Uwari Umugaba w’Ingabo z’u Bufaransa mu 1994 yabajijwe kuri Opération Turquoise araruca ararumira

Yanditswe na Habimana James
Kuya 7 Nyakanga 2019 saa 01:58
Yasuwe :
0 0

Uwari Umugaba w’Ingabo z’u Bufaransa muri Jenoside yakorewe Abatutsi mu 1994, Amiral Jacques Lanxade, yifashe yanga gusubiza ubwo yari abajijwe ku ruhare rw’ingabo ze mu gushyigikira abakoraga Jenoside binyuze muri Opération Turquoise.

Bitandukanye n’ubuhamya butangwa n’abahoze mu Ngabo z’Abafaransa bemeje ko igihugu cyabo ntaho cyahungira uruhare cyagize muri Jenoside yakorewe Abatutsi, Jacques Lanxade ufite imyaka 84, yiyerurukije ko ubutegetsi bw’u Bufaransa ntacyo bwishinja muri Jenoside yakorewe Abatutsi.

Ku wa 22 Kamena mu 1994, Umuryango w’Abibumbye ubisabwe n’u Bufaransa, wafashe umwanzuro ubwemerera kohereza ingabo mu Rwanda mu cyiswe “ Opération Turquoise”, yafatwaga nk’igikorwa kigamije ubutabazi ku bari mu kaga.

Ubuhamya bw’abarokokeye Jenoside mu Bisesero bugaragaza uburyo nyuma y’igihe birwanaho, Abatutsi bari bihishe muri aka gace bumvise Abafaransa bahageze, bibwira ko bagiye gutabarwa. Nyamara babahiseho barigendera, bagaruka nyuma y’iminsi itatu Interahamwe zimaze kwica abarenga 4000.

Ibyo bikiyongera ku ruhare u Bufaransa bushinjwa burimo guha intwaro guverinoma yateguye ndetse ikanakora Jenoside, zirimo izatanzwe mbere ya Jenoside, mu gihe yakorwaga na nyuma yayo ubwo abasirikare ba Guverinoma yateguye Jenoside bari mu mayira bahungira mu mashyamba ya Repubulika Iharanira Demokarasi ya Congo.

Nyuma y’imyaka 25 Ingabo zari iza FPR zihagaritse Jenoside yakorewe Abatutsi, uwari Umugaba w’Ingabo z’u Bufaransa mu 1994, Amiral Jacques Lanxade, BBC yamubajije ku ruhare ruregwa Ingabo z’u Bufaransa mu byabaye mu Rwanda, avuga ko bageze mu Rwanda bahagaritse ubwicanyi ndetse nta wababonye wongeye gukora Jenoside.

Ariko abajijwe ku ruhare rw’u Bufaransa mu Bisesero, Jacques Lanxade yagize ati “Ibi ntacyo nabivugaho kuko biri mu bucamanza ubu, ariko ibikorwa bigamije gusebya u Bufaransa.”

Yagaragaje ko ingabo zikunda kuvuga inshuro nyinshi ku ruhare rwazo muri Jenoside ariko abakuru b’igihugu b’u Bufaransa ntacyo babivugaho.

Yakomeje ati ‘‘Ikimbabaza ni uko ubuyobozi bukuru bw’igihugu, ba perezida basimburana butavuga bweruye ngo buvaneho uruhare rwose ku ngabo z’u Bufaransa. Abanyapolitiki ni bo bakwiye gusobanura neza kurusha abasirikare ibyabaye mu Rwanda kuko abasirikare bashyira mu bikorwa amabwiriza ya guverinoma.”

Ubuhamya bwo bubivuga ukundi

Nubwo Amiral Jacques ahakana uruhare rw’igihugu cye muri Jenoside, bagenzi be bari ku irasaniro baramuhinyuje, haba mu nyandiko n’inkuru zatangajwe.

Muribo harimo Guillaume Ancel wari ufite ipeti rya kapiteni mu gihe cya Jenoside. Mu 2018 yanditse igitabo ‘Rwanda, la fin du Silence’ ava imuzi ubufasha u Bufaransa bwahaga leta yariho burimo intwaro zahawe abajenosideri mbere na nyuma.

Colonel Guillaume Ancel yasobanuye amabwiriza bahawe yo kurinda Umujyi wa Kigali ngo utava mu maboko y’Ingabo za Leta yakoraga Jenoside, bikaza guhinduka bagasabwa kurwanya ingabo za FPR Inkotanyi.

Guillaume Ancel wari umusirikare w'u Bufaransa mu Rwanda we asanga iki gihugu ntaho cyahungira uruhare rwacyo mu byabaye mu Rwanda

Tariki 29 Gicurasi 2018 ubwo yari mu Ishuri Rikuru ryo mu Bufaransa ryigisha ubumenyi rusange, EHESS, mu biganiro byari bigamije kwibuka Jenoside yakorewe Abatutsi mu 1994, Ancel yatangaje ko u Bufaransa butahakana uruhare rwabwo muri Jenoside yakorewe Abatutsi, mu gihe bwashyigikiye ku mugaragaro, bugakingira bukanatanga intwaro kuri Leta yayikoze.

Ancel yagaragaje ko gukomeza kuzinzika amateka ngo atajya ahagaragara, ari amakosa akomeye u Bufaransa bukora ashobora no gutuma ibyabaye byongera.

Amiral Jacques Lanxade we yavuze ko ayo makuru yatanzwe atari yo.

Ati “Ni ukuri ko u Bufaransa bwatanze intwaro ariko bwatanze intwaro mu gihe cya Habyarimana kuko icyo gihe bafashaga ingabo z’u Rwanda, nyuma ntabwo u Bufaransa bwigeze bwongera gutanga intwaro. Nta n’ishingiro byari bifite, Jenoside ntiyakoreshwaga imbunda kandi nta na kimwe twafashije abategetsi b’abahezanguni b’Abahutu muri kiriya gihe, biriya byose ni ukwandika gusa, u Bufaransa nta makosa bwakoze.’’

Perezida w’u Bufaransa, Emmanuel Macron, aherutse gushyiraho Komisiyo y’abahanga mu by’Amateka izafasha mu gucukumbura ishyinguranyandiko ku ruhare rw’u Bufaransa muri Jenoside yakorewe Abatutsi.

Hari ibyo Amiral Lanxade ubwe ashinjwa

Komisiyo y’Igihugu yo Kurwanya Jenoside, CNLG, yashyize Amiral Lanxade ku rutonde rw’abasirikare b’Abafaransa bagize uruhare muri Jenoside bari i Paris.

Amiral Lanxade wabaye Umugaba w’Ingabo wihariye wa Perezida François Mitterand kuva muri Mata 1989 kugeza muri Mata 1991, nyuma aba Umugaba w’Ingabo (kuva Mata 1991 kugeza Nzeri 1995), ku mabwiriza ye, igisirikare cy’u Bufaransa cyakoze igikorwa cyo kwijandika mu byaha bikomeye byakorewe mu Rwanda hagati ya 1990 na 1994.

Nk’Umugaba w’Ikirenga w’Ingabo, Jacques Lanxade, yabonaga raporo zerekana amarorerwa yakorwaga n’Ingabo z’u Rwanda, ubwicanyi, politiki y’ivangura na Jenoside ariko akomeza kuzishyigikira aziha ibikoresho n’abantu byari bikenewe ngo zigire imyitozo n’ubushobozi bihagije.

Ashinjwa ko yatsimbararaga ku myumvire ivuga ko FPR igizwe n’Abagande ndetse akanayitiranya n’Abatutsi bose muri rusange, gutyo aba yitiranyije intambara ya politiki n’iy’ubwoko.

Mu gihe cya Jenoside, mu kanama k’umwihariko kabaye tariki ya 22 Kamena 1994, n’ako ku itariki 29 Kamena 1994, hagati ya François Mitterand na Jacques Lanxade, berekanye ibitekerezo by’ivanguramoko no gushyigikira abo bitaga Rubanda nyamwinshi y’Abahutu no kwamagana abo bitaga Abatutsi b’Abagande, ni ukuvuga FPR.

Ambasaderi Jean-Michel Marlaud yiyemereye ko ubutumwa bwose bwavaga muri Ambasade y’u Rwanda bwagenzurwaga n’uwari ushinzwe umutekano, na we akabimenyesha Jacques Lanxade na Christian Quesnot.

Amiral Jacques Lanxade ni umwe mu Bafaransa bashinjwa uruhare muri Jenoside yakorewe Abatutsi bari i Paris
Urwibutso rwa Jenoside yakorewe Abatutsi rwa Bisesero rubitse amateka akomeye ku ruhare rw'Abafaransa muri Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza