00:00:00 IGIHE NETWORK KN KINYARWANDA EN ENGLISH FR FRANCAIS

Urubyiruko rwibukijwe ko ingengabitekerezo ya Jenoside ari icyaha gihanwa n’amategeko

Yanditswe na Mugisha Christian
Kuya 15 April 2022 saa 10:33
Yasuwe :

Urubyiruko rwo mu Karere ka Kayonza rwibukijwe ko gukwirakwiza ingengabitekerezo ya Jenoside ari icyaha gihanwa n’amategeko, bityo ko rukwiriye kuyizibukira.

Ibi byagarutsweho kuri uyu wa Gatanu tariki ya 15 Mata ubwo uru rubyiruko rwasuraga Urwibutso rwa Jenoside yakorewe Abatutsi ruri i Kigali ku Gisozi, rukaba rushyinguyemo abarenga ibihumbi 250.

Uru rubyiruko rusaga 250 rwunamiye inzirakarengane zazize Jenoside yakorewe muri 1994 ndetse banasobanukirwa amateka y’Urugamba rwo kubohora Igihugu no guhagarika Jenoside rwatangijwe n’Ingabo za FPR-Inkotanyi.

Bamwe mu baganiriye na IGIHE bavuze ko batabona umwanya uhagije wo kuganira n’ababyeyi babo ku mateka yaranze u Rwanda, ariko kuba bakoze uru rugendo byatumye barushaho gusobanukirwa ibyo bigishwa mu mashuri.

Ngiruwonsanga Noela yavuze ko amateka yabonye yamwigishije ko afite umukoro wo kurwanya abapfobya Jenoside yakorewe Abatutsi.

Umuhuzabikorwa w’Inama y’Iguhugu y’Urubyiruko mu Karere ka Kayonza, Rukundo Pacifique, yavuze ko ari ingenzi kwigisha urubyiruko ibijyanye n’amateka ya Jenoside yakorewe Abatutsi.

Yagize ati “Habaho inama z’urubyiruko nyinshi, mu mashuri bigishwa ayo mateka, ndetse hari n’urundi rubyiruko ruzi amateka, ubwo rero gupfobya no guhakana Jenoside yakorewe Abatutsi witwaje kutamenya byo sibyo."

Yaboneyeho kwibutsa urubyiruko ko ingengabitekerezo ya Jenoside ari icyaha gihanwa n’amategeko kandi iri tegeko rikora ku bavutse mbere na nyuma ya Jenoside yakorewe Abatutsi mu Rwanda mu 1994.

Umuyobozi w’Ibikorwa by’Abakorerabushake mu Karere ka Kayonza, Matabaruko Faustin, yavuze ko nyuma y’uru rugendo, bagiye kugenda bakigisha abandi.

Yagize ati “Urubyiruko rupfobya Jenoside yakorewe Abatutsi, rugomba kuza hano cyangwa bakajya ku zindi nzibutso ziri hirya no hino mu gihugu bakabona ishusho nyakuri y’ibyabaye hanyuma bagahitamo inzira nyayo, ikwiye.”

Umuyobozi w’Akarere Wungirije Ushinzwe Imibereho myiza y’Abaturage mu Karere ka Kayonza, Harerimana Jean Damascene, yavuze ko uru rubyiruko rwahisemo kuza gusura Urwibutso ndetse n’Ingoro y’amateka yo kubohora Igihugu bityo nabo bakabashyigikira.

Yagize ati “Urubyiruko rumwe rwagize uruhare muri Jenoside yakorewe Abatutsi ariko nanone urundi rugira uruhare mu kubohora igihugu, niyo mpamvu rero hari ibyo urubyiruko rw’ubu rusabwa mu iterambere ry’igihugu cyabo.”

Yavuze ko basabwa “Kumenya amateka mabi yaranze igihugu cyacu, ndetse no gufata ingamba zo kugira ngo Jenoside itazongera kubaho, byose bigakorwa mu ruhare rw’urubyiruko.”

Yakomeje avuga ko urubyiruko rufite inshingano zo guteza imbere igihugu ndetse n’inshingano yo kubanisha neza abaturage bacyo, abasaba kwifashisha ikoranabuhanga mu kuvuga amateka y’ukuri yaranze igihugu cyacu bavuguruza abayagoreka.

Umuyobozi w’Akarere wungirije ushinzwe imibereho myiza y’Abaturage mu Karere ka Kayonza, Umuyobozi w’Inama y’Urubyiruko, Umuyobozi w’Ibikorwa by’Abakorerabushake, Umuyobozi Ushinzwe Imikoranire myiza hagati ya Polisi n’Abaturage mu Karere ka Kayonza, IP Kayitesi Marie Antoinette, ndetse n’abandi batandukanye bari bitabiriye iki gikorwa.

Urubyiruko ruturutse mu Karere ka Kayonza rwasuye Urwibutso rwa Jenoside yakorewe Abatutsi ruri ku Gisozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .