Ni igikorwa inzego z’ubuyobozi bw’Umujyi wa Kigali, iz’Akarere ka Nyarugenge n’iz’Umurenge wa Kimisagara zabyukiyemo kuri uyu wa Kane tariki ya 7 Mutarama 2021.

Sitasiyo yo kwa Mirimo yubatse mu gishanga kiri inyuma ya Gare ya Nyabugogo, ahakunze kuba imyuzure iyo imvura yaguye. Ibumoso bwayo hari kwagurirwa ikiraro kinyura hejuru y’umugezi wa Mpazi.

Uko hagaragara, umuhanda n’ikiraro biri kuvugururwa byegereye sitasiyo cyane ku buryo harimo intera igaragarira amaso ko ari nto.

Umuyobozi Mukuru ushinzwe Ibikorwa remezo mu Mujyi wa Kigali, Asaba Katabarwa Emmanuel, yabwiye itangazamakuru ko iyo sitasiyo yimuwe muri gahunda y’Umujyi wa Kigali yo kwimura ibikorwa biri mu bishanga.

Ati “Muzi ko ari gahunda imaze igihe itangiye, aha ngaha twagiye tuganira na ba nyiraho tubashishikariza kwivaniramo ibikorwa byabo.”

Yakomeje avuga ko nubwo ba nyir’ibikorwa bashishikarijwe kubikuramo binangiye ntibabikore, akaba ari nayo mpamvu bihagurukiye nk’ubuyobozi bakaza kubihakura.

Ati “Nyuma rero y’ibiganiro bitandukanye bikaba bitaragiye bishyirwa mu bikorwa, tukaba tuje kugira ngo duhagarike imishinga ikorerwamo aha ngaha noneho babashe kwimuka.”

Katabarwa yasobanuye ko uretse kuba iyo sitasiyo iri mu bishanga, kuyimura binajyanye n’ibikorwa byo kubaka ikiraro cya Mpazi.

Ati “Nk’uko mubizi Nyabugogo ni agace gakunda kurangwa n’imvura n’imyuzure, aho amazi akunda kuza akinjira mu bikorwa biri aha ngaha bitandukanye. Twatangiye kubaka ikiraro no kuzamura umuhanda kugira ngo turebe uko twahangana n’aya mazi.”

Yavuze ko ibikorwa byo kubaka umuhanda byagonze ahakorera sitasiyo ku buryo byashoboraga gushyira mu kaga abayigana.

Abafite ibikorwa hafi ya sitasiyo batungwe n’icyemezo cyo gusenyerwa

Sitasiyo yo kwa Mirimo iri kumwe n’indi nzu yakorerwagamo ibindi bikorwa birimo alimentation.

Abakorera muri iyo nzu bavuze ko batunguwe n’icyemezo cyo kwimurwa bagahita banasenyerwa, ngo kuko batigeze babiganirizwaho mbere.

Umwe muri bo yagize ati “Twaje nimugoroba dusanga bashyize amatangazo ku miryango ngo tugomba kwimuka. Tukiyabona ngo mu gitondo harasenywa.”

Katabarwa yavuze ko ibyo abaturage bavuga ko batamenyeshejwe ari urwitwazo.

Yagize ati “Ni urwitwazo kuko gahunda bizwi ko imaze igihe ndetse n’abo bahakorera bakaba barakoreshejwe inama zitandukanye, bakanandikirwa n’Umujyi wa Kigali bamenyeshwa ko igihe cyo kuhava kigeze.”

Nta ngurane ku bimuwe mu bishanga

Ubusanzwe iyo abaturage bimuwe na Leta mu gice cy’ahantu runaka kubera ibindi bikorwa bigiye kuhakorerwa, bahabwa ingurane y’imitungo itimukanwa bari bahafite.

Katabarwa yabajijwe niba abari kwimurwa bazahabwa ingurane, asubiza ko ntayo bazahabwa bijyanye n’icyo itegeko riteganya ubu.

Yagize ati "Ku bijyanye n’imikoreshereze y’igishanga, hari ibiteganywa kuba bikorerwamo. Ibyo bidakorerwamo [bihari] urumva biba bihari mu buryo butemewe n’amategeko.”

“Byaba bigoranye rero kuri uyu munsi kuvuga ko ibikorwa bitemewe n’amategeko bihabwa ingurane […] Igihe hatarahindurwa itegeko, nta ngurane ishobora gutangwa ku bikorwa biri mu bishanga.”

Umugore wa nyakwigendera Mirimo Gaspard, Gahongayire Winiflida, yavuze ko atumva ukuntu sitasiyo ye yaje gusenywa kandi afite icyemezo cy’urukiko kimuhesha ububasha bwo kutimurwa.

Uyu mugore wari witwaje impapuro nyinshi yaburaniyeho n’Umujyi wa Kigali, yazeretse itangazamakuru avuga ko afitanye ibibazo byihariye na bamwe mu bayobozi, bityo akaba ari yo mpamvu baje kwimura ibikorwa bye.

Yagize ati "Urukiko rwampaye icyemezo [acyerekana] ko sitasiyo ikomeza gukorera aha ngaha. Abayobozi narakiberetse barabizi, ariko barenze ku mwanzuro w’urukiko bagiye kunsenyera.”

Gahongayire yavuze ko nta ngurane ashaka, ko we icyo ashaka ari uko hubahirizwa umwanzuro w’urukiko kugeza igihe uzahindurirwa, hagakorwa icyo rwategetse.

Lisansi yari muri sitasiyo yakuwemo irimurwa

Gahongayire n'umuhungu we beretse itangazamakuru impapuro baburaniyeho basaba ko hakurikizwa icyemezo cy'urukiko

Hazanywe imashini zifashishwa mu gusenya ibikorwa byari biri ahazwi nko kwa Mirimo

Ibumoso bwa sitasiyo hari gukorwa imirimo yo kwagura ikiraro cya Mpazi

Ikiraro cya Mpazi kiri kuvugururwa mu rwego rwo gukemura imyuzure iba Nyabugogo mu bihe by'imvura

Umujyi wa Kigali watangaje ko kubera imirimo yo kwagura ikiraro byasatiriye ahari sitasiyo ku buryo idasenywe byashyira mu kaga ubuzima bw'abahagana

Umuhanda warazamuwe ugonga sitasiyo

Umuyobozi Mukuru ushinzwe Ibikorwa remezo mu Mujyi wa Kigali, Katabarwa yatangaje ko ibyakozwe n'Umujyi wa Kigali biri muri gahunda ya Leta yo kuvana ibikorwa mu bishanga

Gahongayire Winifride yasabye ko hubahirizwa umwanzuro w'urukiko wo kutimurwa

Abatangiraga serivisi kwa Mirimo babyutse basohora ibikoresho byabo

Inyandiko igaragaza icyemezo urukiko rwafashe cy'uko sitasiyo yo kwa Mirimo idasenywa

Amafoto: Igirubuntu Darcy