00:00:00 IGIHE NETWORK KN KINYARWANDA EN ENGLISH FR FRANCAIS

Umujyi wa Kigali ugeze he imyiteguro ya CHOGM?

Yanditswe na Akayezu Jean de Dieu
Kuya 5 April 2022 saa 10:58
Yasuwe :

Ubuyobozi bw’Umujyi wa Kigali bwagaragaje ko bugeze kure imyiteguro yo kwakira Inama y’Abakuru b’Ibihugu na za Guverinoma z’Umuryango w’Ibihugu bikoresha ururimi rw’Icyongereza, CHOGM.

Iyi nama izabera mu Rwanda muri Kamena 2022, aho biteganyijwe ko izahuriza mu Mujyi wa Kigali ababarirwa mu bihumbi umunani baturutse mu bihugu 54 bigize Umuryango wa Commonwealth.

Mu nteko y’abaturage yabaye kuri uyu wa 5 Mata 2022, hifashishijwe ikoranabuhanga, Umuyobozi w’Umujyi wa Kigali Wungirije Ushinzwe, Imiturire n’Ibikorwaremezo, Dr Mpabwanamaguru Merard, yavuze ko kugeza ubu imyiteguro yo kwakira CHOGM bayigeze kure.

Ati “By’umwihariko mu Mujyi wa Kigali hari imyiteguro turimo gukora hirya no hino kugira ngo abashyitsi bazaze bahibonamo.”

Dr Mpabwanamaguru yavuze ko abacuruzi basanzwe ndetse n’abakora ibikorwa byo kwakira abantu bakomeje gukangurirwa kuzarangwa n’imyitwarire myiza kugira ngo bazaheshe ishema umujyi n’igihugu muri rusange.

Yakomeje agira ati “By’umwihariko nk’inzego z’ibanze turi gushyira imbaraga mu kwita ku isuku kuko intego yacu nk’Umujyi wa Kigali, ni isuku, umutekano n’umurimo unoze kandi wihuse. Turi gukaza ingamba mu kugira ngo isuku igaragare haba ku mubiri, mu nzira aho tugenda no mu ngo zacu aho dutuye.”

Dr Mpabwanamaguru avuga kandi ko hakomeje kwagura, kuvugurura no kwagura imihanda izafasha mu ngendo z’abazitabira iyi nama ya CHOGM.

Ati “Dufite imihanda turimo kwihutisha kugira ngo nibura ku itariki 31 Gicurasi 2022, izabe yarangiye, hari iyagiye irangira ariko hari n’indi ikomeje kubakwa ku buryo duteganya kuzaba twubatse imihanda ingana n’ibilometero 15,9.”

Yakomeje agira ati “Iyo mihanda by’umwihariko izafasha kugira ngo abazaba bitabiriye inama bayinyuremo ariko hari n’indi izunganira indi mihanda yageraga ahantu runaka.”

Inzu n’ibibanza bitubatse biri ku mihanda, ba nyirabyo bari gukangurirwa kubigirira isuku kugira ngo bizabe bisa neza.

Yongeyeho ati “Ikindi na none turimo gukangurira abaturage, tubasobanurira icyo Commonwealth ari cyo kugira ngo babyumve ndetse n’icyo inama ya CHOGM ari cyo. Ibyo bikajyana na none na bwa bukangurambaga bw’ibikorwa kugira ngo Umujyi wa Kigali uzishimirwe ku manywa na nijoro.”

Dr Mpabwanamaguru yavuze ko hari n’ahantu hateguwe hazakorerwa siporo, aho gusohokera haba ku manywa na nijoro n’ibindi bikorwa bizakenerwa n’abazitabira inama ya CHOGM.

Urujeni Martine yasabye abanyamujyi kwitabira ibikorwa byo kwibuka Jenoside yakorewe abatutsi ku nshuro ya 28
Dr Mpabwanamaguru yagaragaje ko bimwe mu bibazo bibangamiye abaturage biri gushakirwa igisubizo
Umuyobozi w'Umujyi wa Kigali, Rubingisa Pudence yasabye abaturage gukomeza gutanga ibitekerezo ku byazamura iterambere ryabo
Minisitiri Gatabazi yasabye abayobozi b'Umujyi wa Kigali guharanira gukemura ibibazo by'abaturage
Umwali Pauline yasobanuye ko ikibazo cy'ubujura cyahagurukiwe
Mu cyumba cy'Inama mu Mujyi wa Kigali hari hateraniye abayobozi b'inzego z'ibanze
Abayobozi batandukanye bitabiriye ibi biganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .