00:00:00 IGIHE NETWORK KN KINYARWANDA EN ENGLISH FR FRANCAIS

Ni bande bagize ibihumbi 80 bifungiye muri gereza zo mu Rwanda?

Yanditswe na Akayezu Jean de Dieu
Kuya 22 July 2022 saa 05:08
Yasuwe :

Kugira ngo umuntu ajyanwe muri ‘Gereza’ ni uko aba yaragomeye Sosiyete Nyarwanda, ubundi gufunga ni uburyo bwashyizweho kugira ngo uwanyuranyije n’amahame ya ‘sosiyete’ runaka abe yajya ahantu agororwe, asubire ku murongo.

Kugira ngo iyo ntego yo kugorora uwagomeye Sosiyete Nyarwanda igerweho, mu 2010 hashyizweho Urwego rw’Igihugu Rushinzwe Imfungwa n’Abaororwa, RCS [Rwanda Correctional Services].

Ni urwego rwahurije hamwe icyahoze ari ‘Urwego rushinzwe Amagereza [National Prison Services] ndetse n’Urwego rwarebereraga Imirimo Nsimburagifungo Ifitiye Igihugu Akamaro, TIG.

RCS yaje ifite intego yo kuva muri ya myumvire y’uko gereza ari ahantu abantu bajya guhanirwa, ahubwo bihinduka ahantu abantu bajya kugira ngo bahinduke, bagororwe nibasoza igihe runaka bazasubire mu Muryango Nyarwanda gufatanya n’abandi kubaka igihugu.

Kuri RCS, umuntu yoherezwa muri gereza kurangiza igihano yahawe n’inkiko ariko ntabwo yoherezwayo guhanwa. Kugeza ubu mu gihugu hari gereza 13 n’inkambi ebyiri z’abantu bakora ibihano nsimburagifungo.

Harimo gereza zirindwi z’abagabo gusa, ebyiri z’abagore gusa, eshatu zihuriyemo igice cy’abagabo n’ikindi cy’abagore ndetse na Gereza ya Nyagatare ifungirwamo abana batarageza imyaka 18.

Imibare ya RCS yo ku wa 20 Nyakanga 2022, igaragaza ko muri izo gereza harimo Imfungwa n’Abagororwa barenga gato ibihumbi 80.

Barimo abagore barenga ibihumbi bitanu ni ukuvuga ko bangana na 7%, hakaba kandi n’abagore bagera kuri 400 babana n’abana babo, aha umugore aba yarageze muri gereza atwite cyangwa afite uruhinja rutarageza ku myaka itatu y’amavuko.

Iyo urebye muri aba bantu bafunze, usanga abagera kuri 75,6% barimo gukora ibihano bitarengeje imyaka 30 y’igifungo, 3,6% bakatiwe igihano kirenga imyaka 30 hanyuma 9,9% bakatiwe igihano cyo kuzafungwa ubuzima bwabo bwose.

Ibyaha byiganje muri gereza ni 26,2% bafungiye ibyaha bifitanye isano na Jenoside yakorewe Abatutsi, abandi 17,2% bafungiye ibyaha bijyanye n’ubujura. Ni mu gihe abafungiye ibiyobabwenge ari 11,4%.

Ibyaha byo gukubita no gukomeretsa ni bituma abagera kuri 11,2% naho ibijyanye no guhohotera abana ni 10,3%.

RCS igaragaza ko urubyiruko ari rwo rufunzwe ku bwinshi kubera ko 57% bafite imyaka iri munsi ya 40, mu gihe kandi mu bafunzwe nibura 80% batigeze bakandagiza ikirenge cyabo mu mashuri yisumbuye.

Komiseri Mukuru wa RCS, CGP Juvenal Marizamunda, agaragaza ko iyo bagorora umuntu baba bagamije kugira ngo ahinduke, bamutegure kuzaba umuntu uzasubira aho yavuye yaragororotse adashobora kongera gukora ibyaha byatumye yisanga muri gereza.

Ati “Twebwe buri gihe ibibazo dusigarana ni ukuvuga ngo ese aba bantu twarabateguye bihagije ku buryo bari busubire mu muryango bakaba abantu bazima cyangwa Abanyarwanda bazima?”

Yakomeje agira ati “Ese aba bantu igihe cyose bamaze muri gereza hari icyo bize kizabafasha kubaho ubuzima bufite akamaro? Ese ibyo twakoze bizabafasha gusubira mu muryango ku buryo bworoshye? Ese inyigisho twabahaye zizabarinda kongera kugaruka muri gereza? Tuba duharanira ko twagira ikintu dukora gifasha wa muntu twakiriye kugira ngo ahinduke.”

Kugorora uwagomeye ‘Sosiyete’...

Guverinoma y’u Rwanda ibinyijije muri RCS ku bufatanyije n’izindi nzego hashyizweho uburyo butandukanye na gahunda zifasha mu kugorora aba bari muri za gereza zitandukanye kugira ngo babashe kuzasubira mu Muryango Nyarwanda barahindutse.

Hari abiga gusoma, abiga imyuga ndetse n’abana biga amashuri asanzwe bakazanakora ibizamini bya Leta bikorwa n’abandi banyeshuri. Ku rundi ruhande ariko, hari ababa bararenze igihe cyo kwiga yaba iyo myuga, gusoma no kwandika cyangwa se amashuri asanzwe.

Ubushakashatsi ku bijyanye no kwigira Kaminuza n’amashuri makuru muri gereza bwakorewe i New England muri Leta zunze Ubumwe za Amerika, bwerekanye ko imfungwa n’abagororwa badafite nibura amashuri yisumbuye bongeye gukora ibyaha ku kigero cya 60%, mu gihe abize nibura kaminuza byari ku kigero kiri munsi ya 19%.

CG Marizamunda avuga ko nko mu Rwanda, iyo urebye ubona hafi 80%, batigeze batangira amashuri yisumbuye.

Ati “Ni imbogamizi ikomeye kubera ko bituma uwo muntu ashobora kuzasohoka yagera hanze akongera gukora ibyaha. Niyo mpamvu icyo dukora cy’ibanze ari ukubanza kureba uko uwo muntu tumwigisha gusoma no kwandika nyuma akabona kwiga n’indi myuga.”

Leta y’u Rwanda ifite gahunda yo kugira abaturage bajijutse, bize amasomo atandukanye cyangwa imyuga ijyanye n’igihe tugezemo. Ni gahunda rero ireba Abanyarwanda bose kandi n’umuntu uri muri gereza nawe ni Umunyarwanda.

Ubushakashatsi bwakozwe n’Ishuri ryigisha rikanateza imbere amategeko, ILDP, bwagaragaje ko izo gahunda zo kugorora no gusubiza mu buzima busanzwe abahoze muri gereza zitagera hose ku kigero kingana. Niyo mpamvu hateguwe imfashanyigisho izashyirwa muri gereza zose zo mu Rwanda kugira ngo ijye yifashishwa mu kugorora no kwigisha abafunzwe bategurirwa kuzasubira mu Muryango Nyarwanda baragororotse.

Ni imfashanyigisho izafasha Urwego Rushinzwe Imfungwa n’Abagororwa, RCS, mu kugira ngo abazajya basubizwa mu Muryango Nyarwanda bajye baba baragororotse ariko bashobora no kugira umusanzu batanga mu kubaka igihugu cyabo binyuze mu gukora ibikorwa bijyanye n’ayo masomo bazajya baba barigishirijwe muri gereza.

Impamvu ari ngombwa kwigisha ‘umugororwa’

Muri rusange abafunzwe kuri ubu bigishwa amasomo ajyanye no gusoma no kwandika, uburere mboneragihugu, kurwanya ingengabitekerezo ya Jenoside, gahunda zo kwirinda ibyaha n’ibindi.

Mu kiganiro aherutse kugirana na IGIHE, Umuyobozi w’Umuryango DIDE (Dignité en Détention Rwanda), Mukansoro Odette, yavuze ko umuntu uba wakoze icyaha n’ubwo aba yagonganye n’amategeko akisanga muri gereza, ariko nawe aba akiri Umunyarwanda kandi ushobora guhinduka.

Mukansoro avuga ko kumutegura mu mutwe, ukamwigisha, umwumvisha ko icyaha yakoze ashobora kwihana agahinduka, ari yo nzira nziza yo kumutegura mu mutwe kuko iyo udatekanye mu mutwe ibindi byose biba ari ubusa.

Yagize ati “Abenshi iyo bisanze muri gereza usanga babanza gusa n’aho bahungabanyeho kubera kuhatinya, niyo mpamvu intambwe ya mbere ari ukubanza kumutegura mu mutwe ibindi bikaza nyuma, kandi ubona ko byagiye bigira akamaro, cyane nk’iyo umubyeyi asize abana kwakira icyo kintu biragora, ariko [iyo mumwegereye] mukumuganiriza agera aho akabyakira ubuzima bugakomeza.”

Umushakashatsi mu Ishuri ryigisha rikanateza imbere amategeko, ILDP, Dr. Michael Rwibasira avuga ko kwigisha abakoze ibyaha ari yo nzira nziza yo gutegura uri muri gereza kuzasubira mu muryango yaragororotse.

Ati “Mu by’ukuri iyo umugorororwa usigaje igihe gito kugira ngo asoze ibihano yigishijwe bamutegura gusubira mu muryango, kumutegura kugira ngo azabe afite icyo azimarira we n’umuryango we anagire uruhare mu iterambere ry’Igihugu cye, bijyanye n’ubumenyi yahawe mbere yo gusoza igihano asubira mu muryango.”

Umuyobozi w’Umuryango Prison Fellowship, ukora ibikorwa birimo ivugabutumwa mu magereza, Bishop John Rucyahana yavuze ko kwita ku muntu wakoze icyaha agafungwa, ntahabwe akato ari uburyo bwiza bwo gufasha umunyacyaha kwisuzuma ntazabyongere.

Yagize ati “Nta muntu utakora icyaha, kuba yagikoze bikaba ngombwa ko ajyanwa muri gereza agomba kwakirwa nk’abandi bantu bose ahubwo hakabaho urugendo rwo kumwitaho ategurwa gusubira mu buzima busanzwe."

Yakomeje ati "Urugero ni nko ku bantu bakoze Jenoside [yakorewe Abatutsi] bigishijwe ububi bw’icyaha bakoze bagafata iya mbere bagasaba imbabazi abo biciye kubera inyigisho bahawe zibohora imitima ndetse bakemera no kuvugisha ukuri, bitewe n’uko babonye ko nubwo bafunze, batari ibicibwa muri sosiyete. Ibi bigaragaza ko iyo uri muri gereza yigishijwe neza, agororoka akaba Umunyarwanda muzima."

Umuyobozi w’Ishami rishinzwe kugorora muri RCS, ACP Alex Bahizi Kimenyi, avuga ko bagitangira gahunda yo kugorora bigishaga gusoma no kwandika gusa, nyuma baza gusanga bidahagije hakenewe ubundi buryo bwo kwita ku wakoze ibyaha, hakwiye kongerwamo n’ibindi nk’imyuga n’ubumenyingiro.

Urubyiruko ruri mu bantu bafite ibyago byinshi byo gutabwa muri yombi
Umuyobozi w’Umuryango DIDE (Dignité en Détention Rwanda), Mukansoro Odette, yavuze ko umuntu uba wakoze icyaha n’ubwo aba yagonganye n’amategeko akisanga muri gereza, ariko nawe aba akiri Umunyarwanda kandi ushobora guhinduka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .