00:00:00 IGIHE NETWORK KN KINYARWANDA EN ENGLISH FR FRANCAIS

Abafaransa bamaganye ingamba zo kurwanya Covid-19, Abashatse kwica Perezida wa Madagascar bari guhigwa; Agezweho mu mahanga

Yanditswe na IGIHE
Kuya 2 Kanama 2021 saa 08:57
Yasuwe :
0 0

Abaturage barenga ibihumbi 204 biraye mu mihanda yo mu Bufaransa bamagana icyemezo cya Leta cyo gusaba abantu kwerekana icyangombwa cy’uko bakingiwe icyorezo cya Covid-19 cyangwa nta bwandu bafite mbere yo kwinjira muri restaurant, utubari, amavuriro, imodoka zitwara abantu mu buryo bwa rusange, amaduka n’ahandi hahurira abantu benshi.

Iki cyemezo cyasabwe na Perezida Emmanuel Macron nyuma y’uko umubare munini w’Abafaransa ukomeje kwinangira mu bikorwa byo kwikingiza nyamara icyorezo gikomeje gufata indi ntera muri iki gihugu. Inteko Ishinga Amategeko iherutse kwemeza iki cyemezo kizatangira gushyirwa mu bikorwa mu minsi micye.

Iyi myigaragambyo imaze ibyumweru bitatu kandi uko iminsi ishira akaba ari ko yitabirwa na benshi, iheruka yitabiriwe n’abantu bashya barenga ibihumbi 40. Abapolisi batatu bakomerekeye muri iyi myigaragambyo mu gihe abaturage 19 batawe muri yombi.

Perezida Macron yari aherutse gutangaza ko Leta ye ifite ubushobozi bwo gukingira buri muturage ubyifuza ndetse ko hari inkingo zirenga miliyoni icyenda zishobora kuzarenza igihe cyo gukoreshwa zagenewe mu gihe abaturage batakwitabira ibikorwa byo kwikingiza.

Abafaransa barenga ibihumbi 204 bitabiriye imyigaragambyo irwanya ingamba za Leta zo gusaba abantu kwerekana icyangombwa cy'uko bakingiwe

================================================

Amerika: Imibare y’abandura Covid-19 yikubye kabiri mu byumweru bibiri

Kuva ku itariki ya 16 kugera ku ya 30 Nyakanga, imibare y’abantu bandura Covid-19 yavuye ku bantu ibihumbi 30, igera ku bantu barenga ibihumbi 77 ku mpuzandengo y’umunsi umwe.

Ubu bwiyongere bukabije buri guterwa n’ikwirakwira ry’ubwoko bushya bwa Coronavirus buzwi nka Delta, bufite ubushobozi bwo kwanduza abantu inshuro ebyiri kurusha ubwoko bwa Coronavirus bwagaragaye bwa mbere mu Bushinwa.

Ku wa Gatandatu w’icyumweru gishize, Leta ya Florida yabonye ubwandu bushya burenga ibihumbi 21, ari nabwo bwa mbere iyi Leta yari ibonye umubare munini w’abanduye ku munsi umwe kuva iki cyorezo cyagera muri icyo gihugu.

Abanyamerika barenga 60% bamaze kwiteza nibura urukingo rumwe rwa Covid-19, icyakora mu gihe imibare y’abikingiza itakwiyongera, byitezwe ko Amerika ishobora kongera kubona imibare y’abandura irenga ibihumbi 200 ku munsi, nk’uko n’ubundi byari bimeze mu bihe iki gihugu cyari cyibasiwe n’ubwandu budasanzwe bwa Covid-19.

Inzego z'ubuzima muri Amerika zihangayikishijwe n'ubwiyongere budasanzwe bw'imibare y'abandura icyorezo cya Covid-19

================================================

Iran yashinjwe kugaba ibitero ku bwato bwa Israel

Leta ya Iran yashinjwe kuba ari yo yagabye igitero simusiga ku bwato bwa Israel bwari hafi y’inkombe za Oman, kigahitana abantu babiri barimo umuturage w’u Bwongereza n’undi ukomoka muri Romania.

Ni igitero cyagabwe kuwa Kane w’icyumweru gishize, ubwo indege zitagira abapilote zototeraga ubwato bwa MV Mercer Street bugenzurwa n’ikigo cya Zodiac Maritime.

Minisitiri w’Intebe wa Israel, Naftali Bennett, yavuze ko amakuru y’iperereza agaragaza ko Iran ari yo iri inyuma y’iki gitero, ingingo yanemejwe n’ibindi bihugu birimo Leta Zunze Ubumwe za Amerika n’u Bwongereza, ndetse amakuru akavuga ko ibyo bihugu biri gutegura ‘uburyo bwo kwihimura kuri Iran’.

Hagati aho, Iran yahakanye ibyo kuba inyuma y’iki gitero, uretse ko mu minsi ishize yakunze kunenga Leta ya Israel ku ruhare rwayo mu kwica abahanga bafasha Iran mu ikorwa ry’intwaro za kirimbuzi, ibikorwa byarakaje cyane abayobozi b’icyo gihugu.

Mu gihe umwuka mubi ukomeje gututumba, haribazwa ikizaba ku biganiro by’amahoro biri kuba hagati ya Iran n’ibihugu bikize, bigamije gukumira ikoreshwa ry’ingufu zishobora kuvamo intwaro za kirimbuzi muri Iran.

Ubwato bwa MV Mercer Street buherutse kugabwaho igitero cyaguyemo abantu babiri

=================================================

Madagascar: Abasirikare bakuru barashinjwa gutegura umugambi wo kwica Perezida

Nyuma y’uko Leta ya Madagascar iburijemo umugambi wo kwica Perezida Andry Rajoelina, Umushinjacyaha Mukuru yavuze ko abasirikare bakuru batanu bafite ipeti rya General, batawe muri yombi bazira kugira uruhare mu mugambi wo kwica Perezida.

Hari kandi n’abandi bayobozi babiri bakomeye mu gipolisi cya Madagascar nabo bamaze gutabwa muri yombi bashinjwa icyaha kimwe.

Ibi byatumye umubare w’abantu bamaze gutabwa muri yombi ugera ku bantu 21, barimo abaturage babiri bakomoka mu gihugu cy’u Bufaransa, bivugwa ko bakoze no mu ngabo z’icyo gihugu.

Abayobozi bakomeye barimo abayobora ibigo bicukura amabuye y’agaciro, bari mu batawe muri yombi cyangwa bakabazwa ku ruhare bakekwaho muri uyu mugambi.

Rajoelina yageze ku butegetsi bwa mbere mu 2009 ahiritse Marc Ravalomanana, akomeza kuyobora Leta y’inzubacyuho kugera mu 2014, mbere y’uko atsinda andi matora mu 2019, nubwo Ravalomanana bari bahanganye yamushinje kwiba amajwi.

Perezida Andry Rajoelina aherutse kurokoka igitero cy'abashakaga kumwivugana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .