Aya masezerano yashyizweho umukono ubwo Samoa yakiraga inama y’abakuru b’ibihugu na za Guverinoma y’Umuryango Commonwealth w’ibihugu bikoresha Icyongereza (CHOGM), hagati ya tariki ya 21 n’iya 26 Ukwakira 2024.

Mu kiganiro na IGIHE, Minisitiri Nduhungirehe yagize ati“Samoa ni igihugu tugiye gukorana kandi twaranakoranaga kuko iyo uyobora uyu muryango, haba icyitwa Troika, aho igihugu kiyobora umuryango gifatanya n’ikindi gihugu cyacyuye igihe mu kuyobora n’igihugu kizaza.”

Minisitiri Nduhungirehe yasobanuye ko kuva muri Kamena 2022 kugeza mu Ukwakira 2024, u Rwanda rwifatanyaga n’u Bwongereza ndetse na Samoa mu kuyobora Commonwealth, mu yindi imyaka ibiri ikurikiyeho rukazifatanya na Samoa na Antigua & Barbuda.

Yasobanuye ko nyuma yo kugirana na Samoa amasezerano y’umubano muri dipolomasi, u Rwanda rwiteze kugirana n’iki gihugu andi masezerano arimo ay’ubufatanye mu guteza imbere ubucuruzi, imigenderanire n’ubukerarugendo.

Ati “Samoa twasinye amasezerano ashyiraho umubano muri dipolomasi, bikazadufungurira amarembo mu gusinya n’andi masezerano, mu kureba ibikorwa twakorana, byaba ibijyanye no guteza imbere ubucuruzi hagati y’ibihugu, guteza imbere imigenderanire, abanyeshuri bakajya kugira ibyo bigayo, guteza imbere ubukerarugendo n’ibindi byinshi.”

Samoa ni ikirwa gifite ubuso bwa kilometero kare 2.842 kiri mu Nyanja ya Pacifique. Ubukungu bwayo bushingira ahanini ku musaruro ukomoka ku buhinzi ndetse n’ibikorwa by’ubukerarugendo.

Minisitiri Nduhungirehe yasobanuye ko Samoa ari igihugu gifite ubukerarugendo buteye imbere bitewe ahanini no kuba kiri mu nyanja nini ku Isi, Pacifique, agaragaza ko cyasangiza u Rwanda ubunararibonye mu guteza imbere uru rwego.

Minisitiri Nduhungirehe ni we wasinye amasezerano ashyiraho umubano wa dipolomasi w'u Rwanda na Samoa

Ku ruhande rwa Samoa, Minisitiri w'Intebe Afioga Fiamē Naomi Mata’afa ni we wayasinye

Minisitiri Nduhungirehe yatangaje ko aya masezerano azugurura amarembo y'ubundi bufatanye

Ubwiza bwa Samoa

Faleolo International Airport yafunguwe ku mugaragaro mu 2018 nyuma yo kuvugururwa

Lalomanu Beach ni ahantu hakundwa cyane n'abagenderera iki gihugu

Muri To-Sua Ocean Trench haba umunyenga udasanzwe

Imigenzo gakondo ni kimwe mu byakirizwa abasura Samoa

To Sua Ocean Trench ni umwobo ufite amateka akomeye

Isumo rya Afu Aau rifite ubwiza bukomeye

Taumeasina Island Resort ni imwe muri hotel zikomeye muri Samoa

Return to Paradise Resort & Spa ni indi hotel nziza mu Murwa Mukuru Apia

Saletoga Sands Resorts ikundwa cyane n'abasura Samoa

Mu isoko rya Fugalei habonekamo ibiribwa bitandukanye

Uru rusengero ni urwa Arkidiyosezi ya Apia, Umurwa Mukuru wa Samoa

Iyi ni Ingoro Ndangamurage yitiriwe Robert Louis Stevenson muri Samoa

Aha hazwi nka Alofaaga Blowholes, aho amazi aba apfupfunuka mu butaka akinaga hejuru cyane, ku buryo hasurwa cyane. Ni mu Karere ka Palauli, ku Kirwa cya Savai'i