Yari igishyitsi kibereye u Rwanda: Ibidasanzwe ku buzima bwa Mgr Alexis mu mboni za Senateri Mupenzi yigishije

Yanditswe na Ferdinand Maniraguha
Kuya 30 Ukuboza 2020 saa 04:11
Yasuwe :
0 0

Biragoye kubona inyandiko ivuga ku mateka y’u Rwanda mu gihe cy’abami cyangwa se kuri Filozofiya Nyarwanda na Nyafurika, itarimo Musenyeri Alexis Kagame.

Uyu mugabo wavukiye i Kiyanza mu Karere ka Rulindo mu mwaka wa 1912 ni umwe mu banyabwenge bake u Rwanda rwagize kandi bakarugirira akamaro, kuko mu myaka 69 y’ubuzima bwe yarusigiye inyandiko n’ibitabo bisaga 100, byabaye umusemburo w’abashakashatsi b’ubu ku mateka y’u Rwanda, Iyigandimi, Filozofiya, Iyobokamana n’ibindi.

Mu 1929 yagiye kwiga mu Iseminari Nto i Kabgayi aharangiza mu 1933, akomereza mu Iseminari Nkuru ya Nyakibanda.

Alexis Kagame wize ari umuhanga, yahawe ubupadiri mu 1941, abanza gukora mu bwanditsi bw’Ikinyamakuru Kinyamateka. Amaze imyaka ibiri ahawe ubupadiri, nibwo yanditse Igitabo ‘Inganji Kalinga’. Cyakurikiwe n’ibindi bitabo byinshi n’imyandiko yamenyekanye nk’Indyoheshabirayi, Umuririmbyi wa Nyiribiremwa, Isoko y’Amajyambere, La Philosophie Bantu-Rwandaise de l’être”, Guhindura mu Kinyarwanda isezerano rishya ryo muri Bibiliya n’ibindi.

Ni we Munyarwanda wa mbere wabonye Impamyabumenyi y’Ikirenga mu bya Filozofiya, ahabwa imyanya ikomeye mu miryango mpuzamahanga ndetse yigisha muri Kaminuza zitandukanye muri Afurika.

Senateri Mupenzi George ni umwe mu babaye abanyeshuri ba Musenyeri Alexis Kagame hagati y’umwaka wa 1976 na 1979, ubwo yigaga muri Kaminuza Nkuru y’u Rwanda i Butare ibijyanye n’Ubuvanganzo Nyarwanda.

Mu kiganiro na IGIHE, Senateri Mupenzi yibuka Kagame nk’umuntu wari Umunyarwanda wuzuye, ugira urugwiro kandi agakunda gusabana atitaye ku kigero cy’imyaka.

Ku bwa Mupenzi, aho Musenyeri Alexis Kagame yabaga ari nta rungu ryaharangwaga, aka cya gitabo cye cyitwa ‘Aho wiriwe nta rungu!”.

Yagize ati “Wamubonaga kuri Kaminuza ari kumwe n’abanyeshuri, atera urwenya, abasetsa, nguwo Kagame. Yateraga urwenya n’abanyeshuri ari abiga muri za Siyansi, mu Bukungu cyangwa se Ubuvuzi. Ugasanga ari umupadiri ukunzwe. Yaritwaraga mu modoka, ntabe yatinya kujya kuri Ibis (hotel) kunywa nk’agakawa cyangwa akanywa nk’agacupa, kandi ari nako ashagawe n’abantu ariko baganirira iteka abasetsa.”

Musenyeri Alexis Kagame yakoze ubushakashatsi butandukanye by’umwihariko mu ngeri zirimo Filizofiya yari yaracengeye, Iyigandimi, Umuco n’Amateka y’u Rwanda n’Iyobokamana.

Yakoze ubushakashatsi ku Iyigantekerezo Nyarwanda (Filozofiya) ndetse na Nyafurika. Ni we wagaragaje ko mu myumvire ya Kinyafurika, umuntu agira ibyiyumviro bibiri birimo kumva no kubona mu gihe muri Filizofoya Nyaburayi, ibyiyumviro (sens) ari bitanu birimo gukorakora (toucher), kumva uburyohe, kumva amajwi, guhumurirwa no kureba.

Mu gihe muri kamere y’abanyaburayi buri wese akora nka nyamwigendaho haba umwana n’ababyeyi, Musenyeri Kagame yagaragaje ko atari ko bimeze muri Afurika, ko kamere yabo ari ugukorera hamwe nk’umuryango ari naho havaga indangagaciro ko umwana wabaye imfubyi yitabwaho n’umuryango.

Senateri Mupenzi avuga ko ibikorwa bya Musenyeri Kagame biri ku rwego rwo hejuru ndetse mu mateka y’u Rwanda akwiriye gufatwa nk’igihangange.

Yagize ati “Ari inyandiko ze, ari ibitabo bye, ibiganiro bye, ni umuntu w’igihangange, umuntu w’intiti. Iyo uvuze umuco Nyarwanda ntaho wanyura utamunyuzeho. Usanga ari nk’Igishyitsi kibereye u Rwanda. Ahubwo ushobora gutangazwa n’uko ahari amahanga ashobora kuba anamuzi kuturusha.”

Abanyarwanda benshi bazi Musenyeri Kagame nk’imbanza mu gukora ubushakashatsi ku mateka y’u Rwanda. Itonde ry’abami bayoboye u Rwanda rikoreshwa ubu ni we rikomokaho, inzira z’ubwiru zari zihishe amabanga y’imihango yakorwaga ibwami ni we wazanditse.

Senateri Mupenzi George yavuze ko Musenyeri Kagame ari igishyitsi kibumbatiye ubumenyi mu mateka n'umuco by'u Rwanda

Musenyeri Alexis Kagame ni we Munyarwanda wenyine wahawe uburenganzira n’Umwami Mutara III Rudahigwa ngo aganire n’abiru yandike ibijyanye n’umurimo bakoraga wo kumenya amabanga y’ibwami.

Mupenzi yavuze ko kugira ngo abiru bemerere Kagame kumuha amabanga y’ubwiru, babanje kugirana amasezerano yebereye ku Musozi wa Kigali (Mont Kigali).

Ati “Ubwiru bwo bwari no gucika ntihazagire n’ubumenya. Abiru ibyo bari bazi nta n’ubwo Umugabekazi n’Umwami babaga babizi […] Kagame yajyanye nabo kuri Mont Kigali, banywanirayo igihango ko bari bumubwire ibirimo ariko ko atazabishyira hanze mbere y’uko umwiru wa nyuma apfa.”

“Buriya ziriya nzira z’ubwiru twabonye, inzira y’Umuganura, inzira ya Gicurasi […] biriya byose byabonetse ari uko umwiru wa nyuma apfuye, ni ukuvuga ko yubahirije igihango.”

Uwategurirwaga kumusimbura yishwe muri Jenoside

Musenyeri Alexis Kagame yabaye Umwarimu muri Kaminuza Nkuru y’u Rwanda guhera igishingwa mu 1963. Mu mashuri menshi, umwarimu w’umuhanga bamutegurira undi umwungirije umuhora hafi, ku buryo mu gihe yaba atakiriho hari bumwe mu bumenyi aba yaramusigiye.

Musenyeri Alexis Kagame yapfuye tariki 2 Ukuboza 1981 azize indwara y’umutima. Kiliziya Gatolika yari yarateguye Musenyeri Muvara Félicien kuba umwarimu wa hafi ya Kagame.

Senateri Mupenzi yagize ati “Nagize amahirwe yo kwigana na Muvara Félicien kuko ni nka we bateguraga kuzasimbura Alexis Kagame. Mu barimu ba kaminuza b’ibihangange, burya iteka baba bafite umwarimu umuherekeza, kuko ibyinshi ni ibyo avugira mu ishuri ntabwo ari impapuro atanga, noneho uwo mwarimu akazaba ari we usigarana impapuro ze, ku buryo, umwe iyo apfuye icyo gihe undi azisigarana.”

“Nibyo rero byabaye agahinda kuko Muvara yarapfuye ariko numvise ko inyandiko zose ubu ziri kwa Musenyeri wa Diyosezi ya Butare.”

Mupenzi avuga ko gupfa kwa Muvara na Alphonse Rutsindura wari Umunyamabanga we byateye igihombo gikomeye kuko aribo bari barasigaranye inyandiko za Musenyeri Kagame ku buryo bishoboka ko hari ibitaratangajwe kandi ari ingenzi.

Yakomoje kandi ku bajya banenga Musenyeri Kagame bavuga ko hari aho yaguye mu mutego w’Abanyaburayi wo kwemeza ko Abanyarwanda bagiye baturuka mu bice bitandukanye bashingiye ku moko y’Ubuhutu, Ubututsi n’Ubutwa.

Senateri Mupenzi avuga ko bishoboka ko yaba yaraguye muri uwo mutego bitewe n’inyigisho zari ziriho icyo gihe ariko ko bidashobora gutesha agaciro ibikorwa bikomeye yakoze.

Ati “Kagame na we yabonaga y’uko ari uburyo bw’imibereho ariko icyo kintu cy’uko bavuye aha n’aha kikamugonga. Gusa ntabwo bibuza umutamenwa w’inyandiko ze, nta bwo bibuza amazina y’inka, ibyivugo cyangwa uruhare afite mu mateka [..] ntabwo ariyo mpamvu wahita uvuga ngo umuntu ntacyo yakoze.”

Yavuze ko Abanyarwanda bagira Imana kuba Musenyeri Kagame yarabasigiye umurage w’ubushakashatsi akawusiga wanditse bitandukanye na mbere aho Abanyarwanda bahererekanyaga umurage mu mvugo.

Ati “Njye ndamuvuga nk’Umubyeyi kuko yari afite ukuntu yabaye mu babyeyi b’Abanyarwanda. Yari Padiri ariko akaba n’Umubyeyi. Iyo mwahuraga yagushyiragamo ikintu cy’icyizere. Icyo kintu cyo gukunda Umuco Nyarwanda no kuba yarawukozeho ubushakashatsi ni wo murage tugomba kumucaho.”

Mupenzi avuga ko Musenyeri Kagame yitegereje neza amatwara y’Abanyaburayi, akabona ko umuco Nyarwanda n’udasigasirwa uzazima burundu.

Ati “Yarebye amarere ya gashakabuhake aravuga ati ‘ibi bintu nintabiryamaho bizaducika’. Tugira Imana rero arabidusigira, abidusigira binanditse kuko benshi bahitamo kugenda batabivugaho cyangwa babiganiraho ariko we yarabyanditse.”

Ikibazo kigaragara hirya no hino ni inyandiko nke z’ibyo Musenyeri Kagame yagiye yandika. Mu nzu nyinshi zicuruza ibitabo no mu mashuri, si henshi ibitabo bye biboneka.

Senateri Mupenzi yasabye abo bireba by’umwihariko Diyosezi Gatolika ya Butare yasigaranye uburenganzira ku mutungo mu by’ubwenge wa Kagame, gukora ibishoboka byose ibitabo bye bikaboneka kugira ngo ababikeneye babibone bitabagoye.

Yavuze ko hakenewe ko izo nyandiko zicapwa ku bwinshi zikaboneka hirya no hino mu buryo bworoshye, kandi Diyosezi igatanga umucyo ku nyandiko za Musenyeri Kagame bivugwa ko zaba zarasigaye zidatangajwe.

Inkuru bijyanye:Yifuzaga u Rwanda rufite amahoro: Urwibutso Buruga afite kuri mukuru we Musenyeri Alexis Kagame

Kurikira ikiganiro IGIHE yagiranye na Senateri Mupenzi George kuri Musenyeri Kagame

Musenyeri Alexis Kagame yabaye umuhanga udasanzwe, umwanditsi n’umunyamateka u Rwanda rwagize
Musenyeri Muvara wari warasigaranye inyandiko za Musenyeri Kagame yishwe muri Jenoside yakorewe Abatutsi mu 1994
Inganji Karinga ni kimwe mu bitabo bibumbatiye amateka akomeye y'u Rwanda byanditswe na Alexis Kagame
Ni umwe mu banditsi b'abahanga u Rwanda rwagize, ubuhanga bwe ntibushidikanywaho
La Divine Pastorale ni kimwe mu bitabo byandikanywe ubuhanga bya Alexis Kagame. Yacyanditse mu 1952
Senateri Mupenzi George yasabye ko inyandiko za Musenyeri Kagame zigirwa nyinshi ku buryo abazikeneye bose bazibona byoroshye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .