Abanya-Australie bazahabwa urukingo rwa COVID-19 ku buntu

Yanditswe na Dufitumukiza Salathiel
Kuya 19 Kanama 2020 saa 04:02
Yasuwe :
0 0

Minisitiri w’Intebe wa Australie, Scott Morrison, yatangaje ko mu gihe urukingo rwa COVID-19 ruzaba rwamaze kuboneka, abaturage b’iki gihugu bose bazakingirwa ku buntu.

Ibi Morrison abitangaje nyuma y’aho iki gihugu gisinye amasezerano y’ubufatanye na Sosiyete y’Abongereza ikora imiti yitwa ‘AstraZeneca’ yo kuzakigurisha urukingo irimo gukora ifatanyije na Kaminuza ya Oxford mu gihe rwaba rwemejwe burundu.

Ni urukingo Morrison yavuze ko bafitiye icyizere kandi ko Abanya-Australie bazaruhabwa ku buntu.

Ati “Urukingo rwa Oxford ni rumwe mu zimaze kugera ku ntambwe nziza cyane kandi zitanga icyizere. Ni muri urwo rwego twahisemo kugira ubufatanye na bo kugira ngo igihugu cyacu kizaruboneho mu ba mbere. Buri mwenegihugu azakingirwa kandi ku buntu.”

Minisitiri Morrison yakomeje avuga ko mu masezerano harimo ko uru rukingo nirwemerwa ruzatangira gukorerwa imbere mu gihugu.

Uru urukingo rwa AstraZeneca ifatanyije na Kaminuza ya Oxford ruri mu ziri guhabwa amahirwe menshi yo kwemerwa, kuko rugeze ku ntambwe ya kabiri muri eshatu zigenderwaho ngo urukingo rwemerwe n’ishami rya Loni rishinzwe ubuzima, OMS.

Ku rundi ruhande, iki gihugu si aha gihanze amaso gusa kuko kitizeye neza ko ari rwo rukingo ruzemerwa.

Abisobanurira itangazamakuru, Minisitiri w’Intebe yagize ati” Ntitwizeye ko uru cyangwa urundi rukingo ari rwo ruzemezwa. Niyo mpamvu dukomeje kwiyegereza ibigo byinshi biri gukora urukingo ndetse natwe dukomeje kugerageza gukora urwacu.”

Uru rukingo avuga ko byibuze 95% by’abatuye iki gihugu bazaruhabwa, biteganyijwe ko mu ntangiriro z’umwaka utaha wa 2021 rwaba rwatatangiye gutangwa hirya no hino muri Australia.

Mu bikubiye mu masezerano Australie ifitanye na AstraZeneca, harimo ko urukingo ni wemerwa ruzatangira gukorerwa imbere mu gihugu ku buryo ruzagezwa ku benegihugu bose.

Aya masezerano azakurikirwa n’andi ajyanye n’ibiciro by’ingano y’urukingo iki gihugu cyifuza ndetse n’igihe urukingo rwazatangirira gutangwa.

Kugeza ubu muri Australie abamaze kwandura COVID-19 barenga ibihumbi 23 mu gihe abo imaze guhitana bo bagera kuri 450.

Minisitiri w'intebe wa Australia Scott Morrison yavuze ko abaturage b'iki gihugu bazahabwa urukingo rwa Covid-19 ku buntu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .