihagije, ati “Buri munsi mvugana n’abayobozi bo ku Isi bansaba ko twabafasha tukabongerera inkingo”. Yavuze ko Abanyamerika badakwiye gukerensa Covid-19.

Amerika igiye gushyiraho ingamba zo kwishyura 100$ ku Banyamerika bemeye kwikingiza

===================================================

Haribazwa icyihishe inyuma y’ibiganiro u Bushinwa bwagiranye n’Aba-Taliban

Nyuma y’uko ingabo za Leta Zunze Ubumwe za Amerika zitangiye kuva muri Afghanistan, umutwe w’Aba-Taliban wigaruriye ibice bitandukanye birimo imipaka itanu muri itandatu ikomeye muri icyo gihugu.

Mu mipaka Aba-Taliban babohoje harimo uwo Afghanistan ihuriyeho n’u Bushinwa, ku buryo ari imwe mu mpamvu zatumye Leta y’u Bushinwa idasanzwe igirana umubano wa politiki n’umutwe w’Aba-Taliban, itangira kuwiyegereza, dore ko Minisitiri w’Ububanyi n’Amahanga w’u Bushinwa, Wang Yi, aherutse kugirana ibiganiro n’Umuyobozi w’Ishami rya Politiki mu mutwe w’Aba-Taliban, Mullah Abdul Ghani Baradar.

Hari abatangiye kuvuga ko u Bushinwa bwaba buri kwitegura kwinjira mu ntambara yo muri Afghanistan nyuma y’uko Amerika ivuye muri icyo gihugu, na cyane ko mu myaka ine ishize, iki gihugu cyongereye umubare w’abasirikare mu bice byegereye umupaka wa Afghanistan, uretse ko u Bushinwa buvuga ko nta kindi bugamije kitari ukurinda ubusugire bwabwo.

Ku rundi ruhande, hibajijwe uburyo u Bushinwa bugirana ibiganiro n’umutwe w’Aba-Taliban nyamara uyu mutwe ukiri mu biganiro na Leta ya Afghanistan bigamije kubaka amahoro arambye muri icyo gihugu.

Leta y'u Bushinwa yagiranye ibiganiro n'Aba-Taliban bamaze gufata umupaka uhuza Afghanistan n'u Bushinwa

==================================================

Israel igiye gutanga urukingo rwa gatatu rwa Covid-19

Leta ya Israel yatangaje ko abantu bose bari hejuru y’imyaka 60, bemerewe guterwa urukingo rwa gatatu mu rwego rwo kongera ubudahangarwa bwabo ku cyorezo cya Covid-19.

Ubusanzwe urukingo rwa Pfizer rwakoreshejwe muri Israel rwaterwaga inshuro ebyiri mu rwego rwo gufasha uwarutewe kugira ubudahangarwa ku cyorezo cya Covid-19 buri ku kigero cya 95%.

Icyakora ubushakashatsi bwagaragaje ko ubudahangarwa bw’umubiri ku muntu watewe urukingo rwa Pfizer bugabanuka bukagera ku kigero cya 88% nyuma y’amezi atandatu, bigakekwa ko uko iminsi ikomeza kwiyongera, ubudahangarwa bw’umuntu bushobora kuzagenda bugabanuka kurushaho ari na yo mpamvu hashyizweho urukingo rwa gatatu ku bantu bari hejuru y’imyaka 60.

Minisitiri w’Intebe wa Israel, Naftali Bennett, yavuze ko mu isuzuma ry’ibanze ryakorewe ku bantu 2000, ryagaragaje ko abantu batewe inkingo eshatu nta kibazo cy’ubuzima bagize, bityo asaba abageze mu zabukuru bose kwemera kwiteza urwo rukingo.

Israel ni cyo gihugu cya mbere gitangije gahunda yo gutanga urukingo rwa gatatu, dore ko yaba Ishami ry’Umuryango w’Abibumbye ryita ku Buzima, OMS, ndetse n’Ikigo cya Amerika Kirwanya Indwara z’Ibyorezo (CDC), gisanzwe gikorana cyane n’inzego z’ubuzima muri Israel, nta rwego na rumwe ruremeza ko gutera urukingo rwa gatatu bikenewe.

Abakurikirana iby’itangwa ry’inkingo bavuze ko mu gihe ibihugu bikomeye byakwemeza gutanga inkingo eshatu, byagira ingaruka zikomeye cyane mu gukwirakwiza inkingo ku bihugu bikiri mu nzira y’amajyambere kuko byatuma ibihugu bikomeye bikomeza kwikubira inkingo, ku buryo iherezo rya Covid-19 muri ibyo bihugu bishobora kuzatwara imyaka myinshi.

Abaturage barengeje imyaka 60 bagiye guterwa urukingo rwa gatatu muri Israel

==================================================

Amerika yatangiye guhungisha abasemuzi bakoranye n’ingabo zayo muri Afghanistan

Leta Zunze Ubumwe za Amerika zatangiye kwakira abaturage biganjemo abasemuzi, bakoranye n’ingabo zayo mu gihe cy’imyaka 20 zari zimaze mu rugamba n’Aba-Taliban.

Iki cyemezo cyafashwe nyuma y’uko bamwe muri aba basemuzi batangiye kwicwa n’Aba-Taliban ubwo ingabo za Amerika zari zitangiye kuva muri Afghanistan.

Icyiciro cya mbere cy’abantu 221 barimo abasemuzi n’imiryango yabo, nibo bamaze kugera muri Amerika, icyakora abandi 750, bari kumwe n’imiryango yabo bitezwe kugera muri Amerika kuko bamaze kubona ibyangombwa. Bose hamwe bakazaba ari abantu 1.750.

Icyakora bivugwa abakoranye na Amerika bose bari mu byago byo kuba bakwicwa n’umutwe w’Aba-Taliban bashobora kuba bagera ku bantu ibihumbi 20, bafite imiryango igizwe n’abantu ibihumbi 100, uretse ko bitaremezwa niba abo bose bazabona ibyangombwa byo kujya muri Amerika.

Amerika igiye gutanga ubuhungiro ku baturage ba Afghanistan bayifashije mu ntambara yari imaze imyaka 20 irwanamo n'Aba-Taliban

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .