Joseph Mugenzi yafatiwe mu Buholandi ashinjwa uruhare muri Jenoside

Yanditswe na Ferdinand Maniraguha
Kuya 27 Ukwakira 2020 saa 10:13
Yasuwe :
0 0

Itsinda ridasanzwe rya Polisi y’u Buholandi ryataye muri yombi umunyarwanda Joseph Mugenzi w’imyaka 71 ukekwaho uruhare muri Jenoside yakorewe Abatutsi muri Mata 1994.

Polisi y’u Buholandi yatangaje ko uwo mugabo ari umwe mu bo u Rwanda rwari rwarashyiriyeho impapuro zo kumuta muri yombi.

Polisi ntiyatangaje amazina ye ariko amakuru yizewe avuga ko ari Joseph Mugenzi, se wa Rene Mugenzi uherutse gufungirwa mu Bwongereza ashinjwa kwiba amaturo ya kiliziya.

Uwo mugabo mu 1994 yahoze ari umukozi wa banki. Yari afite kandi farumasi mu Mujyi wa Kigali.

Muri Mata 1994, uwo mugabo ngo yitabiriye inama zateguraga ibitero byo kujya kwica Abatutsi, anakora urutonde rw’abatutsi babaga bagomba kwicwa.

Mu 2000 nibwo uwo munyarwanda yatse ubuhungiro mu Buholandi. Mu 2013 u yambuwe ibyangombwa bimwemerera kuba muri icyo gihugu nyuma y’umuburo watanzwe na Minisiteri y’Ububanyi n’Amahanga.

Joseph Mugenzi ni umwe mu bashinze ishyaka FDU Inkingi afatanyije na Victoire Ingabire. Nyuma yaje kuribera Perezida. Azwiho guhakana no gupfobya Jenoside yakorewe Abatutsi.

Yakatiwe n’inkiko Gacaca mu Rwanda adahari.

Uwo mugabo atawe muri yombi nyuma y’iminsi mike hafashwe undi munyarwanda Ndereyehe Charles Ntahontuye, umwe mu bashinze ishyaka CDR unakekwaho ibyaha bya Jenoside yakorewe Abatutsi. Yaje kurekurwa mu gihe hagitegerejwe umwanzuro ku bujurire bwe ku mwanzuro yafatiwe wo kwamburwa ubwenegihugu bw’u Buholandi.

U Buholandi bwagiye bugaragaza ubushake bukomeye mu gufata no kuburanisha abanyarwanda bakekwaho uruhare muri Jenoside. Icyo gihugu cyoherereje u Rwanda abarimo Jean Claude Iyamuremye na Jean-Baptiste Mugimba boherejwe mu Rwanda ku wa 12 Ugushyingo 2016.

Iki gihugu usibye kohereza mu Rwanda abakekwaho Jenoside, cyanaburanishije abarimo Mpambara Joseph wakatiwe igifungo cya burundu ku wa 7 Nyakanga 2011 kubera ibyaha yakoreye ku Mugonero mu gihe cya Jenoside; naho Yvonne Basebya Ntacyobatabara yahamijwe ibyaha yakoreye i Gikondo muri Jenoside, ahanishwa igifungo cy’imyaka itandatu n’amezi 8, ku wa 1 Werurwe 2013.

Joseph Mugenzi yari amaze imyaka igera kuri 20 yihishe mu Buholandi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .