Ushinzwe DFID muri Guverinoma y’u Bwongereza yatangiye uruzinduko rw’iminsi itatu mu Rwanda

Yanditswe na IGIHE
Kuya 11 Ugushyingo 2019 saa 10:28
Yasuwe :
0 0

Umunyambanga Uhoraho ushinzwe Umuryango w’Abongereza w’iterambere mpuzamahanga (DFID), Matthew Rycroft kuri uyu Mbere aratangira uruzinduko rw’iminsi itatu mu Rwanda, rukazasozwa kuwa Gatatu tariki 13 Ugushyingo 2019.

Uruzinduko rwa Rycroft rugamije gukomeza gutsura umubano mwiza uri hagati y’u Bwongereza n’u Rwanda, mbere y’inama izahuza u Bwongereza n’ibihugu byo ku mugabane wa Afurika muri Mutarama umwaka utaha. Iyo nama izabera i Londres.

Rycroft kandi aje mu Rwanda habura igihe gito ngo habe inama ihuza ibihugu na Guverinoma bigize umuryango w’ibihugu bikoresha Icyongereza (CHOGM) izabera i Kigali muri Kamena umwaka utaha.

Mu myaka isaga 20 ishize, u Bwongereza bwabaye umufatanyabikorwa ukomeye mu iterambere ry’u Rwanda. DFID yatanze asaga miliyari imwe y’amapawundi muri iyo myaka yose (asaga miliyari 1 000 Frw) yifashishijwe mu nzego zirimo ubukungu, imibereho myiza y’abaturage, ubuhinzi, uburezi n’ibindi.

Uyu mwaka kandi binyuze muri DFID, u Bwongereza bwageneye u Rwanda ibitabo miliyoni 3.8 byo kwifashishwa n’abana biga mu mashuri abanza hirya no hino mu gihugu.

Mu ruzinduko rwe, Rycroft azasura imwe mu mishinga iterwa inkunga na DFID nka gahunda yo guteza imbere ubuhinzi bw’icyayi mu karere ka Nyaruguru yafatanyije n’ikigo cya Unilever, Luxmi, Wood Foundation na Gatsby Charitable Foundation.

DFID kandi yatanze ibihumbi 100 by’amapawundi yo gutera inkunga sosiyete ya Ampersand ikora moto zikoresha amashanyarazi kandi zihendutse. Rycroft azaganira n’abakora uwo mushinga ugamije kugabanya ibyuka byangiza ikirere mu gihugu.

Biteganyijwe ko kuri uyu wa Mbere akigera mu Rwanda, Ryacroft asura urwibutso rwa Jenoside yakorewe Abatutsi rwubatse ku Gisozi mu Mujyi wa Kigali.

Matthew Rycroft kuri uyu Mbere aratangira uruzinduko rw’iminsi itatu mu Rwanda, rukazasozwa kuwa Gatatu tariki 13 Ugushyingo 2019.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza