00:00:00 IGIHE NETWORK KN KINYARWANDA EN ENGLISH FR FRANCAIS

Abaganga bariye karungu muri Espagne; Padiri wo muri Nigeria yatwitswe ari muzima; muri Burkina Faso abagore benshi bashimuswe... Agezweho hirya no hino

Yanditswe na IGIHE
Kuya 16 Mutarama 2023 saa 10:51
Yasuwe :

Banki Nkuru y’u Burundi yashyizeho umubare ntarengwa w’amafaranga abaturage bemerewe kubikuza mukwirinda ikoreshwa ryayo ribi n’abajyaga bayifashisha mu manyanga.

Kuva kuri iyu wa Mbere, nta muntu wemerewe kubikuza amafaranga arenze miliyoni 15 Fbu ku munsi cyangwa miliyoni 100 Fbu ku cyumweru.

Guverineri wa Banki Nkuru y’u Burundi, Dieudonné Murengerantwari yavuze ko no kubitsa nta wemerewe kubitsa arenze miliyoni 20 Fbu ku munsi. Uzajya azana amafaranga arenze ayo azajya asabwa ibisobanuro.

Yavuze ko ari ingamba zafashwe mu kwirinda ikoreshwa nabi ry’amafaranga, asaba abaturage gushakisha ubundi buryo nko gukoresha za sheki no kohererezanya amafaranga hakoreshejwe ikoranabuhanga, nk’uko ikinyamakuru Iwacu Burundi cyabitangaje.
=================================================================================
RDC: Abantu icumi bapfuye, 40 bakomeretswa n’igisasu cyatewe mu rusengero

Abantu icumi nibo bimaze gutangazwa ko baguye mu gitero cy’igisasu cyatewe mu rusengero mu gace ka Kasindi, hafi y’umupaka ugabanya Repubulika Iharanira Demokarasi ya Congo (RDC) na Uganda, mu Ntara ya Kivu y’Amajyaruguru.

Inzego z’umutekano zatangaje ko igitero cyagabwe n’umutwe w’iterabwoba wa ADF, cyasize abasaga 40 bakomeretse.

Bivugwa ko icyo gisasu cyaturitse habura iminota mike ngo amasengesho asozwe, giturikira ahacomekwa ibyuma by’umuziki mu rusengero.

Polisi yatangaje ko iperereza ryatangiye ndetse hari umuturage ufite ubwenegihugu bwa Kenya wamaze gutabwa muri yombi akekwaho uruhare muri icyo gitero.

Nibura abantu icumi nibo baguye muri iki gitero

=================================================================================

Burkina Faso: Abagore 50 bashimuswe

Abagore bagera kuri 50 bo mu karere ka Arbinda bashimuswe n’inyeshyamba kuwa kane no kuwa Gatanu ushize mu Majyaruguru ya Burkina Faso, mu duce tumaze igihe twarazahajwe n’imitwe yitwaje intwaro.

Hari hashimuswe abagore 52 ariko bane babasha gutoroka, ari nabo batanze amakuru y’uburyo bagenzi babo batwawe n’abantu bitwaje intwaro.

RFI yatangaje ko abo bagore bashimuswe mu byiciro bibiri, icya mbere cyashimuswe kuwa Kane ubwo abo bagore bari bagiye gutashya inkwi no kuvoma amazi. Aba kabiri bashimuswe ku wa gatanu nabwo bagiye gutashya no kuvoma.

Inzego z’umutekano zatangaje ko zatangiye gushakisha abo bagore nubwo batarababona.

Imitwe yitwaje intwaro mu Majyaruguru ya Burkina Faso gushimuta abagore imaze kubigira umuco, aho babifashisha nk’uburyo bwo gushaka amafaranga kuko barekurwa iyo imiryango yabo yishyuye, ndetse bakanabakoresha imibonano mpuzabitsina ku gahato.
=================================================================================

Uganda: Umugore utwite yafashwe asambanira mu bitaro

Umugore wo mu karere ka Apac mu Majyaruguru ya Uganda, yafashwe asambana n’umusore ku gitanda cyo kwa muganga nyuma y’iminsi uwo mugore utwite aharwariye malaria.

Umusore babafatanye yahise atabwa muri yombi ashinjwa guteza akaduruvayo mu gihe umugore babuze icyaha bamushinja. Uwo musore asanzwe yotsa inyama muri ako gace ibitaro biherereyemo.

Uwo mugore yari amaze iminsi itanu mu bitaro nkuko Daily Monitor yabitangaje. Umugabo we yabafashe basambana ubwo yari aje gusura umugore we ngo arebe uko amerewe.

Ubuyobozi bw’ibitaro bwashinje umugabo gutererana umugore we, kuko yamwohereje arwaye nta murwaza akanatinda kuza kumusura.
=================================================================================

Afghanistan: Nabizada wahoze ari umudepite yishwe arashwe

Abantu bitwaje intwaro bishe barashe Mursal Nabizada wari ufite imyaka 32 n’umurinzi we , mu murwa mukuru wa Afghanistan, Kabul.

Nabizada ni umwe mu bagore bake bahoze mu buyobozi bemeye gusigara muri Afghanistan ubwo Abatalibani bisubizaga ubutegetsi muri Kanama 2021.

Musaza we n’umurinzi we wa kabiri bo bakomerekejwe n’amasasu yarashwe ku modoka bari barimo kuri iki Cyumweru, nk’uko BBC yabitangaje.

Ntabwo Nabizada yari akiri umudepite kuko Abatalibani ubwo binjiraga muri Kabul, bashyizeho amategeko akakaye atemerera abagore kugaragara mu ruhame.

Umuvugizi wa Polisi ya Kabul yatangaje ko inzego z’umutekano zatangiye iperereza ku cyihishe inyuma y’urupfu rwa Nabizada.

Nabizada ukomoka mu Burasirazuba bwa Afganistan, yinjiye mu Nteko Ishinga Amategeko mu 2018. Yabaye umudepite kugeza mu 2021 ubwo Abatalibani bafataga ubutegetsi.

=================================================================================

Nabizada yishwe n'abantu bitwaje intwaro bataramenyekana

Nigeria: Umupadiri yatwitswe ari muzima

Abagizi ba nabi bataramenyekana kuri iki Cyumweru bishe batwitswe umupadiri mu Majyaruguru ashyira Uburengerazuba bwa Nigeria, barasa undi baramukomeretsa.

Ntabwo icyateye ubwo bugizi bwa nabi kiramenyekana icyakora ni agace kazwiho ubugizi bwa nabi bwinshi bukorwa n’imitwe igendera ku matwara akaze ya kisilamu.

Umupadiri wishwe ni Isaac Achi wo muri Leta ya Niger. Yishwe ubwo abagizi ba nabi bashakaga kwinjira mu rugo rwe bakabura uko binjiramo, bagafata umwanzuro wo kurutwika. Mugenzi we Padiri Collins yarashwe ahunga ubwo umuriro muri iyo nyubako wari utangiye kuba mwinshi.
=================================================================================

Espagne: Abaganga basaga 30 000 bariye karungu

Abaganga n’abandi bakozi bo mu rwego rw’ubuvuzi muri Espagne kuri iki Cyumweru babyukiye mu myigaragambyo, bamagana uburyo urwego rw’ubuvuzi muri icyo gihugu rukomeje gusubira inyuma cyane.

Deutche Welle yatangaje ko abo bakozi bamaganye uburyo Leta ya Isabel Diaz Ayuso isa n’ititaye ku bibazo by’ubuvuzi ku nzego zo hasi, aho abakozi ari bake ku buryo biha akazi abandi.

Espagne iri mu bihugu byo mu Burayi byapfushije abantu benshi mu gihe cya Covid-19, ahanini bivugwa ko byaturutse ku nzego z’ubuvuzi zidahamye.

Abaganga bavuga ko ingengo y’imari nyinshi y’ubuzima muri Espagne, ishirira mu gufasha no kwita ku bitaro byigenga kurusha ibya Leta.

Abaganga muri Espagne binubira uburyo Leta ititaye ku bakora mu mavuriro ya Leta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .