00:00:00 IGIHE NETWORK KN KINYARWANDA EN ENGLISH FR FRANCAIS

UR yatanze buruse ku banyeshuri bahize abandi mu irushanwa ry’imibare

Yanditswe na Ntabareshya Jean de Dieu
Kuya 21 May 2022 saa 10:11
Yasuwe :

Abanyeshuri bane bahize abandi mu irushanwa ry’imibare ritegurwa na Kaminuza y’u Rwanda (UR) bemerewe buruse yo kwiga muri iyo Kaminuza nk’igihembo nyamukuru cy’irushanwa nyuma yo kwitwara neza kurusha abandi.

Kuva mu 2018, nibwo UR ibiherewe uburenganzira na Minisiteri y’Uburezi, yatangije ibikorwa byo gutegura irushanwa ry’imibare mu rwego rwo gukundisha abiga mu mashuri yisumbuye amasomo ya siyanse n’imibare.

Ni irushanwa ngarukamwaka ritangirira ku rwego rw’ikigo abanyeshuri barushanwa hagati yabo, rikazagera ku rwego rw’igihugu. Kuri iyi nshuro, abanyeshuri basaga 100 biga ku bigo 34 byo hirya no hino mu gihugu bageze mu cyiciro cya nyuma.

Aba banyeshuri bakora ibizamini bitandukanye by’imibare birimo ibyo ku rwego rw’abantu basoje amashuri yisumbuye, ari nayo mpamvu gutsinda ibi bizamini bisaba kuba ufite ubuhanga bwisumbuyeho.

Kuri uyu wa Gatanu tariki ya 20 Gicurasi 2022, abanyeshuri bakoze ikizamini cya nyuma cyamaze amasaha atatu hanyuma bagira umwanya wo kuruhuka ari nako abashinzwe gukosora nabo bahuzaga amanota bagize mu byiciro bitandukanye.

Bigendanye n’ibihembo byateguwe na Kaminuza y’u Rwanda itegura iri rushanwa kimwe n’abafatanyabikorwa bayo barimo Ikigo Nyafurika cy’Imibare (AIMS), Ambasade ya Suède mu Rwanda, Kaminuza ya Amsterdam mu Buholandi, MasterCard Foundation n’ibindi bitandukanye, hahembwe abanyeshuri 14 ndetse uyu mubare ukazongerwa mu minsi iri imbere.

Abanyeshuri bane bahembwe kuziga muri Kaminuza y’u Rwanda batishyura kandi bahabwa buruse yo kubatunga mu gihe bari kwiga mu mashami bazifuza. Aha harimo abanyeshuri babiri b’abahungu na babiri b’abakobwa.

Aba kandi babonye n’ibindi bihembo birimo mudasobwa, IPad nshya, n’impano ikomeye yatanzwe na Kaminuza ya Amsterdam itigeze itangazwa mu ruhame.

Ku mwanya wa mbere hari umunyeshuri wiga muri New Vision, Mugiraneza David Divin, akurikirwa na Niyibizi Prince wiga mu mwaka wa Gatandatu muri GS Saint Aloys i Rwamagana. Umukobwa wabaye uwa gatatu ni Akimana Nadine wiga muri Ecole de Science de Byimana na Gihozo Charite wiga muri Ecole de Science de Musanze.

Mu bindi bihembo byatanzwe harimo Laptop zatanzwe ku bantu umunani ba mbere, IPad zo zahawe batatu ba mbere, n’ibihumbi 200 Frw ku bandi banyeshuri baje muri 14.

Mu banyeshuri begukanye ibihembo harimo Dukuzimana Merci Richard wiga muri Petit Seminaire St Leon Kabgayi, Ntivuguruzwa Cyuzuzo Ali wiga muri Ecole de Science de Byimana, Ineza orlyse Gahozo wiga muri Girls School na mugenzi we Muhorakeye Aimee Christella.

Hari kandi Musoni Protais wiga College de Christ Roi, Manzi Mugeni Arsene wiga muri Group Scolaire de Remera Rukoma, Dusenge Cedric Roger wa Petit Seminaire Rwesero, Irakarama Alain wiga muri Petit seminaire Ndera, Kagaba Shingiro Etienne wa Lycee de Kigali na Kwizera Patrick wiga muri Group Scolaire Saint Joseph Kabgayi.

Mu kiganiro cyatanzwe na Padiri Charles usanzwe yigisha muri Petit Seminaire St Leon Kabgayi, yavuze ko imibare ari izingiro ry’ibintu byose kandi ko abahanga muri yo bayihuza n’ubuzima busanzwe bagendeye ku bintu karemano.

Umuyobozi wa Koleje y’Ikoranabuhanga muri Kaminuza y’u Rwanda Dr. Ignace Gatare yasabye aba banyeshuri kwiga imibare bashyizeho umwete kuko umuntu utazi imibare agorwa no kubaho.

Yakomeje agira ati “Iyo ugiye mu nzego zose usanga imibare irimo, niba ukoresheje indege murabibona ko abapilote bifashisha imibare kugira ngo bamenye amerekezo y’aho bagana. Imibare kandi igaragara ahantu hose, yaba ku bikoresho byisumbuye by’ikoranabuhanga bikorerwa mu mibare, ibikorwaremezo byisumbuyeho ndetse n’ibintu byinshi bishingira ku mibare.”

Umukozi wari uhagarariye Ambasade ya Suède, Dr. Barni Nor, yasabye aba banyeshuri gukomeza gushyira imbaraga mu mibare cyane ko ifite akamaro mu buzima bwa buri munsi ndetse n’imibanire y’abantu binyuze mu kunoza imitekerereze.

Mugiraneza David Divin niwe wegukanye umwanya wa mbere
Gihozo Charite wiga muri Ecole de Science de Byimana yabaye uwa kane
Akimana Nadine yabaye uwa gatatu
Abanyeshuri bari bakataje mu bizamini
Abanyeshuri bari bakaniye ikizamini cy'imibare bamwe bakunze kuvuga ko ari isomo rikomeye
Abanyeshuri baturutse mu bigo 34 bitabiriye iri rushanwa
Abanyeshuri basabwe gushyira imbaraga mu mibare kuko ari ingenzi mu buzima
Umuyobozi wa Koleje y’Ikoranabuhanga muri Kaminuza y’u Rwanda Dr. Ignace Gatare yasabye aba banyeshuri kwiga imibare bashyizeho umwete kuko umuntu utazi imibare agorwa no kubaho
Abanyeshuri basaga 100 nibo bari bitabiriye iki kizamini
Prof. Diletta Martinelli wari uhagarariye Kaminuza ya Amsterdam muri iki gikorwa
Umukozi wari uhagarariye Ambasade ya Suède, Dr. Barni Nor, yasabye aba banyeshuri gukomeza gushyira imbaraga mu mibare
Abanyeshuri 14 bahembwe
Hafashwe ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .