Umugore wa Kobe Bryant yajyanye mu nkiko ikigo cyari gishinzwe indege yahitanye umugabo we

Yanditswe na IGIHE
Kuya 25 Gashyantare 2020 saa 12:36
Yasuwe :
0 0

Vanessa Bryant, umugore wa Kobe Bryant wari icyamamare mu mukino wa Basketball yatanze ikirego arega sosiyete yari ishinzwe kajugujugu yahitanye umugabo we, umukobwa we Gianna Bryant n’abandi bantu barindwi.

Nkuko byatangajwe n’ikinyamakuru cyo muri Leta Zunze Ubumwe za Amerika, TMZ, ngo Vanessa ashinja sosiyete Island Express yabarurwagaho indege yishe abo mu muryango we, kuba yaremeye ko iyo ndege iguruka mu kirere kitameze neza kandi byari bibujijwe.

Bivugwa ko indege yahitanye Kobe Bryant yari yemerewe kuguruka mu kirere gisa neza ku buryo uyitwaye abasha kureba imbere ye, nyamara ngo uwo munsi indege yemerewe kuguruka kandi ikirere cyari kimeze nabi.

Vanessa mu kirego cye avuga ko umupilote yahagurukije indege atabanje gusuzuma neza uko ikirere cyifashe, atabanje no gushaka amakuru y’uko ikirere kiraza kuba kimeze, yanga no gusubika urugendo ubwo yamenyaga ko ikirere cyijimye kubera ibihu byari byiriweho uwo munsi.

TMZ ivuga ko nta ndishyi zigaragara mu kirego Vanessa yatanze, icyakora ngo yasabye ko hatangwa ibihano bikakaye.

Kobe na Vanessa bashyingiwe mu mwaka wa 2001, bari bafitanye abana bane b’abakobwa.

Kuri uyu wa Mbere i Los Angeles habereye ikiriyo cyo gusezera no kwibuka Kobe Bryant n’umukobwa we Gianna bitabye Imana mu kwezi gishize bazize impanuka ya kajugujugu.

Kobe ni umwe mu bagabo banditse amateka akomeye muri Basketball atuma benshi bakunda uyu mukino, kubera ubuhanga bwamuranze mu myaka yose yakinnye kugeza mu 2016 ubwo yahagarikaga. Yatwaye ibikombe bitanu bya NBA akinira LA Lakers.

Vanessa Bryant biravugwa ko yajyanye mu nkiko ikigo cyari gishinzwe indege yahitanye umugabo we n'umwana we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza