00:00:00 IGIHE NETWORK KN KINYARWANDA EN ENGLISH FR FRANCAIS

Aba-Républicains bagiye gukora iperereza kuri Joe Biden wandaritse inyandiko z’ibanga

Yanditswe na Igizeneza Jean Désiré
Kuya 12 Mutarama 2023 saa 07:27
Yasuwe :

Abadepite bo mu ishyaka ry’aba-Republicans bagiye gutangiza iperereza kuri Perezida Joe Biden, kubera kwandarika inyandiko z’ibanga z’igihe yari Visi Perezida wa Leta Zunze Ubumwe za Amerika, bavuga ko ari icyaha gikomeye.

Umwe muri aba badepite Paul Gosar kuri uyu wa Kane yavuze ko ‘Joe Biden yibye inyandiko z’ibanga akazihisha mu biro bye ubwo yari Visi Perezida, bikaba byerekana uburangare’.

Itangazo ryasohowe na Gosar yagize ati “Kudaha agaciro inyandiko z’ibanga ni icyaha gihanwa n’amategeko kugeza ku gifungo cy’imyaka 10. Aba-Republicans bari mu nteko bazakora iperereza kugira ngo Joe Biden asubize ku byaha bye”.

Itsinda ry’abanyamategeko ba Perezida wa Leta zunze Ubumwe za Amerika, Joe Biden ryongeye kubona inyandiko zindi z’ibanga nyuma y’izavumbuwe mu Ugushyingo 2022 bikagaragaza ko ari izo mu bihe yari Visi Perezida.

Ni impapuro zavumbuwe kuri uyu wa 11 Mutarama 2023 bikomeza gushyira abantu mu rujijo, cyane ko bisanzwe bizwi ko impapuro z’abakozi bo mu biro by’umukuru w’igihugu muri Amerika zishyirwa mu kigo cy’igihugu cy’ishyinguranyandiko mu gihe manda irangiye.

Iteka rya Perezida wa Leta zunze Ubumwe za Amerika rigena ko mu gihe umuyobozi asoje manda inyandiko zose zijyanye n’abakozi bo mu biro by’umukuru w’igihugu zigomba kubikwa n’ urwego rushinzwe ishyinguranyandiko kuko aba ari amabanga y’igihugu.

Nyuma y’ububiko bw’inyandiko bugera ku 10 bwasanzwe bufungiranye mu kigo cyitwa Penn Biden Center i Washington mu Ugushyingo nk’uko byemejwe n’abanyamategeko ba Perezida Biden, hatekerejwe ko hashobora kuba hari izindi.

Izi mpapuro zabonywe mu Ugushyingo zirimo amakuru y’ibanga zakanguye inzego zitandukanye zo mu Biro bya Perezida Biden (White House) cyane ko abantu bake barimo abajyanama n’abanyamategeko be ari bo bari bazi ibyazo gusa.

Umwe mu bantu bakurikiranira hafi iby’iki kibazo yabwiye CBS News ko izo nyandiko ziherutse kubonwa zitarimo amabanga ajyanye n’intwaro z’ubumara.

CNN nayo iherutse kwandika ko izi nyandiko zabonywe ubwo abanyamategeko ba Perezida Biden bazishyiraga mu bubiko bw’inyandiko 10, mu byahoze ari ibiro bye byihariye, aho byagaragaye ko zarimo amakuru y’ubutasi ndetse n’andi makuru ajyanye na Ukraine, Iran n’u Bwongereza.

Kugeza ubu ntiharamenyekana umubare w’izabonetse kuri iyi nshuro ndetse ntiharanamenyekana ibyari bikubiyemo cyangwa ngo hamenywe ahantu nyirizina zari zifungiye.

Abasesengura bavuga ko hashobora kuba hari amabanga yahishwe mu gihe Biden yari Visi Perezida ibishbora kugira ingaruka ku ishyaka rye ry’Aba-democrates.

Aba-Républicains bagiye gukora iperereza kuri Joe Biden wandaritse inyandiko z’ibanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .