Urwishigishiye ararusoma; ikinyoma cya Rusesabagina nticyari buhishire ubugome bwe

Yanditswe na Musangwa Arthur
Kuya 26 Gashyantare 2021 saa 07:29
Yasuwe :
0 0

Ku Cyumweru cyo ku wa 20 Gashyantare 2005, imbere y’imbaga y’abakirisitu bari bateraniye ku rusengero rwa St. Sabina i Chicago muri Leta Zunze Ubumwe za Amerika, Paul Rusesabagina wari umushyitsi w’imena kuri uwo munsi yafashe ijambo atangira kubara inkuru y’ubuzima yanyuzemo mu Rwanda.

Yarateruye avuga uburyo yari agowe n’ubuzima muri gihe cya Jenoside yakorewe Abatutsi mu 1994, kuko uretse kuyobora Hotel des Milles Collines yari iya mbere mu zihagazeho i Kigali icyo gihe, yari anafite izindi nshingano zitoroshye, zo kurinda Abatutsi 1268 bari bayihungiyemo, kandi akabikora mu bushobozi bucye yari afite kuko ‘atishyuzaga impunzi’ muri ibyo bihe byari bikomeye.

Nyuma yo kumutega amatwi mu gihe cy’iminota 60, abari aho bose batunguwe no kumva ubutwari bw’uwo mugabo ‘bukunze kumvikana mu nkuru za filime gusa’, maze bahagurukira rimwe bamumishaho urufaya ry’amashyi impande zose mu gihe cy’iminota 10 yose, undi nawe akabarebana isura iriho akamwenyu kandi ubwo mu kiganza harimo icy’umugore we Tatiana Mukangamije, bombi bakanyuzamo bakabizamura bapepera imbaga yari ibatamirije, mbega nka kwa kundi abakomeye basuhuza rubanda mu gihe cyo gutambuka ku matapi atukura.

Nta gushidikanya ko Rusesabagina yari afite ubwamamare budasanzwe, ubwamamare yari yarambitswe na filime mbarankuru yamenyekanye ku Isi yose ya ‘Hotel Rwanda’, filime ya mbere yerekanye ubuzima bw’ibyabereye mu Rwanda mu 1994, ariko ku bw’amahirwe macye ikabyerekana macuri kuko n’ubundi imyandikire yayo yagizwemo uruhare na Rusesabagina, wavuze ko buri gace kose kayikinywemo kerekana ‘ukuri kwa nyako kw’amateka y’ibyabaye mu Rwanda’.

Don Cheadle wakinnye nka Rusesabagina muri Hotel Rwanda ari kumwe na Rusesabagina nyirizina

Ukwimakazwa kw’ikinyoma cy’umusahuzii

Filime ya ‘Hotel Rwanda’ yari umusaruro w’ibikorwa by’impurirane z’ibinyoma bya Rusesabagina, byari byaratangiye kujya hanze mu 1998, ubwo uyu mugabo yatangaga ubuhamya mu gitabo cya Philip Gourevitch, yise ‘We Wish to Inform You That Tomorrow We Will be Killed with Our Families’.

Iki gitabo cyabaye igikorwa cya mbere cyamuritse ikinyoma cya Rusesabagina ku rwego mpuzamahanga, ikinyoma cyaje gushimangirwa na filime ya Hotel Rwanda yasohotse ku wa 22 Ukuboza 2004, ndetse mu buryo bweruye, Rusesabagina agatangira kukibyaza umusaruro ku mugaragaro.

Nyuma y’iyi filime, Rusesabagina yatangiye gutumirwa hirya no hino ku Isi, akajya gutanga ibiganiro bigaruka ku bwitange bwamuranze bwaje no gutuma arokora abantu bari bamuhungiyeho, ndetse agakunda kugaruka ku kamaro k’amahoro n’ubwubahane, kuko yahise afatirana aya mahirwe yo kwirirwa mu maso y’Isi, nawe yigira impirimbanyi y’amahoro, ndetse azenguruka kaminuza nyinshi atanga inyigisho zitandukanye.

Hadaciye kabiri, ikinyoma cya Rusesabagina cyarushijeho guhama ku wa 9 Ugushyingo 2005, ubwo uyu mugabo ari kumwe n’abandi 13 barimo na Muhammed Ali wamamaye mu mukino w’iteramakofi, yahabwaga umudari w’Ishimwe n’uwahoze ari Perezida wa Leta Zunze Ubumwe za Amerika, George W. Bush, umudari uzwi nka ‘Medal of Freedom’, uhabwa abantu bagize uruhare mu guteza imbere umutekano, amahoro ndetse n’umuco ku rwego rw’Isi.

Bitewe n’ubu bwamamare, umuryango wa ‘Hotel Rwanda Rusesabagina Foundation’ Rusesabagina yari yarashinze avuga ko ugamije gufasha imfubyi za Jenoside n’abagore bafashwe ku ngufu muri iyo Jenoside yakorewe Abatutsi mu Rwanda watangiye kubona inkunga nyinshi.

Aka ya ngwe yihishe mu ruhu rw’intama, Rusesabagina yihishe muri uyu muryango maze yigwizaho umutungo karahava, atura mu nzu ihenze, akagenda mu modoka zigezweho ndetse kure y’aho atuye akahagenda mu ndege bwite, ibintu bitapfa gukorwa ‘n’umugabo usanzwe’ nk’uko yakunze kwiyita.

Rusesabagina yari mu bambitswe umudari na Perezida George W. Bush muri 2005

Ikinyoma nticyahishiriye ubugome

Uko yagendaga abona amafaranga n’ikuzo, imyitwarire ya Rusesabagina yatangiye kugenda ihinduka bamwe bagatungurwa, ariko abamuzi neza kuva na kera bakabimenya.

Nko muri Kamena 2006, hataranashira umwaka Rusesabagina yambitswe umudari na Bush, ak’ubugome karamusumbye atangira kwerekana isura ye ya nyayo.
Byatangiye ashinga umutwe yise Parti Démocratique au Rwanda-Ihumure (PDR-Ihumure), bitungura benshi kuko batari biteze urukomatanye rw’umutwe wa politiki na gahunda z’ubugiraneza.

Abantu bakiri kwibaza ibibaye ni bwo uyu mugabo yafashe indege yerekeza i Barcelona muri Espanye, ajyanywe no guhura n’abagize umutwe w’iterabwoba wa FDLR, urimo bamwe mu basize bakoze Jenoside mu Rwanda bagahungira mu mashyamba ya Repubulika Iharanira Demokarasi ya Congo, aho bakomeje ibikorwa bya kinyamaswa birimo kwica abaturage ndetse no gusambanya abagore ku ngufu.

Wibaze nawe umuntu wahembewe kugira uruhare mu gutabara abahigwaga muri Jenoside, yarangiza akagira ubugwari bwo guhindukira akajya kwifatanya n’abayigizemo uruhare mu buryo butaziguye, nyamara ntibibuze bamwe gukomeza kumufata nk’intwari.

Muri uwo mwaka kandi, Rusesabagina yariyamiriye abwira Voice of America ko mu Rwanda habaye jenoside ebyiri, ikintu yakomeje kugarukaho inshuro nyinshi n’ubwo byemejwe n’umuryango w’Abibumbye ko mu Rwanda habaye Jenoside yakorewe Abatutsi mu 1994.

Mu mwaka wakurikiyeho, ubugome bwa Rusesabagina bwakomeje kwigaragaza nyuma y’uko avugiye kuri Chicago Public Radio ko FPR yagize uruhare muri Jenoside. Iki gihe cyose, ibi bikorwa by’uyu mugabo byari mu ntangiriro, ariko ab’inkwakuzi, barimo na bamwe mu bashyira mu gaciro mu Burayi na Amerika, batangiye kumunyuzamo ijisho no kwitandukanya nawe.

Imikoranire ya FDLR na Rusesabagina yakomeje gutera imbere mu mwaka wa 2007, ubwo uyu mugabo yajyaga muri Afurika y’Epfo kwitabira inama y’uwo mutwe wari uhanganye n’u Rwanda muri ibyo bihe, kandi ubwo agahindukira akajya kwigisha amahoro avuye muri iyo migambi mibisha n’imitwe y’iterabwoba.

Mu mwaka wa 2008 Rusesabagina yakomeje ubufatanye bwe na FDLR, ndetse muri Gicurasi uwo mwaka biza kugaragara ko uyu mugabo agirana ubufatanye bukomeye n’abayobozi b’uwo mutwe, nk’uko byagaragajwe mu butumwa bwahererekanyijwe na Victor Byiringiro na Ignace Murwanashyaka, bari mu bayobozi bakomeye ba FDLR.

Mu Ukuboza uwo mwaka kandi, ishyaka rya Rusesabagina, PDR-Ihumure, ryifatanyije na RUD Urunana yari imaze kwiyomora kuri FDLR.

Mu Ugushyingo 2010, u Rwanda rwasabye U Bubiligi gukurikirana Rusesabagina kuko bishoboka ko yaba atera inkunga imitwe y’iterabwoba irimo FDLR. U Bubiligi bwakoze iperereza busanga ibyo birego bifite ishingiro, ndetse muri Kamena 2011, icyo gihugu kibaza Rusesabagina mu gihe cy’amasaha atatu kuri icyo cyaha, icyo gihe abashinjacyaha b’u Rwanda bari bitabiriye iryo bazwa.

Mu mwaka wa 2012, Rusesabagina yashwanye na Kayumba Nyamwasa asohoka muri RNC, gusa akomeza ibikorwa bye ndetse mu mwaka wa 2014, aza guca amarenga ko ashobora gushoza intambara ku Rwanda. Yifashishije amagambo y’uwari Umunyamabanga wa Leta Zunze Ubumwe za Amerika, John Kelly, yaragize ati ‘’Nkunda amahoro kandi niba intambara ikenewe kugira ngo aboneke, nzayirwana’’. Abajijwe neza icyo ashatse kuvuga, yasubije ko atakivuga kuko kwaba ari nko kwereka abo muhanganye ikarita ugiye gukina.

Mu 2016, Rusesabagina yaremye impuzamashyirahamwe ya MRCD igizwe n’umutwe we, PDR Ihumure na CNRD Ubwiyunge yari iyobowe na Wilson Irategeka. Aba bombi baje kwiyungwaho na RRM ya Callixte Sankara muri 2018. Muri Gicurasi uwo mwaka, iyi mpuzamashyirahamwe yaje gushinga umutwe w’inyeshyamba wa FLN wahise unatangira kugaba ibitero mu turere twa Nyaruguru na Nyamagabe mu Majyepfo y’u Rwanda.

Kuri Noheli yo mu mwaka wa 2019, Rusesabagina yatangaje intambara yeruye ku Rwanda, asaba abantu bose kuyitabira ‘kuko ari bwo buryo bwonyine busigaye bwo kubohora Abanyarwanda’, nyuma y’uko izindi nzira zose zari zageragejwe bikananirana.

Kuva icyo gihe, FLN yakomeje kugerageza kugaba ibitero mu Rwanda, ndetse igerageza no gushinga ibirindiro mu gihugu cy’u Burundi, ari naho Rusesabagina yafashwe yerekeza muri Kanama 2020, mu bikorwa bifitanye isano n’uwo mutwe, ariko akisanga i Kigali mu maboko y’Urwego rw’Ubugenzacyaha, RIB.

Kuri ubu uyu mugabo ari imbere y’ubutabera, aho ari gushinjwa ibyaha icyenda birimo Kurema umutwe w’ingabo utemewe cyangwa kuwujyamo, Gutera inkunga iterabwoba, Iterabwoba ku nyungu za politiki, Gukora no kugira uruhare mu bikorwa by’iterabwoba, Kuba mu mutwe w’iterabwoba, Kugambana no gushishikariza abandi gukora iterabwoba, Ubufatanyacyaha ku cyaha cy’ubwicanyi buturutse ku bushake, Ubufatanyacyaha ku cyaha cyo kwiba hakoreshejwe intwaro n’Ubufatanyacyaha ku cyaha cyo gutwikira undi ku bushake inyubako.

Ijambo Rusesabagina yavuze atangaza intambara ku Rwanda

Uyu mugabo yishoye mu bikorwa byo kwifatanya n'imitwe irwanya leta y'u Rwanda
Rusesabagina yaje gutabwa muri yombi ya RIB
Rusesabagina akomeje kuburana yiregura ku byaha icyenda aregwa
Rusesabagina afungiye muri gereza ya Mageragere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .