00:00:00 IGIHE NETWORK KN KINYARWANDA EN ENGLISH FR FRANCAIS

Abarusiya bagerageje kwinjirira ibigo by’ubushakashatsi kuri nucléaire muri Amerika

Yanditswe na Ntabareshya Jean de Dieu
Kuya 10 Mutarama 2023 saa 07:31
Yasuwe :

Itsinda ry’abahanga mu bya mudasobwa bazwi nk’aba-hackers rigizwe n’Abarusiya rizwi ku izina rya Cold River, ryatahuweho umugambi wo kwinjirira ibigo bikomeye byo muri Leta Zunze Ubumwe za Amerika bikora ubushakashatsi ku ngufu za nucléaire.

Ibi bigo bashakaga kwinjira mu mabanga yabyo bifashishije ikoranabuhanga birimo The Brookhaven, Agronne na Lawrence Livermore nk’uko Reuters dukesha iyi nkuru yabitangaje.

Iyi nkuru yatangajwe ku wa Gatanu tariki ya 7 Mutarama 2023, aho bivugwa ko batangiye gushaka uko binjirira ibi bigo mu mpeshyi z’umwaka ushize.

Ibyagaragarajwe ni ibyashingiye ku bushakashatsi n’ubucukumbuzi bwakozwe n’impunguke mu birebana no gukumira ibyaha byifashishijwe ikoranabuhanga.

Amakuru agaragaza ko aba ba-hackers bagerageje kwinjira muri ibi bigo uko ari bitatu bifashishije konti za baringa bakandikira abahanga mu birebana n’ingufu za nucléaire nk’umutego wo kumenya ijambo banga bakoresha.

Mu makuru yashyizwe hanze ntibyagaragajwe impamvu izi laboratwari zari zigiye kwinjirirwa cyangwa niba uko kwinjirirwa kwaragezweho nk’uko ba nyiri kubikora babiteguye.

Ubusanzwe Cold River bazwiho kuba barinjiriye bagenzi babo bo mu Burengerazuba bw’Isi b’inshuti za Ukraine nyuma y’uko u Burusiya buyitangijeho intambara.

Iri tsinda rigizwe n’abahanga mu bya mudasobwa ryagaragaraye bwa mbere kuri radar z’ubutasi mu 2016 ubwo ryageragezaga kwinjirira ibiro by’u Bwongereza bishinzwe ububanyi n’amahanga.

Mu myaka ya vuba Cold River yakunze kuvugwa mu kwinjirira abantu b’amazina akomeye hirya no hino ku isi nk’uko ibigo bigera ku icyenda bishinzwe guhangana n’ibitero by’ikoranabuhanga byabitangaje.

Reuters yabashije kugera kuri email zakoreshwaga n’iri tsinda guhera mu 2015 kugera mu 2020 risanga zikoreshwaga n’umuhanga mu bya mudasobwa, Andrey Korinets, utuye mu Majyaruguru ya Moscow wemeye ko yazikoreshaga ariko agahakana ko atazi ibirebana n’iri tsinda.

Nyuma yo kubwira itangazamakuru ko nta makuru arebana na Cold River afite, umuhanga mu by’umutekano no gusesengura ibitero by’ikoranabuhanga muri Google, Billy Leonard yavuze ko iki kigo kizi Korinets nk’uwari ugize Cold River.

Umuyobozi Wungirije ushinzwe ubutasi mu Kigo cya Leta Zunze Ubumwe za Amerika gikumira ibitero by’ikoranabuhanga Crowdstrike, Adam Meyer, yabwiye Reuters ko Cold River ari itsinda rikomeye cyane.

Yakomeje agira ati “Iri ni rimwe mu matsinda y’aba-hackers bakomeye mubo mwumvise, aba bafite uruhare rukomeye mu gufasha mu bikorwa by’ibibera mu Burusiya.”

Nubwo bimeze bityo ariko ubusanzwe u Burusiya bufite Urwego rw’Igihugu rushinzwe ubutasi kandi rukomeye, gusa rukunze kuvugwaho imikoranire n’ibigo nk’ibyo mu buryo bw’ibanga rikomeye mu guhererekanya amakuru y’ubutasi no kwinjirira umutekano w’ibigo bikomeye ku Isi, abayobozi bakomeye n’ibindi bihugu muri rusange.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .