ULK yatangije umwaka w’amashuri 2019/2020 yakira abanyeshuri bashya barimo abanyamahanga

Yanditswe na Habimana James
Kuya 9 Ukwakira 2019 saa 09:05
Yasuwe :
0 0

Kuwa 07 Ukwakira, 2019 ULK yatangije umwaka w’amashuri 2019-2020 aho abanyeshuri bashya bakiriwe ku mugaragaro, nk’uko byagaragaye, hakaba harimo n’abanyamahanga baturutse mu bihugu bitandukanye.

Umuyobozi w’Icyubahiro wa ULK, Prof. Kalisa Mbanda yashimiye abahisemo bose kuza kwiga muri ULK.

Yagize ati “Sinzi niba muzi agaciro mufite kuba muje kwiga hano ariko iyi ni Kaminuza yashyizwe ku mwanya wa kabiri mu Rwanda ndetse no ku mwanya wa mbere muri Kaminuza zigenga mu Rwanda. Nzi neza ko muziga mukahavana ubumenyi bwiza kandi muhavane indangagaciro muzakoresha mu buzima bwanyu, dufite abarimu b’inzobere bazabafasha kuhavana ubumenyi bufatika.”

Yakomeje agira ati “Mugomba kugira ibitekerezo bizima, kubaha, guhanga udushya, kwihangana, ndababwira ko ibi nimubikukiriza muzagera aho mwifuza kugera.”

Prof Mbanda akaba yaboneyeho no gutangiza ku mugaragaro umwaka mushya w’amashuri wa 2019/2020.

Umuyobozi w’Icyubahiro wa ULK, Prof. Kalisa Mbanda yashimiye abahisemo bose kuza kwiga muri ULK kuko bahisemo neza

Uwashinze Kaminuza yigenga ya Kigali ULK, Prof. Dr Rwigamba Balinda yatangiye aha ikaze abanyeshuri bashya batangiye mu mwaka wa mbere w’amashuri 2019/2020, ababwira ko bahisemo neza kuko iyi ari Kaminuza iri ku mwanya wa kabiri mu gihugu mu gutanga ubumenyi bufite ireme.

Prof Dr RWIGAMBA Balinda yabigarutseho ku cyicaro gikuru cya ULK giherereye ku Gisozi mu Mujyi wa Kigali, ubwo hakirwaga abanyeshuri bashya batangiye mu mwaka wambere no gutangiza icyumweru cyahariwe kwinjiza intore mu zindi (Induction week).

Yashimiye Leta y’u Rwanda irangajwe imbere na Nyakubahwa Perezida wa Repubulika Paul Kagame kubera ubuyobozi bwe bwiza mu nzego zitandukanye butuma urwego rw’uburezi rukomeza gutera imbere.

Yakomeje agira ati “Dukorera hamwe duharanira gutanga ubumenyi bufite ireme ku banyeshuri bacu, iyo niyo mpamvu iyi Kaminuza iza ku mwanya wa kabiri nyuma ya Kaminuza y’u Rwanda.”

Yavuze ko Kaminuza ishyira imbere gushaka abarimu benshi bafite impamyabumenyi zihanitse kandi bakora ubushakashatsi bufitiye igihugu akamaro.

Uwashinze Kaminuza yigenga ya Kigali ULK, Prof. Dr Rwigamba Balinda yashimiye ubuyobozi bwiza burangajwe na Perezida Paul Kagame, washyize imbaraga mu guteza imbere

Abatangiye mu mwaka wa mbere yabahaye inama esheshatu zizabafasha.

Kugendera ku mabwiriza y’ikigo, kugira intego kuko iyo ufite intego ugira ibikuyobora muri wowe ndetse no hanze yawe, kwitabira amasomo yose atangwa, bitari ukugaragara gusa ahubwo no gutangamo ibitekerezo.

Yavuze kandi ko harimo gusubiramo ibyo bize no gukora ubushakashatsi, gukorera hamwe no gusangira ibitekerezo, gukoresha amashakiro ari muri Kaminuza ( Physical and digital libraries) kandi ababwira ko ababafasha bahari.

Yabasabye kandi kwiga ururimi rw’icyongerezo kuko ari ururimi mpuzamahanga, no gukoresha uburyo bw’ikoranabuhanga. Yanashimiye abayobozi ba ULK umurimo mwiza bakora anabasaba gukomeza kongera ireme ry’uburezi bakurikirana imyigishirize y’abarimu mu mashuri.

Umuyobozi wa Kaminuza Yigenga ya Kigali ULK, Dr Sekibibi Ezechiel mu ijambo rye ry’ikaze, yashimiye abanyeshuri bashya igitekerezo cyiza bagize cyo kwiga muri ULK anabereka abayobozi batandukanye bazabafasha muri serivisi zinyuranye anabizeza ko Kaminuza itazigera ibatenguha cyane ko ifite abarimu bashoboye kandi baturutse mu bihugu bitandukanye.

Yaboneyeho kandi kugaragaza ko uretse abanyarwanda baje kwigamo harimo n’abanyamahanga batari bake, baje kuhashaka ubumenyi.

Abo banyeshuri baturutse mu bihugu birimo Angola, Burkina Faso, Burundi, Cameroon, Tchad, Repubulika Iharanira Demokarasi ya Congo, Congo Brazaville, Kenya, Madagascar, Nicaragua, Nigeria, Sudani y’Epfo, Tanzania, Uganda, Djibouti, Ethiopia, Fiji, Gabon, Ghana, Somalia na Sudan.

Umuyobozi wa Kaminuza Yigenga ya Kigali ULK, Dr Sekibibi Ezechiel mu ijambo rye ry’ikaze, yashimiye abanyeshuri bashya igitekerezo cyiza bagize cyo kwiga muri ULK anabereka abayobozi batandukanye bazabafasha

Umuyobozi w’Ishuri Rikuru ry’Imyuga n’Ubumenyingiro ULK Polytechnic Institute, Dr. Karambizi Sylvestre yahaye ikaze abanyeshuri bose baje kwiga muri uyu mwaka w’amashuri 2019/2020.

Yavuze ko mu masomo y’ubumenyi ngiro batanga, umunyeshuri aharangiza koko afite ubumenyi akoresha ku isoko ry’umurimo, ibi bikagaragazwa n’uko umubare munini bafite imirimo.

Yagize ati “Kugira ngo iri shuri rishingwe byari bijyanye na gahunda ya Leta aho isoko rikenera abafite ubumenyingiro.”

Yakomeje agira ati “Abanyeshuri bacu bahabwa umwanya uhagije ku buryo basubiramo ibyo bize kandi bakabigaragaza ku rugero rwa 70%, ndabwira mwe mwese mwahisemo kuza muri ULK Polytechnic Institute ko amahitamo mwakoze ari meza.”

Umuyobozi w’Ishuri Rikuru ry’Imyuga n’Ubumenyingiro ULK Polytechnic Institute, Dr. Karambizi Sylvestre yavuze ko abaharangije mu mashuri y'ubumenyi ngiro bose babonye akazi abandi barakihangira

Deborah Boendi watangiye mu mwaka wa mbere, yaje muri ULK avuye mu Mujyi wa Kisangani muri Repubulika Iharanira Demokarasi ya Congo.

Yavuze ko yamenye bwa mbere ULK mu 2014 ubwo bari mu nama mu Rwanda, nyuma bakaza gusura iyi Kaminuza.

Yagize ati “Mbere yo kuza hano nari nzi uburyo ari Kaminuza nziza kandi ifite abanyeshuri benshi bavuye mu mahanga, byatumye nanjye nifuza kwiga hano, ubwo nahageraga ku munsi wa mbere nabonye uburyo twakiriwe neza, ibyo byatumye mbona uburyo iyi Kaminuza yita ku banyeshuri bayo.”

Yongeyeho ati “Nashakaga no kwiga muri kaminuza yigisha Icyongereza kuko muri RDC ubona ko bigisha mu gifaransa.”

Yashishikarije abandi kugana ULK kuko kuhaza ari uguhitamo neza.

Deborah Boendi waturutse muri Kisangana muri RDC yavuze kwiga muri ULK ari ukwiha icyerekezo cyiza

Uretse kuba iza ku isonga muri Kaminuza zigenga mu Rwanda, ULK inashimirwa kuba abanyeshuri benshi bayigamo bava mu mahanga, bigaragaza icyizere abayigamo bayifitiye.

Iyi Kaminuza kandi izwiho kuba abanyeshuri bayo bahora batsinda amarushanwa mu biganiro mpaka (Debates).

Abayobozi ba ULK bakiriye abanyeshuri bashya mu mwaka wa 20192020, aba barimo abanyamahanga benshi baje kuhavoma ubumenyi
ULK ikomeje kuza imbere muri Kaminuza zigenga kuko iri kumwanya wa mbere, ikaba iya kabiri mu gihugu cyose nyuma ya Kaminuza y'u Rwanda
Iyi Kaminuza ifite inyubako zigezweho
Isomero ryo muri ULK riri ku rwego mpuzamahanga ku banyeshuri bose baje kuhavana ubumenyi
ULK kandi ifite mudasobwa zifasha buri munyeshuri wese uje kuhiga, bikanamufasha gukora ubushakashatsi
Imyuga n’Ubumenyingiro muri ULK bumaze kugera ku rwego rukomeye kuko bafite ibikoresho bihagije
Abanyeshuri baje kwiga mu Ishuri Rikuru ry’Imyuga n’Ubumenyingiro ULK Polytechnic Institute, beretswe ko bazahavana ubumenyi buhagije

Amafoto: Dushimimana Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza