00:00:00 IGIHE NETWORK KN KINYARWANDA EN ENGLISH FR FRANCAIS

Abakiristu batangiye gusezera kuri Papa Benedigito XVI

Yanditswe na Igizeneza Jean Désiré
Kuya 2 Mutarama 2023 saa 02:41
Yasuwe :

Mbere y’uko ashyingurwa, ibihumbi by’abakirisitu baturutse imihanda y’Isi byerekeje i Roma kuri Bazilika yitiriwe Mutagatifu Petero, gusezera Papa Benedigito XVI ndetse no kumusabira ku Mana.

Nyuma y’urupfu rwe rwemejwe kuri uyu wa Gatandatu tariki ya 31 Ukuboza 2022, kuri kuri uyu wa Mbere tariki 02 Mutarama 2023 umubiri wa Joseph Ratzinger (amazina Papa Benedigito XVI) wimuriwe muri Bazilika yitiriwe Mutagatifu Petero kugira ngo abakirisitu bamusezereho.

Umubiri we uzahamara iminsi itatu mbere yo gushyingurwa kugira ngo buri wese abone amahirwe yo kujya ku musezeraho bwa nyuma dore ko wanambitswe mu buryo agaragara neza mu maso, ibituma buri wese amubona neza.

Mu masaha ya mbere ya saa tatu z’i Roma imirongo y’ibihumbi by’abantu baturutse imihanda yose bari bategereje ko umuhango wo gutangira ku musezera utangira ubundi bakabona amahirwe yo kumusezeraho bwa nyuma.

Mbere yo kujyanwa muri Bazilika yitiriwe Mutagatifu Petero, abakoranaga na Papa Benedigito XVI n’inshuti ze za hafi babanje kujya kumusezeraho aho yari aruhukiye muri Shapeli y’urugo rw’ababikira rwa Mater Ecclesiae i Vatican.

Kumusezeraho bizakomeza kugeza ku wa 04 Mutarama 2023 aho iyi bazirika izajya iba ifunguye kuva saa 09h00 kugeza saa 19h00 ku masaha y’i Roma nk’uko byatangaje na Vatican News.

Kuri uyu wa 05 Mutarama 2023 Papa Francis azaba ari umupapa wa mbere mu mateka ya vuba uhagaze mu mwanya w’Umushumba wa Kiliziya Gatorika ku Isi uyoboye umuhango wo gushyingura uwo yasimbuye.

Mbere y’urupfu rwe ho amasaha make, mu ijoro ryo ku wa 31 Ukuboza 2022 umwe mu baforomo bari bashinzwe kumwitaho ariko utarabashaga kuvuga Ikidage, yumvise amagambo ya nyuma ya Papa Benedigito.

Icyo gihe Papa Benedigito yaravuze ati “Nyagasani Mana, ndagukunda.”

Papa Benedigito ni we wabaye uwa mbere weguye muri kiliziya Gatolika mu myaka igera kuri 600, gusa Papa Francis w’imyaka 86 nawe yagaragaje ko ashobora kugera ikirenge mu cya Benedigito akegura mu gihe yaba atagishoboye gukomeza inshingano ze.

Muri Nyakanga yagize ububabare mu ivi byatumye yisunga igare ry’abafite ubumuga bw’ingingo.

Papa Benedigito yari amaze igihe kinini yarazahaye kugeza ubwo yakuwe aho ashobora kubonwa na rubanda. Ku wa Gatatu ni bwo Vatican yatangiye kubona ko ubuzima bwe buri mu kaga kurushaho nyuma uwamusimbuye atangira gusaba abakirisitu bamusabira.

Umubiri wa Papa Benedigito wafubitswe mu buryo ashobora kubonwa neza mu maso n'abamusezera
Abaje kumusezeraho baje mbere y'uko isaha nyir'izina igera kugira ngo bagire amahirwe yo ku musezeraho mu ba mbere
Papa Benedigito XVI yashyizwe ahantu hitaruye ku buryo bishoboka ko asezerwaho n'abantu benshi icyarimwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .