00:00:00 IGIHE NETWORK KN KINYARWANDA EN ENGLISH FR FRANCAIS

UNILAK yahembwe muri kaminuza zitwara neza ku isoko ry’umurimo muri Afurika

Yanditswe na Mukahirwa Diane
Kuya 6 Ukuboza 2020 saa 12:40
Yasuwe :
0 0

Kaminuza y’Abalayiki b’Abadiventisiti (UNILAK) yegukanye umwanya wa kabiri mu ziteza imbere umurimo mu bayirangizamo mu Irushanwa ryiswe “ACCESS Idea Competition” ryahuje kaminuza 33 zo muri Afurika.

UNILAK yagizwe iya kabiri inyuma ya Kaminuza yo muri Benin, mu gihe iya gatatu yabaye iyo muri Kenya.

“ACCESS Idea Competition” ni irushanwa ryibanze cyane ku buryo amashuri makuru na kaminuza zitandukanye muri Afurika zifasha abazirangizamo guhatana ku isoko ry’umurimo nyuma yo gusoza amasomo.

UNILAK ni yo yahize kaminuza zo mu Rwanda ziitabiriye iri rushanwa, ikaza gutoranywa muri eshatu zageze mu cyiciro cya nyuma.

Nyuma yo guhembwa, UNILAK iri muri kaminuza zakomorewe ku gutanga amasomo muri iki gihe cya COVID-19. Ku ikubitiro yahereye ku mwaka wa gatatu, ariko ku wa 3 Ukuboza yakiriye icyiciro cy’abiga mu mwaka wa mbere n’uwa kabiri.

UNILAK kimwe n’andi mashuri byahagaritse gutanga amasomo muri Werurwe, ubwo COVID-19 yagaragaraga mu Rwanda hakagira imirimo imwe n’imwe ihagarara mu rwego rwo kwirinda ikwirakwira ry’iki cyorezo.

Iyi kaminuza imenyereweho gutanga amasomo y’Icyiciro cya Kabiri n’icya gatatu cya kaminuza, mu mashami atandukanye arimo Icungamutungo, Amategeko, Ikoranabuhanga n’Imicungire y’Ibidukije; yose atangwa ku biga ku manywa, aba nijoro n’abo mu mpera z’icyumweru.

Umuyobozi ushinzwe Inozabubanyi muri UNILAK, Kayitesi Irakoze Nina, yavuze ko bashyizeho uburyo buzwi nka ‘Blended mode’ aho abanyeshuri bamara amasaha make mu ishuri, andi bakayakurikirana bifashishije ikoranabuhanga.

Yagize ati “Ubu dufite urubuga ruri kuri internet ruriho amasomo yose n’imyitozo igomba gukorwa ndetse n’ibindi bitandukanye wakwiyunguriraho ubumenyi. Abanyeshuri bazajya biga bamare igihe gito mu ishuri, ikindi gihe bigire kuri murandasi.”

Yavuze ko abanyeshuri n’abakozi ba kaminuza bagomba kubahiriza ingamba zashyizweho mu kwirinda ko muri kaminuza hagaragara ubwandu bwa COVID-19.

Ati “Natwe twubahiriza ariya mabwiriza yashyizweho n’inzego z’ubuzima yo kwirinda COVID-19. Iyo umunyeshuri yinjiye mu kigo apimwa umuriro, agakaraba intoki, ubundi akandikwa ko yinjiye mu kigo binyuze mu buryo bw’ikoranabuhanga twashyizeho.”

“Mu ishuri rero abanyeshuri bose n’abarimu baba bambaye udupfukamunwa kandi bahana intera ya metero ebyiri hagati y’umwe n’undi mu rwego rwo kwirinda kwanduzanya.’’

Mu gushyira igitsure ku iyubahirizwa ry’ingamba z’ubwirinzi, UNILAK yashyizeho ibihano ku bazajya barenga ku mabwiriza yo kwirinda yaba umunyeshuri n’abandi bakozi ba kaminuza.

Biteganyijwe ko umunyeshuri uzanyuranya n’amabwiriza azajya yamburwa ikarita y’ishuri, niyongera gufatwa ubwa kabiri ahanishwe kumara igihembwe atiga, ku buryo biha abandi isomo.

Kayitesi yakomeje ati “Ku bakozi uzajya afatwa bwa mbere azajya ahabwa ibaruwa yo kwihanangirizwa, ubwa kabiri ahagarikwe ku kazi ukwezi kandi adahembwa.”

Kaminuza ya UNILAK yashinzwe mu 1997 n’ababyeyi b’Abalayiki b’Abadiventisiti. Ifite amashami i Kigali, i Nyanza na Rwamagana, ikaba imaze gushyira ku isoko abagera ku 13 306 barimo ab’igitsina gabo 5442 n’ab’igitsina gore 6282.

UNILAK ni imwe muri Kaminuza zizwiho gutanga ireme ry'uburezi mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .