Abanyamerika 360 bari kugeragerezwaho urukingo rwa Covid-19

Yanditswe na Twarabanye Venuste
Kuya 6 Gicurasi 2020 saa 04:29
Yasuwe :
0 0

Ibigo bibiri birimo icyo mu Budage, BioNTech, n’Ikigo gishinzwe iby’imiti muri Leta Zunze Ubumwe za Amerika, Pfizer, byatangaje ko byatangiye igerageza ry’urukingo rwa Covid-19 byafatanyije gukora.

Mu cyumweru gishize, Pfizer yari yatangaje ko igerageza rw’urukingo bari gukora rwitwa BNT162 rizatangira muri iki Cyumweru, rigahera muri Leta Zunze Ubumwe za Amerika.

Ejo ku wa Kabiri tariki 5 Gicurasi 2020 ibyo bigo byombi byatangaje ko Abanyamerika 360 batanduye icyo cyorezo bari hagati y’imyaka 18 na 55 y’amavuko ari bo babanza kuruterwa. Ikindi cyiciro kizaba kigizwe n’Abadage 200 barimo n’abakora mu rwego rw’Ubuzima, na bo batarwaye Covid-19 bari muri iyo myaka.

Ibisubizo bya mbere by’abatewe urwo rukingo bizamenyekana muri Kamena. Nibigaragara ko rukora ruzaterwa abantu benshi babishaka batarwaye n’abafite ibyago byo kwandura. Pfizer na BioNTech bari gukora ku buryo hazaboneka inkingo zigera ku bazikeneye ku Isi, igihe rwaba rukoze.

Igerageza rw’urwo rukingo ryatangiye ku wa 23 Mata gusa ntabwo haratangazwa uko ubuzima bw’abaruhawe bwifashe. BioNTech, yo mu Budage mu Mujyi wa Mainz yari iherutse gutangaza ko hari abantu 12 bamaze kuruhabwa.

Urwo rukingo rwitwa BNT162 rushobora gukwirakwizwa hose mbere y’uko uyu mwaka urangira. Ruzageragerezwa mu bihugu byombi ariko ruzakorerwa mu Budage.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .