Ubuzima bwo mu nkambi ya Nyarushishi icumbikiye abavuye mu mashyamba ya Congo (Video)

Yanditswe na Ferdinand Maniraguha
Kuya 18 Mutarama 2020 saa 09:53
Yasuwe :
0 0

Guhera mu Ukuboza umwaka ushize, u Rwanda rwakiriye mu kivunge ibihumbi by’Abanyarwanda bari barahungiye muri Repubulika Iharanira Demokarasi ya Congo, barimo abahoze ari abarwanyi b’imitwe irimo FDLR n’imiryango yabo.

Ni Abanyarwanda baje nyuma y’uko ingabo za Congo, FARDC zigabye ibitero ku mitwe yitwaje intwaro yahungabanyaga umutekano muri icyo gihugu, abafashwe n’imiryango yabo boherezwa mu Rwanda.

Bamaze kwakira barabaruwe, abahoze ari abarwanyi bagera kuri 400 bajyanwa mu kigo cya Mutobo cyakira abahoze ari abarwanyi kugira ngo basubijwe mu buzima busanzwe, mu gihe imiryango yabo yajyanywe mu nkambi y’agateganyo ya Nyarushishi mu Karere ka Rusizi, ngo yitabweho mbere yo koherezwa aho bakomoka.

Mu bilometero bike uvuye mu mujyi wa Rusizi, ku musozi uhinzeho icyayi wa Nyarushishi niho iyo miryango icumbikiwe, mbere yo kujyanwa mu buzima busanzwe.

Ni imiryango igizwe n’abantu 1991, barimo abagabo 122, abagore 784 n’abana 1085.

Ukinjira uri iyo nkambi usanganirwa n’amagana y’abana bakina, abiga n’abakuru bake banyuranamo.

Bakigera mu nkambi babanje kwitabwaho mu bijyanye n’ubuvuzi, basuzumwa indwara zitandukanye zirimo nka Ebola n’Iseru byugarije Repubulika Iharanira Demokarasi ya Congo aho baturutse. Benshi bari bafite imirire mibi, abandi umunaniro ubageze kure kubera inzira ndende bakoze mu mashyamba ya Congo.

Abasaga ijana biganjemo abana basanzwemo iseru, bashyirwa ukwabo ngo bitabweho mu gihe abandi basaga 200 basanzwemo imirire mibi ikabije, nabo bashyirirwaho uburyo bwihariye. Nta n’umwe basanzemo Ebola.

Abo banyarwanda bashyiriweho uburyo bwo guhugurwa no kwigishwa uburere mboneragihugu hashingiwe ku myaka yabo.

Abana bato bashyiriweho amarerero, bahabwa indyo yuzuye uko bikwiriye n’inyigisho zigenewe abana bato.

Babaye ingwate y’amateka batagizemo uruhare

Abenshi mu bari mu nkambi ya Nyarushishi ni urubyiruko. Ukihagera ubona ikibazo cy’abakobwa benshi babyaye bakiri bato atari ku bushake, ahubwo kuko nta yandi mahitamo bari bafite.

Uwimana Divine afite imyaka 26 kuri ubu. Ababyeyi bamuhunganye muri Congo mu 1994 amaze amezi make avutse.

Mu nkambi ya Nyarushishi, twasanze ahetse umwana mu mugongo. Ntabwo azi umubare w’uduce twose yabayemo muri Repubulika Iharanira Demokarasi ya Congo, gusa yibuka ko yatashye aturutse i Kalehe muri Kivu y’Amajyepfo, ubwo ingabo za Congo zagabaga ibitero ku birindiro bya FDLR.

Ababyeyi be bapfuye akiri muto, akura ari impfubyi. Kubura umwitaho, kuba nta mashuri bari bafite byose byatumye yiheba, asanga amahitamo asigaranye ari ugushaka umugabo.

Aganira na IGIHE yagize ati “Gushaka umugabo byatewe n’ibibazo. Waba udafite so cyangwa nyoko ugakomeza kuruhira mu bupfubyi ntuhite ushaka? Ibyiza ni uko uhita ufata umwanzuro. Impfubyi nyinshi zishaka zitagejeje igihe.”

Nubwo aterura ngo abivuge neza, yemeza ko habaho n’abashaka kubera gufatwa ku ngufu n’abagabo cyangwa inyeshyamba, nubwo we uwo bashakanye byari ku bwumvikane.

Imyaka y’ubuto bwe yashiriye mu buzima bubi atahisemo, ariko aracyafite icyizere ko nafashwa azahindura amateka.

Ati “Urareba aho uzahera utangira ukabona ni ikibazo. Gusa icyizere kirahari. Ukuntu twageze hano tumeze ntiwari kuba wakwifuza kuba wahagararana n’umuntu. Twari tumeze nabi ariko ubu biri kuza.”

Kuri we ngo naramuka abonye inzu yo kubamo, ibindi byose azakoresha amaboko ye kandi yizeye kwiteza imbere.

Uwamahoro Valentine nawe Jenoside yakorewe Abatutsi yabaye ari muto, bamuhetse. Ubu afite imyaka 26 ubu ariko afite abana batanu, amaze imyaka 11 abana n’umugabo nubwo baherutse gutandukanywa n’intambara, ntamenye aho umugabo we yarengeye.

Uwamahoro avuga ko yumvaga yaratakaje icyizere cy’iterambere, ariko kigaruka akurikije uko yasanze abo bangana mu Rwanda babayeho.

Yagize ati “Hano hateye imbere ariko hariya twabaga nta terambere twabagamo, ni ukwirirwa twiruka. Nanjye mba narize nk’abandi kuko ntitubasha kwiga. Ubuzima buzakomeza uko nzasanga iwacu hameze, nzagendana n’iterambere bazaba bagezeho.”

Bigirimana Emmanuel yageze muri Congo afite imyaka ine, ubu afite umugore n’abana batatu.

Mu kwezi amaze i Nyarushishi, ngo yasanze ibyinshi babwiraga ku Rwanda ari ibinyoma bigamije kubaheza mu bukene n’ubujiji.

Ati “ Bavugaga ko ugeze mu Rwanda bamwica, ko Abahutu bataba mu Rwanda ariko twasanze barabeshyaga, u Rwanda ni urw’Abanyarwanda bose. Batwigishije ko iby’amoko bitakiba mu Rwanda, biratwereka ko ibyo bavugaga ari ukubeshya.”

Akomoza ku cyo yicuza yatakarije mu mashyamba ya Congo, Bigirimana yagize ati “urubyiruko tungana bamaze kugera hejuru biteje imbere, njye mbona ko hari ibyo nahombye kuko imyaka ntijya hasi, iri kwiyongera.”

Abana bari mu batahutse nabo biteganyijwe ko nibasubizwa mu buzima busanzwe bazemererwa gukomeza mu mashuri y’aho bazaba batuye.

Ni amahirwe benshi batigeze babona bakiri mu mashyamba, kuko uwigaga nta cyizere cyo gusoza amashuri yabaga afite.

Nibyo byabaye kuri Uwitonze Pauline wavuye mu Rwanda mu 1994 ari uruhinja rw’amezi ane.

Uyu mugore ubu ufite abana babiri, yabashije kwiga agera mu mwaka wa kabiri w’amashuri yisumbuye, biza kwanga kubera intambara zatumaga bahora biruka.

Yavuze ko bashoboraga kwiga imyaka ibiri, indi ibiri bakayimara batiga kubera intambara. Mu 2016 yarambiwe ubwo buzima, ahitamo kureka ishuri yishakira umugabo.

Ati “Twahoraga mu ntambara, tukiga imyaka ibiri indi ntitwige, twahombye amashuri ntitwiga. Nahagaritse kwiga mu 2016 maze gushaka kuko nabonaga imyaka iri kugenda n’ubundi tutiga bihamye, mpitamo gushaka.”

Uwitonze yifuza ko naramuka asubiye mu muryango nyarwanda, yafashwa kwiga agasoza amashuri ye yacikirije.

Umunyamabanga Mukuru wa Komisiyo yo gusezerera no gusubiza mu buzima busanzwe abari abasirikare, Musoni Francis, avuga ko ubwo bakiraga abo banyarwanda bari bafite ibibazo byinshi bishingiye ku mibereho mibi n’ihungabana.

Byatumye hashyirwaho itsinda ry’abaganga babakurikirana, abafite ibibazo bidasanzwe boherezwa mu bitaro bya Gihundwe biri mu Karere ka Rusizi.

Ati “Benshi baje bafite indwara nyinshi, umwe ugasanga ahuriweho n’indwara z’ibyorezo. Twarabasuzumye, baravurwa noneho bagahabwa n’inkingo z’izindi ndwara. Baje bafite umunaniro ukabije. Kuko bari mu mashyamba, bakoze ingendo nini batarya, batanywa.”

Yongeyeyo ati “Ikindi ni ukubafasha ku bigendanye n’ihungabana. Abantu bavuye mu mashyamba igihe cyose, ibyo bahuye nabyo birimo gupfusha abana bakabasiga ku mihanda, bapfusha abagabo , abagore […] ni ihungabana bari kugendana. Dufite ababafasha ngo ibibazo bigendanye n’ihungabana bigabanuke.”

Izi mpunzi zifite uburyamo bugezweho mu nkambi, harimo inzitiramubu, hari amazi meza, bahabwa imyenda n’ibindi byangombwa nkenerwa.

Bahugurwa kandi ku bijyanye n’aho igihugu kigeze, gahunda za Leta n’ibindi bizatuma bisanga mu muryango nibasubira aho bavuka.

Komezusenge Adelphine, umufashamyumvire ushinzwe kwita ku bana, yemeza ko hari ibimaze guhinduka mu gihe bamaze bita kuri abo banyarwanda.

Yagize ati “Nk’abana tukibakira wabonaga ikinyabupfura cyabo gitandukanye n’abana basanzwe mu Rwanda ariko uko tugenda tumarana iminsi, tubatoza umuco wo mu Rwanda, biragenda biza. Wabonaga isuku ari nke cyane, ariko uko turushaho kubigisha bigenda biza.”

Uwamariya Florence wahunze u Rwanda mu 1994 ari muto cyane, abaye impfubyi akiri muto akurira mu mashyamba. Yari yarabuze uburyo bwo gutaha kubera amakuru bababwiraga ku Rwanda.

Yavuze ko hari benshi nka we b’urubyiruko babuze uko bataha kubera ibyo babwirwa, abamara impungenge zo gutaha bakiteza imbere n’igihugu.

Ati “Bavugaga ko abantu babica, nta muntu watwishe, ahubwo twafashwe neza baratugaburira, baratwondora, baduha ibyo kunywa. Inama naha abakiriyo ni uko amakuru babwirwaga ngo abantu baricwa, bagafatwa nabi ari ukubabeshya. Baze twubake u Rwanda kuko barasigaye.”

Nibarangiza guhugurwa mu nkambi y’agateganyo, bazahabwa ibyangombwa nkenerwa birimo ibikoresho byo mu rugo n’ibiribwa by’amezi atatu. Buri muryango kandi uzahabwa 120 000 Frw yo gutangirana ubuzima.

Guhera mu 1994, Abanyarwanda basaga miliyoni 3.5 bari impunzi bamaze gutaha no gusubizwa mu buzima busanzwe.

Mu nkambi, abana bashyiriweho amarerero abafasha mu myigire
Abana bigishwa mu buryo butandukanye bitewe n'ibyiciro by'imyaka yabo
Mu batashye mu Rwanda higanjemo abana bato
Umuyobozi w'ishami rishinzwe gukumira no kurwanya ibyorezo muri RBC Dr. Nyamusore José, yavuze ko ubuzima bw'abanyarwanda bavuye muri Congo buri kugenda neza
Mu nkambi abana bahabwa umwanya wo kwidagadura mu mikino itandukanye
Abana bo mu nkambi barimo gukina 'karere'
Hari inzu zirimo ibiro by'ubuyobozi byifashishwa mu kwakira ibibazo by'abari mu nkambi
Hari amahema atandukanye akoreshwa mu gutanga serivisi zitandukanye ku bari mu nkambi
Abana bato bitabwaho by'umwihariko
Abana bari munsi y'imyaka icumi bahabwa inyigisho zihariye zirimo izibafasha kugira imyitwarire myiza
Abafashamyumvire bita ku bana bato
Abana bari mu nkambi bahabwa imyenda yo kwambara
Ababyeyi bafite abana bato bafite ibibazo by'imirire mibi bahabwa imiti itandukanye irimo iy'inzoka
Abana bishimiye kuba baragarutse mu gihugu cyabo
Abari mu nkambi bahabwa imbuto cyane cyane hakitabwa ku bafite imirire mibi
Buri gitondo batekerwa igikoma ngo ubuzima bwabo bukomeze kumera neza
Indyo yihariye itekerwa abana bafite imirire mibi
Abashinzwe guteka baba bakorana ingoga kugira ngo ibiryo bibonekere igihe
Bahawe aho kuryama heza kandi harimo ibyangombwa birimo inzitiramubu

Amafoto: Muhizi Serge

Video: Mugwiza Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .